Pajlug 23:26-28
Nqe cim:
“Metub, ua tib zoo mloog kuv tej lus thiab xyaum ua raws li kuv lub neej.” (Pajlug 23:26).
Lus nug rau sawvdaws xav:
– Vajntxwv Xalumoos ntuas cov menyuam zoo li cas?
– Txais yuav thiab ua raws li kev txawj ntse tau yam dabtsi?
– Peb yuav tau ua lub neej li cas kom niamtxiv zoo siab thiab ua rau Vajtswv tau ntsejmuag?
Vajntxwv Xalumoos ntuas cov menyuam yuav tsum ua tib zoo mloog vim nws tabtom qhia Vajtswv Txojlus rau lawv, tej lus uas nws qhia yog tus Tswv txojkev. Txuas ntxiv, Vajntxwv Xalumoos kuj siv lus pivtxwv los hais txog qhov txaus ntshai ntawm cov niamntiav thiab cov pojniam uas deev hluas, lawv yog lub qhov kev txhaum yuav tsum txav deb. Tsis txhob muaj lub siab ntshaw cov niamntiav ntawd qhov kev zoo nkauj, khi tau yus.
“Tus poj muag cev yog lub qhov tob” (nqe 27 Phau Txhais Tshiab). Lub qhov dej zoo txhawv cov dej qab, ua rau tus nqhis dej txaus siab. Lub qhov dej kuj piv txog kev txaus siab, zoo siab hauv kev txijnkawm; haus koj lub qhov dej txhais tau hais tias nrhiav kev ua kom koj tus pojniam zoo siab, txaus siab (Pajlug 5:15). Tiamsis cov niamntiav tau muab piv zoo li ib lub qhov tob tob lossis lub qhov dej nqaim, tsis txhawv cov dej ntshiab si uas yuav daws tau kev nqhis . Dua li ntawd, ib tug neeg poob rau hauv lub qhov tob lossis lub qhov dej nqaim ces yuav tsis yoojyim tawm tau los. Tus duab lub qhov tob hais txog cov niamntiav yog qhov uas txaus ntshai ua rau tuag neeg, thiab lub qhov dej nqaim hais txog cov niamntiav ntawd zoo li tus dej ntws ua rau poob siab, tus neeg uas poob rau hauv lub qhov dej nqaim tsis yoojyim tawm tau los. Cov niamntiav pheej muab txojkev zoo nkauj los ntxias, tiamsis koj tsis txhob ntshaw qhov zoo ntawd nyob tsam poob rau lub vojhlua, ces koj yuav ua tsis ncaj rau koj tus pojniam, lwm tus thiab ua txhaum rau Vajtswv, thaum poob kev txhaum lawm ces yuav ua neej tsaus ntuj nti, tsis muaj kev kaj siab.
Nimno muaj ntau tus hluas poob rau lub vojhlua kev nkauj kev nraug ntxias tau, ib feem twg yog vim coob leej saib qhov uas ncaj ncees ntawm kev txijnkawm tsis muaj nqis, ib feem twg yog vim txojkev ntxeev ntxias ntawm cov niamntiav thiab tej suab lus hais saum huab cua saib kev txijnkawm tsis tseemceeb. Vajtswv Txojlus qhia: “Txojkev sib yuav yog ib qho uas tseemceeb, tsimnyog nej txhua tus yuav tsum saib taus qhov ntawd. Tus txiv thiab tus niam, ib tug yuav tsum ncaj ncees rau ib tug, rau qhov Vajtswv yuav rau txim rau cov neeg uas ua txhaum kev nkauj kev nraug thiab rau cov neeg uas dev luag pojniam luag txiv.” (Henplais 13:4). Thaum ob niamtxiv koom fij lub siab rau Vajtswv, koom taug tus Tswv txojkev ces nkawd yuav tau txais kev zoo siab, kaj siab hauv lub neej txijnkawm. Hais thaub, thaum ua txhaum kev nkauj kev nraug, qhov muaj nqis ntawm tus ntseeg Yexus yuav poob mus, ua rau muaj kev nyuaj siab, ua rau txijnkawm thiab cuabyig puas. Thov Vaj Ntsujplig qhia, ntuas Vajtswv cov menyuam txhua tus kom paub qaij deb kev txhaum, tshwjxeeb yog kev txhaum nkauj nraug, rau siab ntso thov Vajtswv, muab lub siab fij rau Vajtswv. Thov Vajtswv pab cov hluas kom paub mloog niamtxiv lus, taug tus Tswv txojkev, kom tau txais kev kaj siab, zoo siab hauv kev ua neej thiab lub neej txijnkawm.
Thov Vajtswv,
Vajtswv, nyuam yaus ua Koj tsaug qhov uas Koj pub rau nyuam yaus muaj niam muaj txiv, muaj Vajtswv Txojlus qhia. Thov Vaj Ntsujplig qhia kom nyuam yaus rau siab ntso nrhiav tus Tswv, qaij deb tej kev ntxias nkauj nraug hauv lub neej. Nyuam yaus tuav Tswv Yexus lub npe thov, Amees.
Peb puas tau muab yus lub siab fij rau Vajtswv thiab qaij deb tej kev ntxias ua txhaum lawm tau?
Nyeem Vajluskub hauv peb lub xyoo: II Vajntxwv 6
Kênh Youtube BHKTHN:
