Klei Aê Diê Blŭ: Klei Bi Hriêng 23:19-21
Êlan kliăng: “Dôk hmư̆ bĕ, Ơ anak kâo, leh anăn jing thâo mĭn, atăt ai tiê ih hlăm êlan kpă” (Klei Bi Hriêng 23:19)
Klei êmuh ksiêm mĭn: Si Mtao Salômôn mtô anak ñu? Ya klei ñu mtă kơ anak brei ñĕ đuê̆? Si drei dôk mđing hriăm mjuăt čiăng mâo klei hdĭp thâo mĭn hlue si Klei Aê Diê Blŭ mtô?
Mtao Salômôn mñă bruă mtô anak hlăm klei blŭ brei anak mđing hmư̆, mă klei mtô čiăng jing thâo mĭn. Mơ̆ng hlăk điêt brei anak hriăm čiăng mđing ai tiê hlăm êlan kpă ênô, djŏ klă. Klei huĭ mpŭ kơ Aê Diê jing mphŭn kơ klei thâo mĭn, kyua anăn čiăng jing thâo mĭn, êlâo hĭn brei jih ai tiê huĭ mpŭ kơ Aê Diê, hdĭp kpă ênô. Klei amâo tŭ jing hlăm bruă bi hriăm anak ba klei ênguôt hnĭng kơ amĭ ama, anak čô leh anăn êpul êya. Hlue si klei bhiăn hlăm Klei Bi Mguôp Hđăp, tơdah sa čô anak bi kdơ̆ng, ai tiê khăng amâo gưt asăp amĭ ama, jing sa čô ră ƀơ̆ng huă leh anăn kreh kpiê ruă, snăn tŭ klei bi kmhal arăng bhir boh tâo tơl djiê čiăng lăm lui klei soh mơ̆ng êpul lu (Klei Mtô Mñă Klei Bhiăn 21:18-21), klei bhiăn anei ngă kơ jih jang phung ƀuôn sang Israel huĭ snăk.
Klei mtă “Dôk hmư̆ bĕ” mñă klă knuih mđing hmư̆ brei răng, đru kơ ai tiê anak mđing kơ klei hdĭp kpă ênô. Mơ̆ng klei blŭ djŏ klă srăng mđing anak kơ bruă ngă djŏ. Mtao Salômôn brei ƀuh rup phung êbat hlăm êlan soh “đăm bi mguôp” hŏng diñu ôh. Anăn jing phung kreh kpiê ruă, ră, khăp pĭt. Phung anei bi ala kơ phung hdĭp hlue si kđeh čiăng, amâo hriăm mjuăt gĭr ktưn leh anăn amâo mđing ôh kơ klei čiăng phung mkăn. Hĭn mơh, phung hdĭp tă tăn msĕ snăn srăng kƀah klei thâo mĭn leh anăn klei răng čiăng răng mgang ngăn drăp pô, mbĭt hŏng bruă huă mnăm amâo djŏ hnơ̆ng, alah, diñu srăng jing kƀah, ƀun ƀin, ala ƀuôn bi êmut.
Ala ƀuôn hruê anei ƀrư̆ đĭ kyar, kdrăp mrâo bi mlih nanao, klei čiăng hlăm klei hdĭp ƀrư̆ đĭ lu, brei phung hđeh gĭr hĭn hlăm klei răng kriê klei hdĭp djŏ leh anăn mđĭ kyar klei hdĭp mda gŏ sang. Ti anăp klei anăn, tơdah amĭ ama amâo mđing đru kơ anak čô pô mđing hmư̆ klei Khua Yang mtô hlăm gŏ sang leh anăn Phung Sang Aê Diê, snăn ênưih ngă kơ anak hdĭp hlue si hnơ̆ng čuăn lăn ala, êbat soh hŏng hnơ̆ng čuăn Aê Diê, srăng ênưih snăk lĕ hlăm klei soh. Êngao anăn, tơdah phung hđeh lĕ nanao hlăm klei hlăp lêñ, huă mnăm, ră rañ, amâodah dlăng ngơi mang hŏng klei hdĭp ară anei kyua klei alah amâodah amâo sa ai, snăn boh jhat jing amâo srăng hmao ôh klei đĭ kyar ala ƀuôn, kreh knhâo, anăn srăng dleh thâo ƀuh bruă jăk, amâo mâo ôh bruă duh mkra kjăp ktang. Phung đăo êbat hlăm êlan Aê Diê mtô, tuôm nanao hŏng klei dleh dlan, lông dlăng kyua hdĭp mdê hŏng hnơ̆ng čuăn lăn ala, ƀiădah atăt truh kơ klei êđăp ênang, jăk mơak leh anăn mdrŏng sah hlue si klei Aê Diê brei. Akâo kơ Aê Diê đru drei hơĭt ai tiê mđing ruah êbat hlue êlan kpă ênô anăn.
Drei dôk akâo kơ Khua Yang brei klei thâo mĭn ñĕ đuê̆ kơ knuih hdĭp hlue si hnơ̆ng čuăn lăn ala mơ̆?
Wah lač: Ơ Aê Diê, kâo bi mni kơ Ih mñă kơ kâo hdĭp thâo mĭn hlue si Klei Aê Diê Blŭ. Akâo kơ Ih đru gŏ sang kâo yua nanao hruê mmông hriăm mjuăt pô, hdĭp doh jăk čiăng kơ gŏ sang bi guh kơang Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
