Loos 10:13-17
Nqe cim:
“Yog li ntawd, twb yog lawv hnov Txojmoo Zoo, lawv thiaj ntseeg, thiab Txojmoo Zoo uas lawv hnov ntawd yog Yexus Khetos tej lus.” (Loos 10:17)
Lus nug rau sawvdaws xav:
– Timthawj Paulus tawm lus hais yam dabtsi hauv nqe 13?
– Paulus pheej nug cov lus nug twg thiab muaj homphiaj dabtsi?
– Tus Tswv hais dabtsi rau peb dhau zaj kawm hnub no?
Hauv nqe 13, Timthawj Paulus tawm lus hais txog qhov tseeb uas tseemceeb heev, “txhua tus uas thov tus Tswv pab yuav dim.” Qhov no yog qhov tseemceeb ntawm Txojmoo Zoo – txojkev cawmdim thaum los ntseeg tus Cawmseej Yexus. Nqe lus no siv rau txhua tus neeg, tsis xaiv haivneeg, meejmom lossis lub neej yav tas los ntawm tus ntseeg ntawd. Paulus nug rov nug rais taw qhia cov kauj ruam uas ib tug neeg yuav los ntseeg Tswv Yexus hais tias. “Tiamsis yog lawv tsis tau ntseeg, lawv yuav ua li cas thov nws? Thiab lawv yuav ua li cas ntseeg tus uas lawv tsis tau hnov dua? Yog tsis muaj neeg mus qhia txojmoo zoo rau lawv, lawv yuav ua li cas hnov? Yog tsis muaj leejtwg txib lawv mus, lawv yuav ua li cas mus qhia txojmoo zoo?” (nqe 14-15). Yog li, ib tug neeg yuav paub ntseeg tus Tswv, tau suav hais tias ncaj ncees, thawj qhov yuav tsum muaj neeg hnov Vajtswv hu mus qhia Nws Txojmoo Zoo. Tomqab uas hnov Txojmoo Zoo qhia tawm, muaj ib txhia neeg yuav los ntseeg Tswv Yexus thiab txais yuav kev cawmdim.
Hauv nqe 15b, Timthawj Paulus muab cov lus hauv Yaxayas 52:7 los piav txog txhais ko taw zoo nkauj ntawm cov neeg uas hla toj roob hauv pes mus rau Xi-oos tshaj xov tso cov neeg ua cev qhev dim. Kuj ib yam nkaus, raws li tus Tswv ntsia, cov neeg uas mus qhia Txojmoo Zoo txhais kotaw zoo kawg li! Txhais ko taw ntawm cov neeg uas mus tshaj tawm txoj kev sib haum xeeb ntawm ntuj ceeb tsheej thiab tib neeg, coj qhia cov neeg txhaum uas tabtom raug lub txim tuag dim lub txim ntawd mas txhais kotaw zoo kawg li! Vajtswv tsis xav kom ib tug neeg twg puastsuaj. Tswv Yexus twb ua tiav txojkev cawmdim pub rau neeg ntiajteb saum tus ntoo khaublig thiab Nws samhwm kom cov thwjtim ua timkhawv qhia qhov ntawd rau neeg ntiajteb paub (Mathais 28:19-20). Tus neeg qhia Txojmoo Zoo yuav tsum tawm hauv yus qhov chaw kaj siab mus tiv kev mob, tiv txomnyem tseb lub noob Txojmoo Zoo, tiamsis tus Tswv coglus tseg yuav muaj nqi zog zoo heev rau lawv, “Cov txwjlaug uas txawj ntse yuav ci ntsa iab ib yam li tej duab ci saum ntuj. Thiab cov neeg uas qhia tau ntau leej los ua neeg ncaj ncees yuav ci ntsa iab ib yam li tej hnubqub mus ibtxhis.” (Daniyees 12:3). Txawm yog zoo li ntawd los, Timthawj Paulus ceebtoom hais tias tsis yog txhua tus neeg Yudais uas hnov Txojmoo Zoo puavleej los ntseeg tas raws li Yaxayas 53:1 hais.
Timthawj Paulus rov hais ntxiv hauv nqe 17, tus neeg uas ntseeg tus Tswv thiab lawv tau hnov yog muaj neeg mus qhia Vajtswv Txojlus rau. Peb txhua tus tau txais qhov feem xyuam yuav tsum qhia Txojmoo Zoo, tsis hais lub sijhawm twg los yuav tsum qhia kom sawvdaws hnov, los ntseeg tus Tswv kom tau kev cawmdim.
Thov Vajtswv,
Tus Tswv, ua tsaug uas Koj pub rau nyuam yaus tau los ua Koj tus timkhawv. Thov Koj pab kom nyuam yaus muaj lub siab hlub cov neeg raug puastsuaj thiab tshoov kom nyuam yaus kub siab lug siv txhua lub sijhawm mus ua timkhawv qhia Koj zaj. Nyuam yaus tuav Tswv Yexus lub npe thov, Amees.
Leejtwg yog tus uas peb xav mus coj los ntseeg tus Tswv? Peb yuav ua dabtsi rau nws tom ntej no?
Nyeem Vajluskub hauv peb lub xyoo: I Xamuyees 12
Kênh Youtube BHKTHN:
