Pajlug 21:13; Mathais 18:23-35
Nqe cim:
“Yog koj ntsaws qhovntsej tsis kam mloog cov neeg txomnyem lub suab quaj thov, thaum koj quaj thov luag pab yuav tsis muaj leejtwg hnov”( Pajlug 21: 13)
Lus nug rau sawvdaws xav:
– Tus uas ntsaws qhovntsej tsis kam mloog cov neeg txomnyem lub suab quaj nws ua neej txhaum rau seem twg li?
– Nws yuav tau txais nuj nqis dab tsi?
– Vim li cas ib tus ntseeg yuavtsum muaj lub siab hlub tshua txog lwm tus?
Lolus “ntsaws qhovntsej” lossis “pos qhovntsej” yog hais txog tus cwjpwm uas tsab tsis paub, txhob txwm tsab tsis hnov. Ntawd yog ntsaws qhovntsej tsis kam mloog cov neeg txomnyem lub suab quaj thov. Cov neeg txomnyem tej thaum yog cov uas tsis muaj zaub mov noj, lossis yog cov uas raug qhuab yuam, caij tsuj, tsimtxom, ua neej txomnyem ntsuav. Los ntawm seem kev ncaj ncees, lub siab hlub tshua yog qhia tshwm tus cwjpwm ntawm tus neeg ncaj ncees. Hauv txoj kev ua neej yeej tsis muaj ib tus twg uas tsis tshuav lwm tus li nqi kev hlub li. Yog tau lwm tus hlub dua lawm tiamsis tseem ntsaws qhovntsej thaum uas muaj lwm tus thov kev pab mas yog ua neej tsis ncaj ncees. Los ntawm seem uas cog dab tsi sau yam ntawd ces “koj ntsaws qhovntsej tsis kam mloog cov neeg txomnyem lub suab quaj thov, thaum koj quaj thov luag pab yuav tsis muaj leejtwg hnov” (nqe 13). Ua neej tsis quav ntsej leejtwg, thaum ntsib kev txomnyem cas tseem xav kom muaj neeg hlub tshua yus?
Los ntawm sab ntsujplig, hlub tshua cov neeg txomnyem kuj yog hlub Vajtswv. Vajtswv tus uas muaj kev hlub thiab ncaj ncees yuav foom koob hmoov rau tus uas muaj lub siab hlub tshua thiab Nws yuav tsis txais yuav tus neeg uas tsis muaj kev hlub tej lus taij thov. Vajtswv Txojlus hais tias: “Thaum koj muab rau tus pluag yog koj qiv rau tus Tswv ntag, ces tus Tswv yuav them rov rau koj” (Pajlug 19:17). Heev tshaj qhov ntawd, hlub tshua lwm tus yog qhia tshwm lub siab paub ua Vajtswv tsaug vim paub hais tias txhua yam yus muaj yog Vajtswv pub xwb. Tau Vajtswv hlub tshua lawm peb kuj yuavtsum hlub tshua cov neeg txomnyem li Vajtswv Txojlus qhia hais tias: “Nej yuav tsum muaj lub siab hlub ib yam li nej Leej Txiv tus uas muaj lub siab hlub” (Lukas 6:36).
Tswv Yexus qhia cov thwjtim txog kev zam txim thiab lub siab hlub tshua hauv Mathais 18:23-35, muaj ib tus tub txib tau vajntxwv zam nws tej nuj nqis ntau heev, tiamsis nws ho tsis zam rau nws ib tus phoojywg uas tshuav nws nqi me me. Vim li ntawd, vajntxwv thiaj hais rau tus tshuav nws nqi hais tias: “Tus tubtxib uas siab phem! Kuv twb zam tej nujnqis uas koj tshuav kuv huv tibsi rau koj lawm, vim koj thov kuv. Tsimnyog koj yuav tsum hlub tus tubtxib uas yog koj tib pab, ib yam li kuv twb hlub koj lawm”. nws txawm samhwm kom luag muab tus tubtxib uas tsis muaj lub siab hlub tshua ntawd ntes coj mus kaw lawm.
Peb hlub tshua ib tus neeg txomnyem, txawm yog nws pauj tsis tau dab tsi rau peb los dhau tej haujlwm zoo no coob tus yuav pom peb lub siab hlub tshua, luag yuav pab peb thaum muaj kev cheemtsum thiab. Tiamsis qhov uas tseemceeb dua huv tibsi yog tus Tswv paub thiab Nws yuav hlub tshua tus uas muaj lub siab hlub tshua. Peb twb tau tus Tswv Yexus hlub tshua tuag saum ntoo khaublig txhiv peb lub txim lawm mas peb yuavtsum tau hlub tshua cov neeg txomnyem ib yam li ntawd thiab.
Thov Vajtswv,
Vajtswv, nyuam yaus ua Koj tsaug vim hlub tshua Koj tuag theej nyuam yaus lub txim. Thov pab nyuam yaus paub qhia tshwm Vajtswv kev hlub mus rau lwm tus los ntawm txoj kev hlub tshua, pab lawv txhua yam cheemtsum sab nqaij tawv, thiab coj lawv los ntseeg paub Vajtswv. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas tig mus mloog cov neeg txomnyem ibncig ntawm peb tej suab quaj thov pab lawm tau?
Nyeem Vajluskub hauv peb lub xyoos: Mathais 8
Kênh Youtube BHKTHN:
