Phau Ntawv Nkauj 119:12-16
Nqe cim:
“Kuv yuav niaj hnub kawm Koj tej kevcai thiab cim ntsoov Koj tej lus” (Phau Ntawv Nkauj 119:15).
Lus nug rau sawvdaws xav: Tus uas sau Phau Ntawv Nkauj thov Vajtswv qhia nws yam dabtsi? Nws muaj tus cwjpwm zoo li cas rau tus Tswv Txojlus? Nws qhia kom ua li cas rau tus Tswv Txojlus? Peb muaj tus cwjpwm zoo li cas rau tus Tswv Txojlus?
Phau Ntawv Nkauj 119 yog Zaj Nkauj uas ntev heev thiab kuj yog tshooj ntev dua nyob hauv phau Vajluskub. Ntau tus neeg txhais Vajtswv Txojlus hais tias Vajntxwv Daviv yog tus sau Zaj Nkauj no. Tshooj 119 no tus sau hais txog tus Tswv Txojlus nkaus xwb. Nws siv ntau lo lus sib txawv los hais txog tus Tswv Txojlus li no: tej kevcai, lus samhwm, tej lus… Hauv 5 nqe thawj, tus sau siv 3 lo lus sib txawv hais txog tus Tswv Txojlus.
Vajntxwv Daviv thov tus Tswv qhia “tej kevcai” rau nws (nqe 12). Vajntxwv coglus yuav “muab tej kevcai uas Koj qhia rau kuv lawm cim rau nruab siab” (nqe 13). Tsis yog kawm tus Tswv Txojlus xwb, tiamsis nws cim Txojlus ntawd mus qhia rau lwm tus paub thiab. Qhov no kuj yog tus Tswv cov lus samhwm rau cov neeg Yixalayees thaum ub: “yuav tsum muab qhia rau nej tej menyuam” (II.Kevcai 6:6-9). Tus Tswv haivneeg cheemtsum kawm paub Nws Txojlus thiab muab Txojlus ntawd qhia rau tej menyuam thiab tej neeg nyob ibncig yus.
Tus uas sau Phau Ntawv Nkauj kuj qhia paub nws“txaus siab ua raws li Koj tej lus samhwm” heev dua li txaus siab rau kev muaj txiag npluanuj” (nqe 14). Vajntxwv Daviv yog ib tug vajntxwv npluanuj thiab ua tau ntau yam. Txawm yog ua neej npluanuj, muaj txhua yam txaus los nws tsis txaus siab npaum qhov uas tau nyob hauv tus Tswv lub Tuamtsev thiab kawm Nws Txojlus. Nws hais tias: “Kuv yuav niaj hnub kawm Koj tej kevcai” (nqe 15). Daviv txiav txim siab kawm thiab “cim ntsoov” tus Tswv tej lus, txhais tau hais tias ntsia ntsoov txojkev uas tus Tswv qhia nws. Qhov no yog kev txiav txim siab ntse ntsuav vim tus Tswv Txojlus yog “lub teeb” taws ua nws ntej, “thiab ci rau nws txoj haukev” (nqe 105). Tseeb tiag nyob hauv Daviv lub neej, ua ntej nws yuav mus ntaus rog nws puavleej thov Vajtswv pab (I. Xamuyees 17, 23; II. Xamuyees 5).
Daviv hais tias: “Kuv txaus siab heev rau Koj tej kevcai, thiab kuv yuav nco ntsoov Koj tej lus samhwm” (nqe 16). Nws saib tus Tswv tej lus tsimtxiaj thiab nyiam txojlus ntawd txog qib uas nws “khaws tus Tswv tej lus rau hauv lub siab” (nqe 11) thiab coglus yuav tsis hnov qab tej lus ntawd. Daviv hais tias: “Koj tej lus qhia qab zib tshaj zib ntab lawm thiab” (nqe 103). Muaj ntau zaus nyob hauv Phau Ntawv Nkauj, Vajntxwv Daviv hais khov kho hais tias nws yuav kawm tus Tswv Txojlus xwb vim nws paub tias tus Tswv Txojlus tseemceeb thiab muaj nqis rau nws.
Nimno cov ntseeg puavleej muaj Vajtswv Txojlus ib phau nyob ntawm txhais tes. Peb cheemtsum zeem paub hais tias tus Tswv Txojlus yog txoj uas qhia cov ntseeg Yexus ua neej. Yim kawm ntau, peb yim paub ntau yam nyob hauv tus Tswv tej kevcai, thiab kuj yuav tau txais zoo ib yam li Daviv tau: tsis muaj ib yam dabtsi muaj nqis, qab zib tshaj li qhov uas ua neej raws li Vajtswv Txojlus qhia.
Thov Vajtswv,
Tus Tswv, nyuam yaus ua Koj tsaug vim Koj tau pub Koj Txojlus uas yog Phau Vajluskub rau nyuam yaus. Thov Koj qhia Koj tej kevcai rau nyuam yaus. Thov Koj pab kom nyuam yaus nquag kawm Koj Txojlus txhua hnub. Amees.
Peb puas nyiam tus Tswv txoj kevcai thiab puas siv sijhawm los kawm tus Tswv Txojlus txhua hnub?
Nyeem Vajluskub hauv peb lub xyoos: Tej Lus Qhia 9:11-10:20
Kênh Youtube BHKTHN:
