Hlub Thiab Ua Neej – 3/8/2022

604

 

 

I-Yauhas 2:15-17

Nqe cim:

“Yog nej hlub lub ntiajteb lawm, nej yeej yuav tsis hlub Leej Txiv tus uas hlub nej” (I-Yauhas 2:15b).

 

Lus nug rau sawvdaws xav:

  • Timthawj Yauhas qhia peb txhob hlub dab tsi? Vim li cas?
  • Tej yam ntiajteb li yog dab tsi?
  • Tej yam yog ntiajteb li yuav xaus mus li cas?
  • Yam dab tsi thiaj yuav nyob mus ibtxhis?
  • Yuav ua cas thiaj hlub tau tus Tswv thiab ua lub neej raws li Nws siab nyiam txhua hnub, tsis qaug rau ntiajteb?

Timthawj Yauhas tau hu ua tus muaj “kev hlub”. Yauhas sau hais txog Vajtswv kev hlub, cov ntseeg Yexus kev hlub hauv nws tej tsab ntawv. Hauv ntu Vajluskub no, Yauhas ntuas Vajtswv tej me nyuam hais tias: “Nej tsis txhob hlub lub ntiajteb lossis cia siab rau ib yam dabtsi uas nyob hauv lub ntiajteb” (nqe 15a). Lo lus “ntiajteb” hais txog 7 zaug nyob hauv peb nqe Vajluskub no. Lo lus“Ntiajteb” hauv ntu Vajluskub no txawv lo lus “ntiajteb” hauv Yauhas 3:16. “Ntiajteb” hauv ntu Vajluskub no yog hais txog tej yam uas tawm tsam Vajtswv, tsis lees yuav tus Tswv. Tej yam ntawd yog kev ua neej qaug rau ntiajteb, ua raws li lub siab ntshaw tsis quav ntsej yam uas yuav nyob mus ibtxhis. Yog li ntawd, cov ntseeg Yexus tsis txhob “hlub lub ntiajteb” vim yog hlub lub ntiajteb ces yeej tsis hlub Vajtswv (nqe 15b).

Ntxiv mus, Timthawj Yauhas hais txog yam uas yog ntiajteb li, cov ntseeg yuav tsum ceevfaj thiab qaij deb. Yam ntawm yog: “tej uas neeg lub siab ntshaw” yam lub siab xav; “tej uas qhovmuag pom xav yuav” yog yam saib zoo nkauj uas nyiam; thiab “tej uas neeg qhuas hais tias yog yam uas tseemceeb” uas yog kev khavtheeb txog yam nyob ib pliag hauv ntiajteb. Yauhas qhia meej hais tias, tej ntawd yeej tsis yog Leej Txiv li tiamsis yog ntiajteb li (nqe 16). Tseeb tiag, txhua yam kev ntshaw uas xav kom txaus siab txaus ntsws, yam uas saib zoo nkauj raug muag, thiab tej koob meej uas tibneeg coj los sib khav puavleej yog tibneeg nrhawv tsim muaj. Thaum tibneeg sib tw nrhiav tej ntawd, ua rau tibneeg hajyam poob mus rau kev txhaum. Thaum tibneeg qaug mus ua raws li lub siab ntshaw hauv ntiajteb ua rau tibneeg hajyam khiav deb tus Tswv, hlub lub ntiajteb heev npaum twg, khiav deb tus Tswv deb npaum ntawd.

Yuav tsis yoojyim thaum ua lub neej nyob nrog ntau yam kev dag ntxhias tuaj rub peb. Luag yuav ua txhua yam tuaj dag ntxhias, rub tibneeg txhua tus mus ua raws li lub siab ntshaw kom txaus siab, xav kev zoo nkauj zoo nraug thiab xav tau meej mom. Thaum ib tug tibneeg ntsaw yam twg lawm, nws yeej ua neej rau yam ntawd. Hlub ntiajteb lossis hlub tus Tswv, peb tsuas tau xaiv yuav ib ntawm ob yam ntawd xwb. Vajtswv tej menyuam yuav tsum nco ntsoov: “Lub ntiajteb thiab txhua yam hauv ntiajteb uas neeg ntshaw tabtom yuav dua mus” (nqe 17a). Yeej muaj tseeb li ntawd tiag! Peb cov ntseeg yuav tau ua zoo ceevfaj thiaj tsis qaug rau lub ntiajteb tiamsis muab siab nrhiav Vajtswv ua ntej. Tsis txhob hlub lub ntiajteb, tiamsis  cov ntseeg Yexus yuav tau hlub Vajtswv heev ntxiv, vim Vajtswv Txojlus qhia meej hais tias: “tus uas ua raws li Vajtswv lub siab nyiam, tus ntawd yuav nyob mus ibtxhis li” (nqe 17b).

 

Thov Vajtswv,

Vaj Ntsujplig, thov Koj tshawb nyuam yaus lub siab kom nyuam yaus txhob hlub lub ntiajteb thiab tej yam uas lub siab ntshaw hauv lub neej tiam no. Thov pab nyuam yaus hlub Vajtswv heev ntxiv thiab ua raws li Vajtswv Txojlus txhua qhia hnub. Amees.

Peb puas tas siab hlub Vajtswv lawm tau, lossis tseem cia lub ntiajteb rub peb lub siab?

Nyeem Vajluskub hauv peb lub xyoo: Pajlug 8

Kênh Youtube BHKTHN:

https://www.youtube.com/c/bhkthn

Bài trướcĐăk Lăk: Hội Thao Thanh Niên Cơ Đốc Huyện Krông Pắc – Sân Chơi Lành Mạnh Cho Giới Trẻ
Bài tiếp theoKhăp Leh Anăn Hdĭp – 3/8/2022