Chivkeeb 29:18-30
Nqe cim:
“Tus uas muaj kev hlub, nws nyiaj taus txhua tsav yam, muab siab rau ntseeg, cia siab thiab ua siab ntev mus li” (I Kauleethaus 13:7).
Lus nug rau sawvdaws xav:
– Vim licas Yakhauj xav yuav Laxees?
– Nws them nqi rau nws txojkev hlub licas?
– Lub plag tseemceeb hauv kev sib yuav yog dabtsi?
– Lub plag ntawd pab peb txhim kho lub neej txijnkawm licas?
Zaj uas hais txog Yakhauj thiab Laxees qhia tshwm ib txojkev hlub tseeb. Vim hlub Laxees, thaum dablaug Lanpas sib tham txog nqi zog ua haujlwm ib lub hli hauv Lanpas tsev, ces Yakhauj teb kiag hais tias txaus siab ua haujlwm pub dawb rau Lanpas xya lub xyoo (nqe 18). Xya lub xyoo ntev heev tiamsis Vajluskub qhia paub hais tias vim hlub Laxees thiaj ua rau Yakhauj saib “zoo li ob peb nyuag hnub” xwb (nqe 20). Qhov no yog Yakhauj txojkev hlub tseeb pub rau Laxees. Kom yuav tau tus pojniam nws hlub, Yakhauj tau ua siab ntev tos thiab rau siab ntso ua haujlwm kom tiav Lanpas nkawd tej lus cogtseg. Tiamsis nyob ntawm no Yakhauj kawm tau ib zaj mob siab heev txog kev dag, vim thaum ub nws tau dag nws txiv thiab nws tus tijlaug lawm (Chivkeeb 27). Yakhauj raug Lanpas dag thaum cia tus niam laus uas yog Le-as mus nrog nws pw hmo uas noj tshoob (nqe 22-23). Thaum kaj ntug, Yakhauj mam paub thiab thaum nug Lanpas, nws thiaj tau ib lo lus teb hais tias raws li cov neeg hauv tebchaws no ibtxwm coj, ces tsis muaj cai xub muab tus ntxhais yau quas ua ntej tus ntxhais hlob (nqe 25-26).
Yakhauj thiaj ua ib siab tos dhau xya hnub uas ua tshoob, nws mam mus “yuav” Laxees ua pojniam. Nrog rau qhov ntawd, nws kuj ua siab ntev coglus ua haujlwm pub dawb rau Lanpas xya xyoo ntxiv (nqe 27-30). Nqe kawg ntawm ntu Vajluskub no hais meej ib zaug ntxiv hais tias Yakhauj hlub Laxees heev (nqe 30).
Kev hlub yog lub plag thiab lub zog rau Yakhauj kev ua haujlwm thiab rhais ruam mus ua lub neej txijnkawm nrog Laxees. Tsuas yog thaum sib hlub tiag tiag, nkawd ib tug thiaj kam ua txhua yam thiab ua siab ntev rau ib tug zoo li Timthawj Paulus tej lus qhia: “Tus uas muaj kev hlub, nws nyiaj taus txhua tsav yam, muab siab rau ntseeg, cia siab thiab ua siab ntev mus li” (I Kauleethaus 13:7). Yakhauj hlub Laxees nws thiaj zam txim thiab ua siab ntev thaum raug nws dablaug Lanpas dag. Nws kuj muaj kev ntseeg thiab kev cia siab hais tias yuav tau yuav tus uas nws hlub.
Kev hlub yog lub plag tseemceeb thiab cheemtsum hauv kev sib yuav. Tiamsis txojkev hlub ntawm tibneeg yog kev hlub qia dub, yog li ntawd tsuas yog thaum cia tus Tswv txojkev hlub muaj puv npo hauv ob niamtxiv lawm, peb thiaj yuav ua tau lub neej txijnkawm sov siab thiab txaus siab. Tus Tswv txojkev hlub pab peb muab tus kheej hloov rau tus txij tus nkawm qhov chaw kom sib totaub thiab koom tes txhim kho lub neej txijnkawm. Thiab tsuas muaj tus Tswv txojkev hlub thiaj pab peb sib zam txim thiab koom tes ua tiav tej lus cogtseg hauv kev sib yuav.
Thov Vajtswv,
Tus Tswv, thov pab nyuam yaus txhim kho lub neej txijnkawm rau ntawm lub plag kev hlub uas Koj muab pub, kom nyuam yaus ua tiav tej lus cogtseg rau tus txij tus nkawm thiab tuav lub neej txijnkawm ruaj khov, kaj siab. Amees.
Peb puas txhim kho lub neej txijnkawm rau saum tus Tswv lub plag kev hlub lawm tau?
Nyeem Vajluskub hauv peb lub xyoos: Mathais 12:38-13:23
Kênh Youtube BHKTHN:
