Klei Aê Diê Blŭ: Klei Bi Hriêng 27:17-18
Êlan kliăng: “Msei asah mgoh msei, msĕ snăn mơh sa čô mnuih mjuăt mnuih mkăn. Hlei pô kiă ana boh hra srăng ƀơ̆ng boh gơ̆, leh anăn hlei pô mgang khua ñu srăng mâo klei mpŭ”(Klei Bi Hriêng 27:17-18)
Klei Êmuh ksiêm mĭn: Si mblang kơ msei asah mgoh msei? Ya boh tŭ kơ klei sĭt suôr hlăm bruă knuă? Si drei mă yua klei hriăm anei kơ pô?
Hlăm hdră êlan klei đăo, mâo wưng drei ƀuh pô msĕ si sa mta kdrăp mnơ̆ng yua băl leh, ăt dôk gĭr bi leh bruă klam ƀiădah kƀah klei ƀơ̆ng mta. Drei êpa mhao sa klei hdĭp tŭ dưn, yuôm bhăn leh anăn bi guh kơang Aê Diê, ƀiădah msĕ si dôk wir wir hŏng klei amâo tŭ dưn ôh. Dua êlan Klei Bi Hriêng anei lač kơ sa hdră klă mngač čiăng tlaih kơ klei anei mơ̆ng bruă mâo sa bruă hlăm dua kdrêč: klei asah mgoh hlăm êpul êya leh anăn ai tiê kriê dlăng sĭt suôr.
Boh blŭ “Msei asah mgoh msei” (êlan 17) mñă kơ hnơ̆ng yuôm bhăn mơ̆ng dŭm klei bi mguôp hlăm klei hdĭp. Drei amâo dưi hdĭp leh anăn hriê kơ prŏng hjăn păn ôh, ƀiădah mơ̆ng klei bi blŭ hrăm hŏng pô mkăn, snăn kơh drei hriê kơ prŏng kluôm dhuôm. Msei dưi sah mgoh srăng jing ƀơ̆ng leh anăn tŭ dưn. Hlăm klei hdĭp mngăt leh anăn drei pô, klei bi tuôm, klei lông dlăng, klei mđĭ ai leh anăn klei mguôp klei blŭ mơ̆ng ƀĭng găp, ayŏng amai adei hlăm klei đăo srăng đru drei hriê kơ prŏng ktang. Dŭm klei bi mguôp đru sah mgoh hdơ̆ng pô hlăm klei khăp čiăng hrăm mbĭt jing mnuih jăk leh anăn hriê kơ prŏng hĭn.
Êlan 18 lŏ čih: “Hlei pô kiă ana boh hra srăng ƀơ̆ng boh gơ̆, leh anăn hlei pô mgang khua ñu srăng mâo klei mpŭ”, mđĭ ai sĭt suôr leh anăn klei gĭr hlăm djăp bruă klam Aê Diê jao. Pô gĭr kriê dlăng ana hra srăng dưi dưn boh tŭ dưn. Hlăm bruă knuă, gŏ sang, amâodah klei mă bruă kơ Aê Diê, ai tiê sĭt suôr leh anăn jih ai tiê wăt hlăm dŭm bruă điêt dhiêt dưn srăng ba klei jăk mơak. Klei anei mtô drei amâo djŏ knŏng mđing kơ boh tŭ prŏng prĭn ôh, ƀiădah lŏ čiăng klei mđing kriê dlăng leh anăn sĭt suôr hŏng bruă điêt grăp hruê. Kyua mơ̆ng klei sĭt suôr, Aê Diê srăng ngă kơ bruă drei jing yuôm bhăn leh anăn ba klei jăk mơak.
Klei hriăm mñă drei brei pral mkŏ hŏng phung dưi đru drei hriê kơ prŏng hlăm klei đăo leh anăn klei hdĭp. Năng ai jing êpul hriăm Klei Aê Diê Blŭ, pô đru kčĕ kơ klei hdĭp mngăt amâodah ƀĭng găp hrăm mbĭt đăo knang. Phung anei srăng hrăm mbĭt kah mbha, mđĭ ai leh anăn amâo huĭ mguôp klei blŭ kñăm đru kơ drei mlih mrâo leh anăn hriê kơ prŏng. Êngao anăn, ăt brei pral sah mgoh, đru, hưn klei đăo leh anăn mđĭ ai ayŏng amai adei riêng gah. Brei drei sĭt suôr nanao hlăm djăp bruă klam điêt: bruă knuă, gŏ sang, klei mă bruă, amâodah ya bruă Aê Diê jao, brei myơr asei mlei leh anăn ngă jih ai tiê (Y-Mathiơ 25:21). Wăt tơdah dŭm bruă amâo prŏng ôh, ƀiădah tơdah gĭr leh anăn sĭt suôr, Khua Yang srăng brei klei hơêč hmưi leh anăn ba klei tŭ dưn sui kơ drei hŏng phung riêng gah.
Ya klei brei drei bi mlih čiăng mâo klei hdĭp tŭ dưn hĭn kơ Khua Yang?
Wah lač: Ơ Ama hlăm adiê, bi mni kơ Ih kyua klei thâo mĭn hlăm Klei Ih Blŭ. Akâo kơ Ih đru kâo mă tŭ leh anăn bi mlih ya klei amâo jăk hlăm klei hdĭp leh anăn ăt thâo mguôp klei blŭ sĭt suôr kơ ayŏng amai adei kâo. Akâo kơ Ih đru kâo sĭt suôr hlăm djăp bruă Aê Diê jao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: H’Êsther 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
