Klei Aê Diê Blŭ: Klei Bi Hriêng 23:26-28
Êlan kliăng: “Ơ anak êkei kâo, jao bĕ ai tiê ih kơ kâo, leh anăn brei ală ih djă pioh êlan kâo” (Klei Bi Hriêng 23:26)
Klei êmuh ksiêm mĭn: Si Mtao Salômôn mtô anak? Mă tŭ leh anăn yua klei thâo mĭn ya boh tŭ dưn mâo? Si drei srăng hdĭp čiăng bi mơak kơ amĭ ama leh anăn bi guh kơang kơ Khua Yang?
Mtao Salômôn mtă kơ anak gưt asăp ñu hŏng jih ai tiê, kyuadah Ñu mtô Klei Aê Diê Blŭ kơ anak, kyuanăn êlan ñu bi hriăm anak jing êlan doh jăk Aê Diê. Lŏ čuê, Mtao Salômôn yua klei bi hriêng čiăng brei anak ƀuh klei huĭ hyưt mơ̆ng mniê êgar amâodah mniê knhông jing ƀăng êlam klei soh čiăng anak weh đuĕ mơ̆ng klei mplư diñu. Đăm brei “ală anak” kyua khăp kơ klei siam phung mniê knhông snăn lĕ hlăm klei diñu bi tluh leh anăn đuôm hŏng diñu.
“Mniê knhông jing kbăng kniă” (êlan 27). Sa kbăng êa jăk mâo akŏ êa jăk dưi bi hrăp klei mhao. Kbăng êa ăt jing klei bi hmô kơ klei hơ̆k mơak hlăm klei bi dôk ung mô̆ mơh, mnăm êa hlăm kbăng ih pô čiăng lač duah bĕ klei hơ̆k mơak hlăm mô̆ ih pô (Klei Bi Hriêng 5:15). Ƀiădah jih jang phung mniê knhông ñu bi msĕ hŏng ƀăng êlam amâodah kbăng kniă, amâo mâo êa êngeh dưi bi hrăp klei mhao ôh. Êgao hĭn kơ anăn, sa čô lĕ hlăm ƀăng êlam amâodah hlăm kbăng kniă dleh snăk dưi mơ̆ng klei dleh dlan, mơ̆ng anôk thu. Rup ƀăng êlam bi hmô kơ mniê knhông jing klei huĭ hyưt djiê mnuih, kbăng kniă bi hmô kơ mniê knhông anăn jing msĕ si sa hnoh êa kbiă klei luč klei čang hmăng, sa čô lĕ hlăm kbăng êa kniă dleh snăk lŏ dưi kbiă đuĕ. Mniê knhông khăng yua klei siam mplư anak, tơdah kyua tluh kơ klei siam anak lĕ hlăm klei mplư, snăn anak srăng jing sa čô amâo dôk sĭt suôr hŏng mô̆ anak, hŏng mnuih ôh, leh anăn ngă soh hŏng Aê Diê, mơ̆ng anăn klei hdĭp anak nao kơ anôk mmăt, amâo lŏ mâo klei jăk jĭn ôh.
Hruê anei, mâo lu phung hlăk ai lĕ hlăm klei mplư klei êkei mniê, sa kdrêč jing kyua mâo lu đei mnuih bi êdah klă klei amâo dlăng yuôm ôh kơ klei dôk sĭt suôr hdơ̆ng ung mô̆, sa kdrêč jing kyua klei mplư hŏng klei hgăm mơ̆ng phung mniê knhông leh anăn klei bi lar kơ klei mĭn dlăng hơăi mang kơ klei bi dôk ung mô̆ hlăm lu hdră mđung klei mrâo. Klei Aê Diê Blŭ lač: “Brei jih jang mnuih mpŭ kơ klei bi dôk ung mô̆, đăm bi čhŏ jhưng pĭt diih ôh, kyuadah Aê Diê srăng phat kđi phung knhông leh anăn phung tlĕ piu” (Hêbrơ 13:4).Tơdah ung hŏng mô̆ mbĭt mđrăm myơr ai tiê pô kơ Khua Yang, êbat mbĭt hlăm êlan Khua Yang, snăn diñu srăng dưi mă tŭ klei hơ̆k mơak, klei jăk jĭn hlăm klei bi dôk ung mô̆. Ƀiădah, tơdah ngă leh klei soh tlĕ piu, phung đăo srăng bi luč jih klei yuôm bhăn diñu, klei anăn atăt truh kơ klei ênguôt, klei bi lui ung mô̆ leh anăn bi rai gŏ sang. Akâo Yang Mngăt Jăk ƀuah leh anăn bi hriăm grăp čô phung đăo weh đuĕ mơ̆ng klei soh, boh nik nak klei soh tlĕ piu, hur har wah lač, myơr ai tiê kơ Khua Yang, akâo Khua Yang đru phung hlăk ai thâo gưt asăp kơ amĭ ama, aduôn aê, tui hlue êlan Khua Yang, čiăng dưi mă tŭ klei êđăp ênang, klei hơ̆k mơak hlăm klei hdĭp leh anăn hlăm klei bi dôk ung mô̆.
Si ngă drei myơr leh ai tiê kơ Khua Yang leh anăn weh đuĕ leh mơ̆ mơ̆ng klei mplư klei soh?
Wah lač: Ơ Khua Yang, kâo lač jăk kơ Ih kyuadah Ih brei leh kơ kâo mâo amĭ ama, bi hriăm Klei Ih Blŭ kơ kâo. Akâo Yang Mngăt Jăk bi hriăm kâo duah Ih hŏng jih ai tiê, weh đuĕ kbưi mơ̆ng klei mplư klei êkei mniê hlăm klei hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
