Henplais 8:6-13
Nqe cim:
“Tiamsis Vajtswv muab txoj haujlwm uas tseemceeb dua cov povthawj ntawd txoj rau Yexus ua. Ib yam li txoj kevcai tshiab uas Yexus ua kom neeg thiab Vajtswv sib cuag tau, txoj ntawd yeej zoo dua txoj qub, rau qhov txoj ntawd muaj lus cog tseg hais txog tej uas hajyam zoo dua” (Henplais 8:6).
Lus nug rau sawvdaws xav:
– Piav txog tej lus cog tseg qub thiab lus cog tseg tshiab?
– Vim li cas tibneeg cheemtsum tej lus cog tseg tshiab uas zoo dua?
– Peb pom li cas thaum peb ua neej raws li tej lus cog tseg tshiab thiab tej lus cog tseg qub?
Tuav phau Vajluskub ntawm tes, peb paub tau hais tias feem twg yog Phau Vajluskub Qub, uas yog tej lus cog tseg qub; feem twg yog Phau Vajluskub Tshiab, uas yog tej lus cog tseg tshiab. Tej lus cog tseg qub yog cov lus Vajtswv cog rau cov neeg Yixalayees dhau los ntawm Mauxes, nws yog Vajtswv txoj kevcai muab cob rau cov pejxeem, yog leejtwg ua raws li yuav tau foom koob hmoov, leejttwg tsis ua raws li yuav raug txim (II Kevcai 29). Hos tej lus cog tseg tshiab yog Vajtswv cov lus cog tseg rau tibneeg ntiajteb, ua ntej yog cov Yixalayees, tom qab ntawd yog tag nrho txhua tus neeg uas los lees yuav Tswv Yexus kev tuag txhiv nws lub txim lawm (Mathais 26:27-28).
Tus uas sau phau ntawv Henplais txhais qhia vim li cas peb cheemtsum tej lus cog tseg tshiab: “Yog txoj qub kevcai zoo lawm, ces tsis tas yuav muaj dua txoj tshiab” (nqe 7). Tej lus cog tseg qub tsis “tau zoo txaus” tsis yog nyob ntawm lub ntsiab cov lus cog tseg tiamsis yog nyob ntawm tus neeg ua raws li cov lus cog tseg. Timthawj Paulus paub zoo qhov no thaum nws hais tias, “peb paub hais tias Mauxes txoj Kevcai yog Vajtswv txoj; tiamsis kuv yog neeg, txojkev txhaum thiaj niaj hnub yuam kuv ua txhaum...” (Loos 7:14). Tibneeg muaj tus yamntxwv ua txhaum, qaug zog yuav ua tsis tau raws li txoj kevcai, thiab raws li tej uas txoj kevcai thib ib kom ua, yog tej lus cog tseg qub, ces yuav raug txim. Qhov no twb qhia tshwm meej nyob hauv Vajtswv haivneeg, tom qab uas ib lub sijhawm ntev loo lawv tsis ua raws li Vajtswv txoj kevcai, xyoo 586 U.Y, lawv raug cov tubrog Npanpiloos tuaj ntaus thiab ntes coob leej coj mus ua qhev.
Lub sijhawm tus Tswv haivneeg raug txomnyem ntsuav, tus cevlus Yelemis thiaj qhia rau lawv hais txog tej lus cog tseg tshiab uas tus Tswv coglus tseg yuav zam lawv tej kev txhaum thiab yuav coj lawv rov los nrog Nws sib raug zoo (Yelemis 31:31-34). Tus uas sau tsab ntawv Henplais siv cov lus uas Yelemis hais los hais txog qhov tseemceeb ntawm tej lus cog tseg tshiab uas txhua tus ntseeg Tswv Yexus puavleej tau. Zoo kawg nkaus rau peb txhua tus nimno, thaum paub hais tias yus tau tus Tswv lees yuav tsis yog vim peb ua tau zoo tiamsis yog vim tej uas Tswv Yexus twb ua saum ntoo khaublig. Nimno, peb tsis yog siv zog kom tau tus Tswv lees yuav, tiamsis yog vamkhom tus Tswv txoj koob hmoov ua neej tsimnyog thiaj tau Nws lees yuav.
Thov Vajtswv,
Tus Tswv, nyuam yaus qaug zog, ua tsis tau zoo. Yog tsis muaj Koj tej lus cog tseg tshiab hauv Tswv Yexus cov ntshav, ces nyuam yaus yuav ua tsis tau haum Koj siab. Ua Vajtswv tsaug vim muaj Vaj Ntsujplig nyob hauv nyuam yaus, thov pab nyuam yaus ua neej tsimnyog hauv tej lus cog tseg tshiab. Amees.
Peb puas tabtom ua neej tsimnyog li tus neeg uas nyob hauv tej lus cog tseg tshiab?
Nyeem Vajluskub hauv peb lub xyoo: Malakaus 15:1-41
Kênh Youtube BHKTHN:
