Klei Aê Diê Blŭ: II Y-Pêtrôs 3:18
Êlan kliăng: “Ƀiădah brei diih hriê kơ prŏng hlăm klei pap leh anăn klei thâo kral Khua Yang Pô Bi Mtlaih drei Yêsu Krist. Kơ Ñu yơh brei klei guh kơang ară anei hlŏng kơ ênuk hlŏng lar. Amen” (II Y-Pêtrôs 3:18)
Klei êmuh ksiêm mĭn: Ya klei Khua ƀĭng kna Y-Pêtrôs mtrŭt phung anak Khua Yang? Ya jing klei kñăm čiăng kơ klei mtrŭt anei? Hlăm thŭn mrâo drei čiăng hriê kơ prŏng kơ ya klei?
Hlăm kdrêč knhal tuč hră mơĭt tal dua, Khua ƀĭng kna Y-Pêtrôs mtă brei phung đăo tar ƀar anôk răng kơ hruê knhal tuč leh anăn kơ hruê Khua Yang srăng lŏ hriê (I Y-Pêtrôs 3:6-10). Ti tluôn anăn, êlâo kơ bi ruê̆ ñu bi mđĭ ai jih jang phung anak Khua Yang tar ƀar anôk snei, “Ƀiădah brei diih hriê kơ prŏng hlăm klei pap leh anăn klei thâo kral Khua Yang Pô Bi Mtlaih drei Yêsu Krist. Kơ Ñu yơh brei klei guh kơang ară anei hlŏng kơ ênuk hlŏng lar. Amen” (I Y-Pêtrôs 3:18). Boh blŭ “hriê kơ prŏng” čiăng lač kơ klei jing prŏng khue, êbat nao phă anăp, bi đĭ lar…anei jing sa klei mtă brei ngă amâo djŏ klei brei ruah tui si klei pô čiăng ôh.
Khua ƀĭng kna Y-Pêtrôs blŭ djŏ kơ dua nah hlăm klei đĭ hriê kơ prŏng. Nah tal sa jing “hriê kơ prŏng hlăm klei pap”, hriê kơ prŏng hlăm klei thâo kral klei pap leh anăn klei khăp Khua Yang brei leh kơ drei. Drei mpŭ kơ klei bi mtlaih Khua Yang brei leh kơ drei hŏng klei pap leh anăn thâo săng klă kơ boh yuôm klei pap anăn. Nah tal dua jing “hriê kơ prŏng hlăm klei thâo kral Khua Yang Pô Bi Mtlaih drei Yêsu Krist.” “Thâo săng” lŏ mblang jing thâo săng êlam. Lu phung amâo đăo kơ yang ôh thâo kral Khua Yang, yang jhat ăt thâo kral msĕ mơh (Y-Yakơ 2:19). Amâo dưi ôh drei thâo kral Khua Yang knŏng hŏng klei thâo săng ƀiădah amâo mâo ôh klei bi mguôp sĭt suôr hŏng Ñu. Knư̆ tui hlue Khua Yang sui thŭn knư̆ drei hriê kơ prŏng mơh hlăm klei “thâo kral Khua Yang”. Kyuadah Khua Yang bi mtlaih drei leh, leh anăn drei jing dŏ Ñu. Tơdah drei amâo jum Khua Yang jing Khua kơ klei hdĭp drei ôh snăn drei amâo dưi bi guh kơang kơ Anăn Ñu ôh ti lăn ala anei, msĕ si klei Khua ƀĭng kna Y-Pêtrôs čiăng snăk snei: “brei klei guh kơang ară anei hlŏng kơ ênuk hlŏng lar! Amen.”
Hlăm dŭm hruê Têt, arăng khăng bi hơêč hmưi hdơ̆ng găp mâo “klei mdrŏng sah, mbhă myun.” Anei jing knŏng klei čiăng mâo, ƀiădah si srăng ngă čiăng dưi mâo, hơăi amâo mâo pô thâo ôh. Jing phung anak Khua Yang hlăm kŏ thŭn mrâo, drei msĕ mơh mâo mmông găl lŏ dlăng wĭt kơ thŭn mlan drei tui hlue Khua Yang, drei dôk “hriê kơ prŏng”, amâo djŏ hriê kơ prŏng hlăm klei jing mdrŏng leh anăn mbhă myun ôh, ƀiădah hriê kơ prŏng hlăm klei pap leh anăn klei thâo kral Khua Yang Pô Bi Mtlaih drei Yêsu Krist mơ̆? Kyuadah tơdah drei amâo hriê kơ prŏng ôh hlăm klei hdĭp myang leh anăn ƀrư̆ hruê ƀrư̆ thâo săng êlam hĭn kơ klei bi mtlaih snăn klei hdĭp drei amâo dưi bi mơak kơ Khua Yang ôh, kăn dưi bi guh kơang kơ Anăn Ñu hlăm klei drei blŭ leh anăn bruă drei ngă rei. Akâo Khua Yang đru drei khăp kơ klei hriê kơ prŏng klei hdĭp myang hŏng klei ƀuăn dlăng leh anăn hriăm Klei Aê Diê Blŭ, ƀuăn duah Khua Yang hlăm klei wah lač, ƀuăn êbat tui si Yang Mngăt Jăk atăt gai hlăm thŭn mrâo anei.
Si ngă drei dôk ksŭng nao phă anăp hĕ amâodah kdŭn wĭt phă tluôn hlăm klei tui hlue Khua Yang?
Wah lač: Ơ Khua Yang khăp ơi, bi mni kơ Ih brei leh kơ kâo thŭn mrâo hơ̆k mơak. Đru kâo khăp kơ klei thâo kral Ih hĭn, hriê kơ prŏng hlăm klei đăo kơ Ih hĭn, leh anăn đru klei hdĭp kâo bi guh kơang kơ Anăn Ih hĭn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
