Khiavdim 34:27-28
Nqe cim:
“Tus Tswv hais rau Mauxes hais tias, cia li sau tej lus no tseg, rau qhov tej lus uas kuv cog tseg rau koj thiab cov Yixalayees puavleej hais raws li tej lus no.” (Khiavdim 34:27).
Lus nug rau sawvdaws xav:
– Tus Tswv rov hais txog tej lus cog tseg tseemceeb twg rau Nws haivneeg?
– Mauxes yuav tsum ua li cas rau tus Tswv cov lus cog tseg?
– Mauxes mus cuag tus Tswv tau plaub caug hnub plaub caug hmo txhais tau li cas?
– Cov ntseeg Yexus tabtom nyob hauv cov lus cog tseg twg thiab muaj feem xyuam li cas?
Khiavdim 34:27-28 suav tau haistias yog cov lus xaus rau cov zaj kawm “Tus Tswv Coglus Rau Cov Yixlayees” uas peb twb kawm los. Zaum tim ib, thaum Mauxes tabtom ntsib tus Tswv saum Roob Xinais, ces tus Tswv haivneeg txawm pe tus mlom nyuj hauv taw roob, tus tswv chim heev thiab rau txim rau lawv. Tom qab uas lawv lees txim thov tus Tswv zam txim, Nws teb lawv tej lus thov thiab coj lawv kev los rau tebchaws Kana-as. Zaum tim ob, tus Tswv hu Mauxes mus saum Roob Xinais thiab coglus rau cov Yixalayees. Nws sau zog txoj kevcai ua zoo thiab kevcai ua neej uas Nws twb muab ua ntej. Tus Tswv tej lus samhwm thiab tej kevcai uas sau zaum no tseemceeb heev, ntsig txog tej kev txhaum uas Nws haivneeg yoojyim raug ntxias thaum mus nyob hauv tebchaws Kana-as. Tus Tswv ceebtom txojkev txhaum pemlom thiab qhia lawv lub tswvyim ua kom rhuav tej chaw teev dab, pemlom, tsis ua phoojywg thiab tsis yuav lwm haivneeg nyob hauv tebchaws Kana-as tej ntxhais. Dua li, cov Yixalayees yuav tsum caiv tej hnub thiab tej lub kevcai tshwjxeeb hauv txhua lub xyoo los nco txog tus Tswv tau coj lawv thiab pub rau lawv muaj noj haus thaum tawm nram tebchaws Iziv los hauv tebchaws Kana-as (Khiavdim 34:10-26).
Hauv nqe 27 tus Tswv qhia rau Mauxes sau tej lus no, vim tej lus ntawd yog tus Tswv coglus tseg rau Mauxes thiab tagnrho cov Yixalayees. Hauv nqe 28, tus Tswv yog tus uas sau cov lus cog tseg, uas yog Kaum Nqe Kevcai rau saum ib daim txiag zeb zoo li thawj zaug uas Nws muab Nws tus ntivtes sau (Khiavdim 31:18). Tagnrho tus Tswv haivneeg tej kevcai puavleej yog sau raws li Kaum Nqe kevcai.
Lub sijhawm plaub caug hnub plaub caug hmo, Mauxes mus cuag tus Tswv, txawm tsis noj mov tsis haus dej los nws yeej muaj zog txaus nrog tus Tswv sib tham. Vajtswv yog lub hauvpaus txojsia pub dag zog rau Mauxes. Qhov uas nrog tus sib txuas lus, lossis lub neej sab ntsujplig tseemceeb dua sab nqaij tawv. Tswv Yexus hais tias: “Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej.” (Mathais 6:33). Nimno, cov ntseeg Yexus nyob hauv cov lus cog tseg uas muaj Yexus Khetos cov ntshav, qhov no yog txojkev uas coj tibneeg mus cuag tau Vajtswv thiab txais txojsia ntev dhawv mus ibtxhis (Mathais2 6:28; I Kauleethaus 11:25; Lukas 22:20). Hauv tus Tswv tej lus cog tseg tshiab, peb muaj feem qhia tawm Tswv Yexus txojkev tuag mus txog hnub uas Nws rov qab los (I Kauleethaus 11:26).
Thov Vajtswv,
Tus Tswv, ua tsaug uas Koj pub nyuam yaus tau nyob hauv tej lus cog tseg tshiab uas muaj Yexus cov ntshav. Thov Koj pab kom nyuam yaus saib qhov ntawd tsimtxiaj, rau siab kawm Koj Txojlus thiab qhia Koj txojkev cawm dim rau lwm tus. Amees.
Peb twb ua raws li tus Tswv tej lus samhwm qhia Nws txojkev tuag zoo li cas?
Nyeem Vajluskub hauv peb lub xyoo: Aunpadiyas 1-21
Kênh Youtube BHKTHN:
