Klei Aê Diê Blŭ: Rôm 10:13-17
Êlan kliăng: “Snăn klei đăo kbiă hriê mơ̆ng klei arăng hmư̆, leh anăn klei arăng hmư̆ kbiă hriê mơ̆ng klei mtô klei Krist” (Rôm 10:17)
Klei êmuh ksiêm mĭn: Ya klei Khua ƀĭng kna Y‑Pôl hưn bi êdah hlăm êlan 13? Ya klei êmuh ñu êmuh tăm đruê̆ leh anăn ya klei kñăm čiăng? Ya klei Khua Yang blŭ kơ drei mơ̆ng klei hriăm hruê anei?
Hlăm êlan 13, Khua ƀĭng kna Y‑Pôl hưn bi êdah sa klei sĭt nik êđal ƀiădah yuôm bhăn snăk “kyuadah hlei pô iêô kwưh kơ anăn Khua Yang srăng tlaih.” Anei jing boh phŭn kơ Klei Mrâo Mrang Jăk – klei bi mtlaih kyua klei đăo kơ Yêsu Krist. Klei hưn anei hưn mthâo kơ jih jang mnuih amâo bi kah ana mbha djuê, mdrŏng sah amâodah ƀun ƀin ôh. Leh anăn ñu mâo klei êmuh tăm đruê̆ amâo čiăng mâo klei lŏ wĭt lač ôh čiăng ktrâo brei knhuang đru sa čô mnuih đăo kơ Khua Yang Yêsu. “Ƀiădah si mnuih dưi iêô wah lač kơ Pô diñu amâo đăo ôh? Leh anăn si diñu dưi đăo kơ Pô diñu ka tuôm hmư̆ ôh? Leh anăn si diñu dưi hmư̆ tơdah amâo mâo pô mtô ôh? Leh anăn si mnuih dưi mtô tơdah arăng amâo tiŏ nao diñu ôh?” (êlan 14-15). Snăn yơh, čiăng kơ sa čô mnuih đăo kơ Khua Yang, mâo klei yap kpă, êlâo hĭn brei mâo pô gưt kơ klei Khua Yang iêô tiŏ nao hưn Klei Mrâo Mrang Jăk kơ klei bi mtlaih. Leh hmư̆ Klei Mrâo Mrang Jăk mâo đa đa mnuih srăng đăo kơ Khua Yang Yêsu leh anăn iêô kwưh kơ Ñu čiăng mâo klei bi mtlaih.
Hlăm êlan 15b, Khua ƀĭng kna Y‑Pôl hrêč mă mơ̆ng Y‑Êsai 52:7 lač kơ klei siam jơ̆ng phung đĭ čư̆ čhiăng nao truh kơ ƀuôn Siôn hưn klei bi êngiê kơ phung jing mnă. Ăt msĕ snăn mơh, ti anăp ală Khua Yang, jơ̆ng phung hiu hưn Klei Mrâo Mrang Jăk siam êdimima! Jơ̆ng phung nao hưn êlan hdră bi grăng plah wah Aê Diê hŏng mnuih, mtô brei êlan čiăng kơ phung soh dơ̆ng rai tuč mâo klei pap brei kơ klei soh siam êdimima! Aê Diê amâo čiăng sa čô mnuih srăng rai tuč ôh. Khua Yang Yêsu bi leh leh hdră bi mtlaih lăn ala ti kyâo bi kal leh anăn Ñu mtă leh kơ phung ƀĭng kna sa klei mtă prŏng brei digơ̆ jing phung hưn bi sĭt kơ Ñu kơ jih jang găp djuê mnuih ti lăn ala (Y‑Mathiơ 28:19-20). Brei phung hưn Klei Mrâo Mrang Jăk kbiă đuĕ mơ̆ng anôk êđăp ênang, gĭr tŭ klei knap mñai rah mjeh Klei Mrâo Mrang Jăk, Khua Yang ƀuăn srăng brei klei mưn yuôm bhăn kơ digơ̆, “Phung thâo mĭn srăng mtrang msĕ si klei mngač hlăm adiê; leh anăn phung atăt lu mnuih kơ klei kpă ênô srăng mtrang msĕ si mtŭ nanao hlŏng lar” (Y‑Đaniel 12:3). Wăt snăn dưn mơh, Khua ƀĭng kna Y‑Pôl hưn brei thâo amâo djŏ ôh jih jang phung Yuđa hmư̆ klei mtô srăng đăo sơăi kơ Klei Mrâo Mrang Jăk msĕ si čih leh hlăm Y‑Êsai 53:1.
Khua ƀĭng kna Y‑Pôl lŏ mñă hlăm êlan 17, arăng đăo kơ Khua Yang kyua hmư̆ klei mtô, leh anăn digơ̆ dưi hmư̆ klei mtô kyuadah mâo pô mtô Klei Aê Diê Blŭ. Bruă klam kơ grăp čô drei jing hưn Klei Mrâo Mrang Jăk hŏng jih ai tiê thâodah mmông găl amâodah amâo găl ôh čiăng mâo lu mnuih hmư̆, đăo kơ Khua Yang leh anăn mâo klei bi mtlaih.
Kơ hlei pô drei mĭn čiăng atăt digơ̆ hriê kơ Khua Yang? Ya klei drei srăng ngă kơ digơ̆ hlăm hruê ti anăp?
Wah lač: Ơ Khua Yang, kâo lač jăk kơ Ih kyuadah Ih brei kâo jing pô hưn bi sĭt kơ Ih. Akâo Khua Yang brei kâo mâo ai tiê thâo khăp kơ phung klah đuĕ, leh anăn thiăm kơ kâo klei hur har čiăng kâo thâo yua mmông hur har hưn Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
