Klei Aê Diê Blŭ: Y-Mathiơ 25:14-30
Êlan kliăng: “Leh anăn hwiê hĕ dĭng buăl amâo yuôm anăn hlăm anôk mmăt ti tač; tinăn srăng mâo klei čŏk hia leh anăn klei kriêt êgei” (Y-Mathiơ 25:30)
Klei êmuh ksiêm mĭn: Hlei pô jing dĭng buăl ƀai leh anăn alah? Ya ngă khua ngêñ leh anăn bi kmhal pô anei? Ya klei bi hriăm drei mâo kơ knuih drei mă bruă kơ Khua Yang?
Dĭng buăl pia jing “dĭng buăl ƀai leh anăn alah” kyuadah dĭng buăl anăn mă sa talăng khua ñu jao leh nao dơr mdăp hlăm lăn (êlan 18). Tơdah khua wĭt leh anăn iêo phung dĭng buăl ñu leh anăn brei digơ̆ tĭng, snăn dĭng buăl anei ba sa talăng ñu dơr mdăp leh hlăm lăn lŏ bi wĭt hŏng klei blŭ mgang kơ ñu pô. Tơdah hmư̆ klei anăn khua ngêñ leh anăn lač: “Ơ dĭng buăl ƀai leh anăn alah!” (êlan 26).
Dĭng buăl anei amâo mâo ƀơ̆ng mnga ôh, kăn bi luč rei prăk khua ñu, ƀiădah khua ngêñ kơ ñu kyua dŭm mta snei: Tal sa, ñu jing mnuih knŏng mĭn kơ ñu pô, jing dĭng buăl kơ khua ñu ƀiădah duah klei dôk hơĭt ênang, amâo mă bruă hŏng jih ai tiê ôh. Tal dua, ñu ăt thâo mơh kơ khua srăng lŏ wĭt ƀiădah ñu dlăng hơăi mang kơ klei mtă leh anăn klei khua ñu čiăng, dĭng buăl mă tŭ êma talăng leh anăn dua talăng nao čhĭ mnia ƀơ̆ng mnga, bi ñu amâo uêñ ôh ya klei khua ñu čiăng, dôk hơăi mang dŭm hruê khua ñu êkŭt. Tal tlâo, ñu jing mnuih alah, kyua klei alah kyuanăn ñu amâo čiăng mă bruă mâo mnga kơ khua nu ôh, leh anăn čiăng mgang klei alah pô, hŏng klei khăng kŏ ñu klư jih bruă klam kơ khua ñu, kčŭt kơ khua ñu jing mnuih khăng leh anăn khăp kơ prăk (êlan 24-25)!
Khua bi êdah leh klei ƀai leh anăn alah dĭng buăl anei (êlan 26-27), tơdah ñu thâo sĭt kơ knuih khua ñu msĕ snăn, sĭt nik ñu ba leh talăng ñu jao kơ mnuih mnia prăk čiăng mă mnga. Klei bi kmhal kơ dĭng buăl anei jing luč klei mưn, khua yap ñu jing mnuih amâo yuôm ôh (êlan 28-30), leh anăn srăng dôk hlăm klei hêñ, klei knap mñai hlŏng lar kyuadah amâo lŏ mâo mmông myun pioh kơ ñu kmhal kơ klei soh ôh.
Hlăm Phung Sang Aê Diê hruê anei mâo lu mơh mnuih dôk mdăp talăng diñu. Diñu amâo thâo kral ôh klei yuôm bhăn hlăm klei Aê Diê yua brei mă bruă hlăm sang Ñu. Diñu yap klei mă bruă jing klei luč kơ diñu kyuanăn diñu duah klei dưi dôk hơăi mang leh anăn blŭ mgang klei alah diñu hlăm klei mă bruă kơ Khua Yang. Hdơr bĕ đăm wơr ôh, Khua Yang Yêsu srăng lŏ hriê leh anăn tĭng nư hŏng grăp čô drei jing phung dĭng buăl Ñu, leh anăn hlei dĭng buăl alah, amâo sĭt suôr ôh srăng tŭ klei bi kmhal ktrŏ snăk mơ̆ng Khua Yang. Aê Diê jing Pô thâo jih jang mnơ̆ng, Ñu thâo jih jang bruă drei ngă, kyuanăn amâo mâo sa klei dưi tŭ ôh kơ klei drei alah leh anăn amâo mâo uêñ kơ jih jang bruă klam prŏng Khua Yang jao leh. Akâo Khua Yang đru drei bi mlih hĕ mtam knuih drei mă bruă kơ Ñu leh anăn yua jih ya klei brei Khua Yang brei hlăm jih jang bruă Ñu jao leh kơ drei.
Drei dôk ƀơ̆ng mnga kơ Khua Yang hĕ amâodah drei dôk dơr mdăp hĕ talăng Khua Yang jao?
Wah lač: Ơ Khua Yang, bi mni kơ Ih kyuadah Ih lŏ bi êrâo kâo čiăng kơ kâo amâo alah ôh hlăm klei mă bruă kơ Ih. Đru kâo thâo bi mni kơ Ih kyua jih klei brei Ih brei leh kơ kâo pioh yua mâo boh tŭ dưn kơ Ƀuôn Ala Mtao Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Êsther 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
