Klei Aê Diê Blŭ: Klei Mphŭn Dơ̆ng 29:18-30
Êlan kliăng: “Klei khăp tŭ jih, đăo jih, čang hmăng jih, gĭr jih.” (I Kôrantô 13:7)
Klei êmuh ksiêm mĭn: Ya ngă Y-Yakôp čiăng kơ H’Račel jing mô̆ ñu? Si ñu tla ênoh kơ klei ñu khăp? Ya jing atur yuôm hlăm klei hdĭp ung mô̆? Si atur anăn đru kơ drei mkŏ mdơ̆ng klei hdĭp ung mô̆?
Klei yăl dliê kơ klei khăp Y-Yakôp leh anăn H’Račel bi êdah sa klei khăp sĭt klă. Kyuadah khăp kơ H’Račel, snăn tơdah amiêt ñu Y-Laban tla ai ñu hŏng ênoh prăk leh sa mlan mă bruă hlăm sang amiêt ñu, Y-Yakôp wĭt lač mtam ñu srăng mă bruă mang kơ amiêt ñu hlăm kjuh thŭn (êlan 18). Kjuh thŭn jing sui dlông, ƀiădah Klei Aê Diê Blŭ brei thâo kyua klei ñu khăp kơ H’Račel snăn Y-Yakôp dlăng “thŭn anăn jing msĕ si ƀiă hruê” (êlan 20). Anei jing klei khăp klă sĭt ñu pioh kơ H’Račel. Čiăng dưi mâo pô ñu khăp jing mô̆, ñu tŭ gĭr dôk guôn leh anăn mă bruă bi leh klei čoh čuăn ti krah ñu hŏng ama pô srăng jing mô̆ ñu. Ƀiădah lĕ, Y-Yakôp mâo sa klei hriăm ruă suăi snăk kơ klei mplư, kyuadah ñu pô tuôm mplư leh ama ñu leh anăn ayŏng ñu hlăk êlâo (Klei Mphŭn Dơ̆ng 27). Ñu tŭ klei amiêt ñu Y-Laban mplư tơdah atăt ba kơ ñu H’Lêa jing amai hlăm mlam bi dôk ung mô̆ mrâo (êlan 22-23). Truh aguah, tơdah thâo pô anăn jing hĕ H’Lêa leh anăn ñu êmuh Y-Laban, klei wĭt lač ñu mă tŭ jing kyua hlue klei bhiăn čar, brei amai dôk ung êlâo kơh truh kơ adei (êlan 25-26).
Snăn Y-Yakôp tŭ ư hŏng klei mgô̆ dôk guôn bi leh hĕ jih sa hruê kăm dôk H’Lêa snăn kơh dưi dôk H’Račel. Mbĭt anăn, ñu ăt gĭr tŭ ư klei amiêt ñu čoh čuăn brei lŏ mă bruă mang kjuh thŭn leh mă H’Račel jing mô̆ (êlan 27-30). Êlan knhal tuč hlăm trăn anei lŏ sa blư̆ bi klă klei Y-Yakôp sa hnơ̆ng ai tiê khăp kơ H’Račel (êlan 30).
Klei khăp yơh jing atur leh anăn klei mtrŭt Y-Yakôp mă bruă leh anăn dưi mŭt hlăm klei hdĭp jing ung mô̆ hŏng H’Račel. Kyuadah knŏng tơdah mâo klei khăp sĭt kơh, diñu hmiêt mkăp săn asei mlei kơ hdơ̆ng diñu leh anăn dưi tŭ gĭr hdơ̆ng diñu, msĕ khua ƀĭng kna Y-Pôl mtô: “Klei khăp tŭ jih, đăo jih, čang hmăng jih, gĭr jih” (I Kôrantô 13:7). Y-Yakôp kyuadah khăp kơ H’Račel snăn dưi pap leh anăn tŭ gĭr klei amiêt ñu Y-Laban mplư. Leh anăn ñu ăt mâo klei đăo leh anăn čang hmăng srăng dưi mă pô ñu khăp jing mô̆ ñu.
Klei khăp jing atur yuôm leh amâo dưi kƀah ôh hlăm klei hdĭp ung mô̆. Ƀiădah lĕ klei khăp anak mnuih khăng mâo klei čuôt klih, snăn knŏng tơdah dưm klei khăp Khua Yang guôm kluôm klei khăp dua ung mô̆ kơh drei dưi bi knal sa klei khăp mmih jăk leh anăn mơak mñai. Klei khăp Khua Yang đru drei dưm drei pô hlăm anôk pô drei khăp čiăng dưi bi thâo săng leh anăn hrăm mbĭt rŭ mdơ̆ng klei hdĭp ung mô̆. Leh anăn knŏng hjăn klei khăp Khua Yang yơh dưi đru drei thâo bi pap brei kơ klei soh hdơ̆ng pô leh anăn hrăm mbĭt bi leh kluôm ênŭm klei ƀuăn rơ̆ng hdơ̆ng pô hlăm klei hdĭp ung mô̆.
Si ngă drei mkŏ mdơ̆ng klei hdĭp ung mô̆ ti dlông atur klei khăp Khua Yang brei mơ̆?
Wah lač: Ơ Khua Yang, akâo Ih đru kâo mkŏ mdơ̆ng klei hdĭp ung mô̆ ti dlông atur klei khăp Ih pô, čiăng kơ kâo dưi bi leh kluôm ênŭm klei ƀuăn rơ̆ng hdơ̆ng hmei leh anăn răng kriê klei hdĭp ung mô̆ kjăp rơ̆ng, mơak mñai.
Dlăng Klei Aê Diê Blŭ hlăm tlâo thŭn: Y-Mathiơ 12:38-13:23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
