Pajlug 23:19-21
Nqe cim:
“Metub, ua tib zoo mloog, koj yuav tsum ntse thiab muab siab rau ua koj lub neej tiag tiag.” (Pajlug 23:19)
Lus nug rau sawvdaws xav:
– Vajntxwv Xalumoos qhia menyuam li cas?
– Nws qhia kom menyuam txav deb tej yam dabtsi?
– Peb tabtom rau siab ntso rau qhov xyaum ua lub neej txawj ntse raws li Vajtswv Txojlus qhia zoo li cas?
Vajntxwv Xalumoos hais txog tes haujlwm qhia menyuam kom mloog qhia thiaj dhau los ua neeg ntse. Thaum yau yuav tsum kawm kom paub taug txojkev ua ncaj, ua yog. Hwm tus Tswv thiaj yog lub hauvpaus txawj ntse, yog li xav kom ua tau neeg ntse, qhov ua ntej yuav tsum hwm tus Tswv, ua neej ncaj ncees. Qhia tsis tau menyuam yuav ua rau niamtxiv, tus menyuam thiab lub tebchaws tu siab kawg nkaus. Raws li txoj kevcai hauv Phau Vajluskub Qub, thaum ib tug menyuam tawv ncauj, tsis mloog niamtxiv lus, khiav niamtxiv mus quav cawv qaug, ces yuav rau lub txim txawb pobzeb mus txog thaum tuag (II Kevcai 21:18-21), txoj cai no ua rau tagnrho cov neeg Yixalayees ntshai kawg li.
Lo lus samhwm “ua tib zoo mloog” hais txog tus cwjpwm ua zoo mloog, ua kom menyuam muaj lub siab xav rau yam uas ncaj ncees. Thaum muaj kev xav yog yuav coj tus menyuam mus ua tej haujlwm zoo. Vajntxwv Xalumoos qhia rau tus metub pom tus duab uas cov neeg yuam kev ua es “tsis txhob mus koom” nrog lawv. Lawv yog cov uas quav cawv, ntshaw noj, xav pw. Cov neeg no yog cov uas ua neej vim lawv tus kheej, tsis kam xyaum zoo thiab tsis hmov tshua txog lwm tus. Dua li ntawd, cov neeg uas ua phem ua qias tsis tswj tus kheej no yuav tsis muaj kev txawj ntse thiab txuag tsis tau lawv tej nyiaj txiag, noj haus ywj siab, nkees, lawv yuav dhau mus ua neeg txomnyem, sawvdaws saib tsis taus.
Lub ntiajteb no yim hnub yim vammeej, tej hlwb hlau hloov pauv sai heev, kev ua neej yim hnub yim xav tau ntau, ua rau cov hluas yuav tsum siv zog npaj heev dua rau tus kheej thiab kev noj kev haus rau lub cuabyig. Thaum tshwm muaj tej no, yog niamtxiv tsis mob siab coj qhia tej menyuam ua raws li Vajtswv Txojlus thiab Pawg Ntseeg coj, ces yuav yoojyim heev ua rau cov menyuam mus ua li tej neeg ntiajteb ua, tsis ua li Vajtswv nyiam, yoojyim poob rau txojkev txhaum. Dua li ntawd, yog cov hluas pheej nyiam kev lomzem, noj haus, quav yeeb quav tshuaj, lossis tsis rau siab, tsis kam kawm vim tub nkeeg ces yuav caum tsis cuag lub ntiajteb no txojkev vammeej, kev txawj ntse, yog ua li yuav nrhiav tsis tau haujlwm zoo ua, kev noj kev haus rau lub cuabyig los tsis txaus. Cov ntseeg Yexus ua neej raws li Vajtswv Txojlus qhia, yeej yuav ntsib kev txomnyem, sim siab vim kev ua neej txawv li tej neeg ntiajteb ua, tiamsis qhov ntawd yuav coj mus tau kev kaj siab, koob hmoov thiab vammeej uas tus Tswv pub. Thov Vajtswv pub kom peb ruaj siab taug nraim mus tas tus Tswv txojkev ntawd.
Thov Vajtswv,
Vajtswv, nyuam yaus ua Koj tsaug, Koj Txojlus qhia nyuam yaus paub ua neeg ntse. Thov pub kom nyuam yaus tsevneeg siv lub sijhawm los xyaum tus kheej, ua neej dawbhuv kom tagnrho tsevneeg ua rau Koj tau ntsejmuag. Tuav Tswv Yexus lub npe thov, Amees.
Peb puas thov tus Tswv pub kev txawj ntse kom peb paub qaij deb tej uas neeg ntiajteb ua?
Nyeem Vajluskub hauv peb lub xyoo: I Vajntxwv 19
Kênh Youtube BHKTHN:
