Klei Aê Diê Blŭ: Klei Kbiă 34:27‑28
Êlan kliăng: “Yêhôwa lač kơ Y‑Môis, “Čih bĕ klei blŭ anei, kyuadah djŏ tui si klei blŭ anei yơh kâo ngă leh klei bi mguôp hŏng ih leh anăn hŏng phung Israel.” (Klei Kbiă 34:27)
Klei êmuh ksiêm mĭn: Ya klei bi mguôp yuôm bhăn Aê Diê lŏ mkŏ mjing hŏng phung ƀuôn sang Ñu? Ya bruă Y‑Môis ngă hŏng klei bi mguôp Aê Diê mtô? Ya klei yuôm bhăn mơ̆ng klei Y‑Môis kăm ƀơ̆ng huă dôk hŏng Aê Diê bŏ pă pluh hruê mlam? Phung đăo kơ Krist dôk hlăm ya klei bi mguôp leh anăn ya bruă klam mâo?
Klei Kbiă 34:27‑28 dưi dlăng jing klei klah čŭn mơ̆ng lu klei hriăm “Aê Diê Bi Mrâo Klei Bi Mguôp Hŏng Israel” drei hriăm leh. Tal sa hlăk Y‑Môis dôk wah lač hŏng Aê Diê ti čư̆ Sinai snăn phung ƀuôn sang Ñu kkuh kơ rup êđai êmô mah ti jơ̆ng čư̆, Aê Diê ngêñ leh anăn bi kmhal diñu. Leh phung ƀuôn sang kmhal akâo kơ Aê Diê pap brei, Ñu tŭ ư hrăm mbĭt hŏng digơ̆ nao blah Kanaan. Tal dua, Aê Diê iêô Y‑Môis nao ti čư̆ Sinai čiăng lŏ mkŏ mjing klei bi mguôp hŏng phung ƀuôn sang Israel. Ñu klah čŭn klei bhiăn knuih hdĭp ăt msĕ mơh klei bhiăn hlăm ƀuôn sang Ñu brei leh êlâo anăn. Dŭm asăp mtrŭn leh anăn klei bhiăn Aê Diê čih tal anei yuôm bhăn snăk, djŏ tuôm kơ klei soh phung ƀuôn sang Aê Diê ênưih lĕ hĭn tơdah nao hlăm ƀuôn Kanaan. Aê Diê hưn brei răng klei soh kkuh kơ rup yang leh anăn mtô diñu klei brei ngă čiăng gang mkhư̆ mâo wăt bruă bi klưh sang yang leh anăn rup yang, amâo bi mguôp ôh leh anăn amâo bi dôk ung mô̆ hŏng dŭm djuê ana ti Kanaan. Êngao anăn, phung ƀuôn sang Israel brei djă pioh dŭm hruê leh anăn knăm yuôm bhăn grăp thŭn čiăng hdơr kơ Yêhôwa Aê Diê atăt gai leh, leh anăn mkăp kơ diñu jih hdră kbiă mơ̆ng čar Êjip leh anăn nao hlăm Lăn Aê Diê Ƀuăn (Klei Kbiă 34:10‑26).
Hlăm êlan 27, Aê Diê mtô Y‑Môis lŏ čih klei anei kyua anăn jing klei bi mguôp Aê Diê čih leh hŏng Y‑Môis leh anăn jih phung ƀuôn sang Israel. Hlăm êlan 28, Yêhôwa Aê Diê čih klei bi mguôp, jing Pluh Mta Klei Bhiăn klă klơ̆ng hlăm dua boh tâo msĕ si Ñu yua kđiêng kngan čih hlăm dua boh tâo tal êlâo (Klei Kbiă 31:18). Jih jang klei bhiăn phung ƀuôn sang Aê Diê dưi jưh mơ̆ng tur knơ̆ng Pluh Mta Klei Bhiăn anei.
Hlăm jih pă pluh hruê mlan, Y‑Môis wah lač hŏng Yêhôwa Aê Diê, wăt tơdah amâo ƀơ̆ng kpŭng kăn mnăm êa rei ƀiădah ñu ăt suaih pral, djăp ai ktang čiăng blŭ hrăm hŏng Aê Diê. Aê Diê pô jing phŭn mkăp klei ktang kơ ñu. Bruă bi mguôp hŏng Aê Diê, amâodah klei čiăng hlăm mngăt yuôm bhăn hĭn kơ klei čiăng hlăm kđeh. Khua Yang Yêsu lač leh: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn” (Y‑Mathiơ 6:33). Hruê anei, phung đăo kơ Krist dôk hlăm klei bi mguôp mrâo hlăm êrah Khua Yang Yêsu, anei jing êlan sa anăn čiăng kơ anak mnuih wĭt hŏng Aê Diê leh anăn mâo klei hdĭp hlŏng lar (Y‑Mathiơ 26:28, I Kôrantô 11:25, Y‑Luk 22:20). Hlăm klei bi mguôp mrâo, drei mâo bruă klam bi lar klei Khua Yang Yêsu djiê tơl Ñu lŏ hriê (I Kôrantô 11:26).
Si drei ngă leh bruă hiu hưn klei Khua Yang djiê?
Wah lač: Ơ Khua Yang, kâo bi mni kơ Ih brei leh kơ kâo dưi dôk hlăm klei bi mguôp mrâo hlăm êrah Khua Yang Yêsu. Akâo kơ Ih đru kâo thâo mpŭ, kriăng hriăm Klei Aê Diê Blŭ leh anăn hur har hiu hưn klei Ih bi mtlaih kơ lu mnuih.
Dlăng Klei Aê Diê Blŭ hlăm tlâo thŭn: Y‑Apđia 1‑21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
