II Kevcai 32:1-6
Nqe cim:
“Cov neeg ruam thiab tsis txawj xav, puas tsimnyog nej ua li no rau tus Tswv? Nws tsis yog nej Txiv, nws tsis yog tus tsim nej, thiab nws tsis yog tus uas ua rau nej ciaj ua ib haivneeg los?” (II Kevcai 32:6)
Lus nug rau sawvdaws xav:
– Tej ntsiab lus thiab homphiaj ntawm nqe thawj hauv zaj nkauj no yog dabtsi?
– Mauxes qhuas Vajtswv yog tus zoo li cas?
– Peb kawm tau dabtsi los ntawm qhov uas ua tsis tau sab ntsujplig ntawm cov neeg mus ua ntej?
Peb twb paub tias cov neeg Yixalayees mus txeeb lub tebchaws Vajtswv coglus tseg, lawv tau coglus yuav ua raws li Vajtswv tej lus qhia. Yog li thaum cov neeg Yixalayees ua txhaum tej lus cog tseg ntawd, yuav muaj ib co lus sau tawm los rau txim cov kev txhaum ntawd. Zaj nkauj uas Mauxes sau no yog cov lus rau txim thaum cov Yixalayees ntxeev siab tawmtsam tus Tswv.
Kab ke sau ntawv hauv phau II Kevcai, lub sijhawm ntawd yog sau raws li cov neeg uas nyob sab nruab nrab ntiajteb sau, raws li cov lus hais plaub ntug yuav tsum muaj timkhawv ntawm ob tog neeg. Nov yog qhov vimchiv Mauxes hais kom lub ntuj lub ntiajteb ua timkhawv rau cov Yixalayees tej kev txhaum. Mauxes hais tias cov pejxeem tau tawmtsam Vajtswv, tus uas yog Leej Txiv, yog tus Cawmseej, thiab yog tus uas tsim lub ntuj lub ntiajteb, tus uas xaiv haivneeg Yixalayees (nqe 6). Cov pejxeem tej kev txhaum loj mus txog qib uas Mauxes tsis suav lawv ua Vajtswv haivneeg. Tus Vajtswv uas ncaj ncees thiab dawbhuv yeej tsis koom nrog cov neeg “siab phem siab qias thiab siab nkhaus” no lawm (nqe 5 Phau txhais tshiab). Qhov uas Mauxes tsis lees yuav lawv no qhia paub Vajtswv tus yamntxwv yeej tsis hloov, tsuas yog cov Yixalayees thiaj hloov siab thaum Vajtswv pub rau lawv tau zoo noj tau zoo nyob xwb.
Tej neeg tsis ntseeg pheej hais tias “zoo khav, phem thuam”. Tiamsis zaj nkauj uas Mauxes sau no nthuav tawm cov Yixalayees tej kev txhaum uas lawv ua. Cov kev txhaum uas Mauxes sau, yog sau los qhia rau cov pejxeem thiab tej xeebntxwv tom qab, kom lawv niaj hnub muaj tej lus no los qhia thiab ua cov lus ntuas tej menyuam ib tiam dhau ib tiam. Tej kev ua tsis tau zoo sab ntsujplig no, txawm yog mob siab los yuav tau muab hais tawm, ua li ntawd cov ntseeg yuav kawm xyaum kom loj hlob ntxiv, ntsia pom tus kheej thiab zeem paub Vajtswv txojkev hlub loj kawg nkaus. Dua li ntawd, yog tej uas cov neeg xubthawj ntsib ua tsis tau zoo, tsis yog muab hais rau peb thuam thiab rau txim, tiamsis yog cov lus qhia kom peb ua tau zoo, thiab kuj yog qhia rau Vajtswv haivneeg hauv Pawg Ntseeg kom tsis txhob ua tej yam tsis zoo uas cov neeg ua ntej twb ua.
Thov Vajtswv,
Tus Tswv, uas yog Vajtswv ncaj ncees thiab dawbhuv. Thov Koj qhia kom nyuam yaus paub ua neeg ncaj ncees rau Koj, thiab pab kom nyuam yaus pom tej qauv tsis zoo, qaij deb thiab ua zoo mus. Nyuam yaus tuav Tswv Yexus lub npe thov, Amees.
Peb pheej ntsib raug tej zaj kawm ua tsis tau ntawm sab ntsujplig li cas?
Nyeem Vajluskub hauv peb lub xyoo: I Xamuyees 27
Kênh Youtube BHKTHN:
