II Petus 3:18
Nqe cim:
“Nej yuav tsum muab siab rau ntseeg, nej thiaj yuav paub peb tus Tswv Yexus Khetos uas yog peb tus Cawmseej, thiab paub nws txojkev hlub zuj zus mus. Sawvdaws yuav tsum niaj hnub hwm nws thiab hwm mus ibtxhis li. Amees.” (II Petus 3:18)
Nyeem ntxiv Phau Txhais Tshiab HMOWSV
Tiamsis nej cia li kheev hlob rau hauv tus Tswv Yexus Khetos uas yog peb tus Cawmseej txojkev hlub thiab paub nws zuj zus. Thov kom nws tau koob meej ci ntsa iab nimno thiab mus ib txhis tsis kawg. [Amees]
Lus nug xav:
– Timthawj Petus txhawb Vajtswv cov menyuam lub zog txog yam dabtsi?
– Lub homphiaj ntawm qhov kev txhawb zog no yog dabtsi?
– Hauv lub xyoo tshiab no, peb ntshaw “kheev hlob” txog yam dabtsi?
Nyob hauv ntu kawg ntawm tsab ntawv thib ob, Timthawj Petus tau ceebtoom cov ntseeg nyob txhua qhov chaw txog hnub kawg thiab lub caij uas tus Tswv yuav rov qab los (II Petus 3:6-10). Tomqab ntawd, ua ntej yuav xaus lus, nws tau txhawb Vajtswv cov menyuam nyob txhua qhov chaw lub zog hais tias: “Tiamsis nej cia li kheev hlob rau hauv tus Tswv Yexus Khetos uas yog peb tus Cawmseej txojkev hlub thiab paub nws zuj zus. Thov kom nws tau koob meej ci ntsa iab nimno thiab mus ib txhis tsis kawg. [Amees]” (nqe 18 HMOWSV). Lo lus “kheev hlob” txhais hais tias yuav tsum nce toj, loj hlob tuaj, rhais ruam mus ntxiv, ua kom muaj ntxiv… Ntawm no yog ib lo lus samhwm, tsis yog ib txojkev xaiv ua lossis tsis ua raws yus siabnyiam.
Timthawj Petus hais txog ob feem ntawm txojkev kheev hlob. Feem xubthawj yog “kheev hlob rau hauv tus Tswv Yexus Khetos uas yog peb tus Cawmseej txojkev hlub”, uas yog loj hlob hauv kev tau saj tus Tswv txojkev hlub thiab txojkev zoo uas Nws pub rau yus. Peb saib txoj koob hmoov hlub cawmdim uas tus Tswv pub rau peb muaj nqis heev thiab zeem paub qhov txiajntsig ntawm txoj koob hmoov hlub ntawd. Feem thib ob yog kheev hlob hauv kev “paub Nws zuj zus”. “Paub” txhais hais tias nkag siab tob tob. Muaj ntau tus neeg tsis ntseeg Vajtswv los lawv yeej paub txog tus Tswv, thiab dab ntxwgnyoog los yeej paub ib yam li ntawd (Yakaunpaus 2:19). Peb tsis yog tsuas paub tus Tswv ntawm kev kawm xwb tiamsis ho tsis muaj txojkev sib raug zoo tob nrog tus Tswv. Hnub nyoog raws tus Tswv qab ntev npaum cas, ces peb yuav tsum “paub” tus Tswv heev npaum ntawd. Rau qhov tus Tswv twb txhiv peb lawm thiab peb yog Nws tug . Yog tias peb tsis caw tus Tswv los ua tus Kav peb lubneej, ces peb yuav ua tsis tau lubneej ua rau tus Tswv tau koob meej hauv ntiajteb no li Timthawj Petus lub siab ntshaw hais tias: “…Thov kom Nws tau koob meej ci ntsa iab nimno thiab mus ib txhis tsis kawg. [Amees].”
Nyob hauv lub Tsiab, tibneeg feem ntau sib foom koob hmoov hais tias “muaj nyiaj puv txhab, qoob loo puv nthab”, tej ntawd tsuas yog tej kev npau suav xwb, tiamsis yuav ua li cas thiaj tau tej ntawd ces tsis muaj leejtwg paub li. Peb yog Vajtswv cov menyuam, nyob hauv hnub pib lub xyoo tshiab, peb kuj muaj lub caij nyoog tig los ntsuam xyuas peb lubneej raws tus Tswv qab yav dhau los, peb puas tabtom “kheev hlob”, tsis yog kheev hlob ntawm nyiaj txiag tiamsis yog “kheev hlob rau hauv tus Tswv Yexus Khetos uas yog peb tus Cawmseej txojkev hlub thiab paub nws zuj zus.” Rau qhov yog peb lubneej sab ntsujplig tsis kheev hlob thiab tsis zeem paub tob tob ntxiv txog txojkev cawmdim, ces peb yuav ua tsis tau lubneej haum tus Tswv siab, tsis ua rau tus Tswv tau koob meej dhau ntawm peb tej lus hais thiab peb tes haujlwm. Thov tus Tswv pab peb niaj hnub nqhis nqhawv kev loj hlob sab ntsujplig dhau ntawm kev coglus nyeem thiab kawm Vajtswv Txojlus, coglus nrhiav tus Tswv hauv kev thov Vajtswv, coglus cia Vaj Ntsujplig ua tus coj kev hauv lub xyoo tshiab no.
Thov Vajtswv,
Tus Tswv uas muaj kev hlub, ua Koj tsaug vim Koj pub rau nyuam yaus muaj caij ntuj tshiab zoo nkauj kawg nkaus. Thov pab nyuam yaus niaj hnub nqhis nqhawv kev paub Koj ntxiv, kheev hlob hauv txojkev ntseeg dua qub, thiab lubneej ua rau Koj tau koob meej mus ntxiv. Nyuam yaus tuav Yexus Khetos lub npe thov, Amees.
Peb tabtom kheev hlob lossis nkaum rov hauv txojkev nrog tus Tswv mus?
Nyeem Vajluskub hauv peb xyoos: I Kauleethaus 7
Kênh Youtube BHKTHN:
