Klei Aê Diê Blŭ: I Y‑Yôhan 2:15-17
Êlan kliăng: “Tơdah hlei pô khăp kơ lăn ala, klei khăp Ama amâo dôk hlăm ñu ôh.” (I Y‑Yôhan 2:15b).
Klei êmuh ksiêm mĭn: Ya mta mnơ̆ng khua ƀĭng kna Y‑Yôhan ghă drei đăm khăp ôh? Ya ngă? Ya mta klei jing dŏ lăn ala? Si klei srăng truh kơ lăn ala ti knhal tuč? Ya mta klei ăt dôk nanao hlŏng lar? Si drei ngă čiăng khăp kơ Khua Yang leh anăn hdĭp tui si klei Ñu čiăng nanao, hrô kơ klei êran tui tiŏ lăn ala?
Khua ƀĭng kna Y‑Yôhan hing jing khua ƀĭng kna “klei khăp”. Ñu hưn mdah lu kơ klei khăp Aê Diê, klei bi khăp hdơ̆ng phung anak Aê Diê hlăm hră ñu čih. Hlăm trăn Klei Aê Diê Blŭ anei, ñu mtă mtăn kơ phung anak Aê Diê: “Đăm khăp kơ lăn ala ôh, kăn khăp kơ mnơ̆ng hlăm lăn ala rei” (êlan 15a). Boh blŭ “lăn ala” mñă truh kơ 6 blư̆ hlăm tlâo êlan anei. “Lăn ala” tinei mblang mdê hŏng “lăn ala” hlăm Y‑Yôhan 3:16. “Lăn ala” tinei čiăng lač kơ klei mĭn bi kdơ̆ng hŏng Aê Diê leh anăn amâo tŭ ư Ñu ôh. Anăn jing knhuah hdĭp knŏng uêñ mĭn kơ klei hdĭp ti lăn ala, tui tiŏ klei tluh ƀiădah amâo uêñ kơ klei hdĭp mngăt myang ênuk hlŏng lar ôh. Kyuanăn, phung đăo đăm “khăp kơ lăn ala ôh” kyuadah hlei pô khăp kơ lăn ala, klei khăp Ama amâo dôk hlăm Ñu ôh (êlan 15b).
Tui tluôn, khua ƀĭng kna rah dăp mta klei jing dŏ lăn ala čiăng brei phung đăo răng leh anăn weh đuê̆ kbưi. Anăn jing “klei kđeh tluh” lač kơ klei asei mlei kđeh khăp čiăng; “klei ală tluh” klei khăp čiăng kơ mnơ̆ng mnuă ală ƀuh; leh anăn “klei mgao hlăm klei hdĭp” jing klei mgao kơ ênoh yuôm knŏng êjai bhiâo, anôk bruă, klei hing ang lăn ala. Ñu lač klă jih jang mta klei anei amâo hriê mơ̆ng Khua Yang ôh, ƀiădah mơ̆ng lăn ala (êlan 16). Sĭt nik, jih jang klei mơak kđeh tluh čiăng, klei siam kdrưh kơang mơ̆ng mnơ̆ng mnuă leh anăn wăt klei hing ang mgao kbiă mơ̆ng mnuih mjing sơăi. Lăn ala knư̆ bŏ dlai klei soh tơdah anak mnuih tui tiŏ klei msĕ snăn. Klei tluh čiăng, ai tiê mhao leh anăn klei hơ̆k mơak lăn ala đoh ktŭng anak mnuih ƀrư̆ hruê ƀrư̆ kbưi hĭn hŏng klei khăp Khua Yang. Knư̆ dŭm lu klei khăp kơ lăn ala snăn mdŭm anăn mơh trŭn hrŏ klei khăp kơ Khua Yang.
Jing dleh êdi kơ drei hdĭp ti krah ƀuôn sang mâo lu đei mta mnơ̆ng lăn ala đoh ktŭng. Arăng gĭr hâo hưn bi lar, mƀlum juh leh anăn kwăl hrip anak mnuih mŭt hlăm klei bi mơak kơ kđeh asei mlei, tui tiŏ mnơ̆ng mnuă, tui duah klei hing ang ti lăn ala anei. Tơdah ya klei mnuih khăp, sĭt yơh srăng hdĭp hlue tui mta klei anăn. Lăn ala amâodah Khua Yang, drei knŏng dưi khăp sa hlăm dua. Anak ƀuôn sang Aê Diê brei hdơr djă pioh: “Lăn ala leh anăn klei ñu tluh srăng êgao tuč” (êlan 17a). Anei jing klei sĭt! Kyuanăn, brei drei dôk êngal čiăng đăm dưm ôh klei khăp kơ lăn ala ƀiădah brei tui duah Khua Yang êlâo hĭn. Hrô kơ klei khăp kơ lăn ala, brei phung đăo knư̆ khăp kơ Khua Yang lu hĭn leh anăn hdĭp gưt ngă hlue klei Ñu čiăng. Kyua Klei Aê Diê Blŭ ƀuăn klă mngač: “hlei pô ngă klei Aê Diê čiăng srăng dôk hdĭp hlŏng lar” (êlan 17b).
Si ngă drei khăp kơ Khua Yang hŏng jih ai tiê mơ̆ amâodah adôk lui lăn ala đoh ktŭng?
Wah lač: Ơ Yang Mngăt Jăk Aê Diê, akâo Ih mñă kâo, bi êrâo kâo čiăng kơ kâo đăm khăp kơ lăn ala leh anăn kăn khăp kơ mnơ̆ng hlăm lăn ala rei, ƀiădah brei kâo khăp kơ Khua Yang lu hĭn leh anăn hdĭp gưt ngă klei Aê Diê čiăng grăp hruê.
Dlăng Klei Aê Diê Blŭ hlăm tlâo thŭn: Klei Bi Hriêng 8:1‑36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
