Klei Aê Diê Blŭ: Klei Bi Hriêng 30:1-4
Êlan kliăng: “Sĭt nik kâo mluk hĭn kơ mnuih mkăn, leh anăn amâo mâo klei thâo săng tui si sa čô mnuih ôh.” (Klei Bi Hriêng 30:2)
Klei êmuh ksiêm mĭn: Si klei Y-Agur thâo kral kơ ñu pô jing? Si ngă klei thâo kral anei jing yuôm êdimi? Ya klei brei drei wah lač brei kơ phung khua kiă kriê lăn čar drei?
Y-Agur jing sa čô mnuih thâo săng tơdah jih jang êlan Klei Bi Hriêng ñu čih mâo Yang Mngăt Jăk ktrâo atăt, leh anăn mdưm mbĭt hŏng jih Klei Bi Hriêng mơ̆ng mtao Y-Salômôn. Snăn, klei thâo săng amâo pioh brei hjăn kơ sa čô mnuih ôh, ƀiădah pioh brei kơ jih jang hlei pô bi luă gŭ ñu pô leh anăn tui duah Khua Yang (êlan 2-4). Wăt tơdah mâo lu klei pap Khua Yang brei leh anăn mâo klei thâo săng, Y-Agur ăt yap ñu pô jing mnuih “mluk” (êlan 2), sa boh blŭ mâo phŭn mbĭt hŏng boh blŭ “hlô mnơ̆ng rông”, leh anăn khăng mblang jing “mluk mgu”, hĭn mơh, ñu yap kơ ñu pô jing “mluk hĭn kơ mnuih mkăn”. Amâo mjưh tăp anăn ôh, ñu wăt lŏ yua klei blŭ duê čiăng kñăm ktang hĭn, ñu lač kơ ñu “amâo mâo klei thâo săng tui si sa čô mnuih ôh”, čiăng lač klei thâo săng ñu knŏng knar hŏng hlô mnơ̆ng rông!
Êlan 4 drei thâo săng snei, Y-Agur dôk lač kơ klei mluk ñu hlăm klei tui duah leh anăn thâo kral Khua Yang. Hĭn mơh, hlăm êlan 3, tơdah dưm “klei thâo săng” msĕ si “klei thâo săng Pô Doh Jăk”, Y-Agur čiăng lač snei “klei thâo săng” sĭt, jing klei thâo kral Aê Diê, anei jing mta klei ñu “amâo tuôm hriăm”. Blŭ mdê, drei amâo tuôm thâo ƀuh sĭt ôh klei thâo săng, tơdah knŏng dlăng hlăm lam hrô kơ dlăng phă dlông. Thâo kral Aê Diê jing kčưm dơ̆ng kơ klei thâo ƀuh lăn ala Ñu. Ksiêm dlăng kơ lăn ala Aê Diê ƀiădah amâo thâo kral ôh Ñu, jing dưm drei pô hlăm anôk jing hơăi mang amâo tŭ dưn ôh (Klei Bi Hriêng 9:10).
Y-Agur amâo bi ti gŭ ñu pô amâodah luă gŭ mgưt ôh, ƀiădah thâo kral klei ñu jing, hŏng klei luă gŭ, bi ti gŭ ñu pô tơdah nao giăm klei mngač Klei Aê Diê Blŭ, luă gŭ, huĭ mpŭ tơdah dôk ti anăp Aê Diê Pô (Y-Yôp 42:3-6). Klei thâo săng anei jing yuôm êdimi, kyua hŏng klei anăn yơh Y-Agur jing sa čô mnuih thâo săng; hŏng klei luă gŭ, bi ti gŭ ñu pô, leh anăn tui duah Aê Diê, snăn Khua Yang bi êdah Klei Aê Diê Blŭ kơ ñu. Klei Y-Agur thâo săng brei jing klei thâo săng kơ jih jang mnuih mâo klei lŏ bi kkiêng mrâo msĕ mơh, dưi pŏk mblang ală klei hdĭp myang. Bi mklăk wĭt, klei krưh mgao, hưn ktưn kơ pô jing klei bi knăl kơ sa čô mnuih ka mâo klei lŏ kkiêng mrâo ôh, amâodah ăt dôk jing hđeh điêt, jing “hđeh ĭ” hlăm klei hdĭp myang. Êlan Klei Bi Hriêng anei phat kđi kơ phung yap diñu pô jing thâo mĭn mơ̆ng klei ktang ñu pô. Boh sĭt gơ̆, diñu jing “mluk mgu” tơl amâo lŏ thâo kral ôh diñu pô dôk jing “mluk mgu”, leh anăn diñu ăt jing phung “mluk mgu” tơl amâo thâo kral ôh kơ diñu dôk hdĭp sa klei hdĭp amâo năng hdĭp ôh (Y-Êsai 5:21; 19:11-15).
Drei khăng wah lač brei kơ lăn čar mâo phung khua kiă kriê thâo mĭn, knhâo knhăk, gĭt gai lăn čar đĭ kyar. Ƀiădah mta klei yuôm brei drei hŏng jih ai tiê wah lač akâo kơ Khua Yang bi mlih ai tiê phung khua kiă kriê čiăng kơ diñu thâo kral leh anăn kkuh mpŭ kơ Khua Yang.
Si klei drei dôk wah lač brei kơ lăn čar drei?
Wah lač: Ơ Khua Yang, hŏng jih ai tiê akâo Khua Yang pap brei kơ lăn čar kâo, leh anăn akâo Khua Yang brei mâo phung khua kiă kriê thâo kral Khua Yang, huĭ mpŭ kơ Khua Yang, leh anăn kkuh mpŭ kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Kôlôs 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
