Klei Aê Diê Blŭ: Klei Bi Hriêng 21:13; Y-Mathiơ 18:23-35
Êlan kliăng: “Hlei pô kăt ƀăng knga kơ klei mnuih ƀun ƀin ur, ñu pô srăng ur krao leh anăn arăng amâo srăng hmư̆ ñu ôh” (Klei Bi Hriêng 21:13)
Klei êmuh ksiêm mĭn: Tĭng anôk soh pô kăt ƀăng knga kơ klei mnuih ƀun ƀin ur? Ya boh jhat diñu srăng mă tŭ? Ya ngă brei phung đăo kơ Krist thâo pap kơ pô mkăn?
Boh pia “kăt ƀăng knga” čiăng lač kơ klei ngă ngơi, čŏng čiăng ngă klei amâo hmư̆. Tinei čiăng lač kơ klei kăt ƀăng knga kơ mnuih ƀun ƀin ur akâo klei đru. Tăp năng digơ̆ jing phung kƀah mnơ̆ng sĭt, jing phung arăng ktư̆ juă, dleh knap êgao hnơ̆ng hlăm klei knap mñai. Tĭng kơ klei kpă ênô, klei thâo pap bi êdah kơ knuih mnuih kpă ênô. Hlăm klei hdĭp, amâo mâo ôh sa čô mnuih amâo tuôm đuôm nư klei pap mnuih mkăn sa blư̆. Tơdah tuôm mă tŭ leh klei pap ƀiădah kăt hĕ ƀăng knga kơ klei mnuih mkăn ur, snăn anăn jing hdĭp hŏng klei amâo bi mtăp mđơr yơh. Tĭng kơ klei ya mjeh rah leh srăng wiă boh anăn – anăn jing: “Hlei pô kăt ƀăng knga kơ klei mnuih ƀun ƀin ur, ñu pô srăng ur krao leh anăn arăng amâo srăng hmư̆ ñu ôh” (Klei Bi Hriêng 21:13). Tơdah drei ngă klei amâo uêñ ôh kơ arăng, si dưi bi hmăng tơdah sa hruê drei pô tuôm hĕ hŏng klei knap mñai srăng mâo pô pap brei lĕ?
Tĭng kơ klei hdĭp myang, pap brei kơ mnuih ƀun ƀin ăt jing bruă ngă kơ Khua Yang mơh. Pô bŏ hŏng klei khăp leh anăn kpă ênô srăng brei klei pap kơ mnuih thâo pap, leh anăn Ñu hngah kơ klei phung amâo thâo pap kwưh akâo. Klei Aê Diê Blŭ lač: “Hlei pô brei pap kơ mnuih ƀun ƀin jing brei Yêhôwa čan, leh anăn Yêhôwa srăng lŏ bi wĭt kơ ñu tui si bruă jăk ñu ngă leh” (Klei Bi Hriêng 19:17). Êgao hĭn kơ anăn, pap brei kơ mnuih mkăn jing klei bi êdah kơ klei thâo hdơr knga kơ Khua Yang mơh, kyuadah drei thâo, jih jang mnơ̆ng drei mâo jing dŏ Khua Yang brei hŏng klei pap sơăi. Tơdah Khua Yang pap brei leh kơ drei, brei drei pap msĕ mơh kơ mnuih ƀun ƀin msĕ si Klei Khua Yang mtă: “Brei diih thâo pap msĕ si Ama diih thâo pap” (Y-Luk 6:36).
Khua Yang Yêsu mtô leh phung ƀĭng kna kơ klei pap brei leh anăn kơ klei thâo pap hlăm Y-Mathiơ 18:23-35, mơ̆ng rup sa čô dĭng buăl mtao bi êngiê leh nư ñu đuôm lu snăk, ƀiădah ñu amâo pap ôh kơ găp ñu đuôm nư ñu knŏng ƀiă dhit. Kyuanăn mtao lač leh kơ pô đuôm nư mtao snei: “Ơ dĭng buăl jhat ƀai, kâo bi êngiê leh jih nư ih kyuadah ih kwưh kơ kâo. Si ngă ih amâo pap kơ găp ih msĕ si kâo pap leh kơ ih?” Leh anăn mtao mtă brei arăng mă krư̆ hĕ pô amâo thâo pap anăn.
Tơdah đru mnuih ƀun ƀin, wăt tơdah drei amâo mâo mă tŭ mnơ̆ng lŏ wĭt lač jăk ôh kơ bruă ngă jăk anăn, ƀiădah mnuih mkăn srăng ƀuh klei drei thâo pap leh anăn srăng đru drei mmông drei čiăng. Ƀiădah klei yuôm hĭn jing Khua Yang ƀuh leh anăn Ñu pap brei nanao kơ mnuih thâo pap. Drei mă tŭ leh klei pap Khua Yang hŏng klei Ñu djiê ti kyâo bi kal hrô klei soh drei kyuanăn brei drei thâo pap kơ mnuih ƀun ƀin.
Drei dôk hmư̆ mơ̆ klei kwưh akâo leh anăn đru mơ̆ phung ƀun ƀin jŭm gah găn drei?
Wah lač: Ơ Khua Yang, kâo bi mni kơ Ih kyua klei khăp leh anăn klei pap Ih brei leh kơ kâo. Đru kâo bi êdah klei Ih khăp hŏng klei pap kơ mnuih ƀun ƀin, đru digơ̆ amâo djŏ knŏng hŏng mnơ̆ng dhơ̆ng ôh ƀiădah wăt hur har đru digơ̆ thâo kral leh anăn đăo kơ Ih msĕ mơh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Mathiơ 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
