Lukas 2:21-24
Nqe cim:
“Tiamsis thaum txog lub sijhawm uas Vajtswv teem cia lawm, Vajtswv txib Vajtswv tus Tub los yug ua neeg, muaj ib tug pojniam yug nws. Thiab nws kuj coj raws li cov Yudais txoj kevcai ib yam li sawvdaws, nws thiaj pab tau cov neeg uas Vajtswv txoj kevcai muab khi cia lawm kom lawv dim. Nws ua li ntawd, peb thiaj tau ua Vajtswv cov menyuam” (Kalatias 4:4-5)
Lus nug xav:
– Tom qab Tswv Yexus yug, Yauxej thiab Malis tau ua tej kevcai dabtsi raws li txoj kevcai qhia tseg?
– Peb tau txais kev cawmdim thiab tau ua Vajtswv cov menyuam los ntawm yam twg?
Qhov uas Malis xeeb tub los ntawm Vaj Ntsujplig Tus Dawbhuv ntau tsawg los yeej muaj kev cuam tshuam rau Yauxej thiab Malis lub siab thaum tseem tos hnub yuav sib yuav, tiamsis nkawd ob leeg kuj mloog thiab ua raws Vajtswv tej lus, sib sau los nyob ua ke mus txog hnub yug tau tus metub. Tom qab uas Tswv Yexus los yug lawm, nkawd tau ua raws li Mauxes txoj kevcai. Qhov xubthawj yog ua kev txiav tawv thiab tis npe rau tus metub thaum puv yim hnub lawm (nqe 21; Levis Kevcai 12:3). Tswv Yexus yog Vajtswv Leej Tub uas los yug ua neeg, yog Tus tsis muaj kev txhaum, tiamsis Nws tseem raug ua kevcai txiav tawv raws li txojcai, zoo ib yam li thaum Nws txais Kevcai Raus Dej, yog “ua txhua yam raws li Vajtswv pom zoo” (Mathais 3:15). Nkawd kuj muab tus metub tis npe hu ua Yexus raws li tus timtswv twb qhia tseg lawm.
Qhov txuas ntxiv yog, nkawd coj tus metub mus fij rau Vajtswv (nqe 22-24). Tomqab uas ua kevcai ntxuav raws li Mauxes txoj Kevcai lawm (Levis Kevcai 12:1-7), Yauxej thiab Malis thiaj coj Tswv Yexus mus rau hauv lub nroog Yeluxalees fij rau Vajtswv. Qhov no yog Vajtswv txoj kevcai uas Vajtswv tau samhwm tomqab uas rau txim rau cov Iziv tej tub hlob thiab hais kom muab cov Yixalayees tej tub hlob thiab tej tsiaj uas yog thawj tug tshwj cia rau tus Tswv (Teev Npe 3:13).
Koob Tsheej nco txog Tswv Yexus yug xyoo no, peb ua Vajtswv tsaug vim tias Tswv Yexus lub neej txij thaum Nws los yug ua neeg mus txog thaum Nws pib ua haujlwm, puavleej ua tiav tej yam uas Vajtswv Txoj Kevcai yuam kom yuav tsum ua los ntawm nws lub neej coj raws nraim li Txoj Kevcai ntawd qhia. Thaum nyeem plaub phau Txojmoo Zoo, peb pom ntau zaus Tswv Yexus tawmtsam tej kevcai uas cov xibhwb qhia Vajtswv txojkev cai thiab cov Falixais rhawv tsim, tiamsis hais txog Vajtswv Txoj Kevcai uas nyob hauv Vajluskub, ces Tswv Yexus tib leeg thiaj yog tus ua tiav txhua nqe, raws li Nws tau hais tias: “Nej tsis txhob xav hais tias yog kuv los rhuav Mauxes txoj Kevcai thiab tej lus uas cov cev Vajtswv lus tau qhia tseg lawm. Tsis yog kuv los rhuav tej lus ntawd, tiamsis yog kuv los ua kom tej lus ntawd tiav” (Mathais 5:17).
Tibneeg txhaum tsis muaj leejtwg ua tau tiav raws li Vajtswv Txoj Kevcai. Tsuas yog Tswv Yexus tib leeg xwb thiaj ua tau lub neej raws nraim li Vajtswv Txoj Kevcai, yog li ntawd Nws thiaj li txhiv tau peb txhua tus nyob hauv Txoj Kevcai uas peb tsis muaj cuabkav ua tiav thaum peb los ntseeg Tswv Yexus, raws li Vajtswv Txojlus hais tias: “Tiamsis thaum txog lub sijhawm uas Vajtswv teem cia lawm, Vajtswv txib Vajtswv tus Tub los yug ua neeg, muaj ib tug pojniam yug nws. Thiab nws kuj coj raws li cov Yudais txoj kevcai ib yam li sawvdaws, nws thiaj pab tau cov neeg uas Vajtswv txoj kevcai muab khi cia lawm kom lawv dim. Nws ua li ntawd, peb thiaj tau ua Vajtswv cov menyuam” (Kalatias 4:4-5). Peb cia li tsa suab ua Tswv Yexus tsaug, Nws tau los yug, tuag txhiv peb, ua tiav Vajtswv Txoj Kevcai, kom peb tau txais txoj kev cawmdim.
Thov Vajtswv,
Tswv Yexus, ua Koj tsaug uas Koj tau tso lub tshwjchim ci ntsa iab saum ntuj los yug ua neeg, ua tiav Vajtswv Txoj Kevcai kom pub txojkev cawmdim thiab pub cai rau nyuam yaus los ua Koj menyuam. Thov pab kom nyuam yaus ua neej ua Koj tes haujlwm thiab qhia Txojmoo Zoo mus rau coob leej. Nyuam yaus tuav Yexus Khetos lub npe thov. Amees.
Peb coglus rau tus Tswv licas nyob hauv Koob Tsheej Yexus Yug nyuam qhuav dhau los?
Vajluskub hauv peb lub xyoos: Tes Haujlwm 13
Kênh Youtube BHKTHN:
