Klei Aê Diê Blŭ: Klei Mtô Mñă Klei Bhiăn 32:1-6
Êlan Kliăng: “Msĕ snăn hĕ diih bi wĭt kơ Yêhôwa, Ơ phung ƀuôn sang mluk leh anăn amâo mâo klei thâo mĭn ôh?Amâo djŏ ñu hĕ jing ama ih, pô hrih, pô mjing leh anăn bi kjăp ih leh?” (Klei Mtô Mñă Klei Bhiăn 32:6)
Klei êmuh ksiêm mĭn: Ya jing boh phŭn leh anăn klei kñăm hlăm năm êlan tal êlâo hlăm klei mmuñ anei? Si Pô Aê Diê jing hlăm klei Y‑Môis mpŭ mni? Ya klei hriăm drei mâo mơ̆ng klei amâo tŭ jing hlăm klei hdĭp mngăt phung nao êlâo?
Drei thâo leh phung ƀuôn sang Israel êlâo kơ mŭt plah mmiă krĭng Lăn Aê Diê Ƀuăn, diñu ƀuăn rơ̆ng leh srăng hlue ngă klei bi mguôp plah wah Aê Diê leh anăn phung ƀuôn sang Israel mkŏ mjing leh êlâo anăn. Snăn tơdah phung ƀuôn sang Israel ngă soh hŏng dŭm mta hlăm klei bi mguôp, srăng mâo sa mta hră mơar čih mkra kñăm lač kơ klei soh anăn. Klei Y‑Môis mmuñ jing hră čih kơ klei soh phung ƀuôn sang Israel bi kdơ̆ng hŏng Aê Diê.
Klei čih hlăm hdruôm hră Klei Mtô Mñă Klei Bhiăn ênuk anăn hmăi mơ̆ng klei čih krĭng Ngŏ, kyuanăn hlăm klei čih lač kơ klei soh brei mâo phung hưn bi sĭt. Anăn jing mta phŭn Y‑Môis iêô dŭm tal adiê leh anăn lăn ala brei mđing hmư̆ leh anăn hưn bi sĭt ti anăp klei soh phung ƀuôn sang Israel. Y‑Môis čhal lač phung ƀuôn sang bi kdơ̆ng hŏng Aê Diê, Pô jing Ama, jing Pô bi tui, jing Pô hrih mjing leh anăn mkŏ mjing diñu jing sa djuê ana (êlan 6). Klei soh phung ƀuôn sang ngă klei jhat kjham snăk tơl Y‑Môis hngah diñu jing anak Aê Diê. Si ngă sa Aê Diê kpă ênô leh anăn doh jăk djŏ tuôm hĕ hŏng “phung găp djuê soh leh anăn wê” anei! (êlan 5). Klei Y‑Môis hngah anei čiăng bi mklă knuih Aê Diê amâo srăng bi mlih ôh, knŏng phung ƀuôn sang Israel jing pô bi mlih leh ai tiê leh dưn leh klei jăk mơak Aê Diê brei kơ diñu.
Phung lăn ala khăng lač “jăk hưn, jhat mdăp”. Ƀiădah năng ai dưi lač klei mmuñ anei msĕ si klei čhŏ hlăm klei hdĭp mngăt phung ƀuôn sang Israel ƀiădah amâo dưi bi hgăm amâodah mdăp hĕ kriêp ôh. Hlăm anăn mâo klei soh Y‑Môis čih čiăng mtô kơ phung ƀuôn sang leh anăn wăt kơ ênuk êdei, hŏng klei kñăm krơ̆ng bruă klam mtô bi hriăm, leh anăn mñă klei Aê Diê hưn brei dŭm ênuk lŏ čuê thâo răng. Dŭm klei amâo tŭ jing hlăm klei hdĭp mngăt wăt tơdah jing klei bi knal bŏ hŏng ênguôt hnĭng, ƀiădah tơdah lač klă snăn mơ̆ng anăn yơh phung đăo srăng mă klei thâo čiăng hriê kơ prŏng, ƀuh klei kƀah pô leh anăn ƀuh klei Aê Diê pap prŏng hĭn. Êngao anăn, tơdah thâo kơ klei amâo tŭ jing hlăm mngăt phung nao êlâo amâo djŏ jing čiăng kơ drei mưč amâodah phat kđi ôh, ƀiădah srăng jing klei mtô jăk siam kơ grăp čô drei yua čiăng mtô kơ phung bi hmô jăk ăt msĕ mơh klei hmô amâo jăk kơ anak čô pô, leh anăn ăt čiăng mñă kơ phung ƀuôn sang Aê Diê hlăm Sang Aê Diê ñĕ kơ klei amâo tŭ jing hlăm klei hdĭp mngăt phung nao êlâo.
Si drei khăng ngă hŏng klei hriăm kơ klei amâo tŭ jing hlăm klei hdĭp mngăt?
Wah lač: Ơ Khua Yang, jing Aê Diê kpă ênô leh anăn doh jăk. Akâo kơ Ih bi hriăm kâo hdĭp sĭt suôr hŏng Khua Yang, leh anăn đru kâo hriê kơ prŏng hĭn hlăm klei phung mkăn bi hmô amâo tŭ jing hlăm mngăt. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
