Klei Aê Diê Blŭ: Y-Yôhan 13:31-38
Êlan kliăng: “Ih srăng jao brei klei hdĭp ih pô kyua kâo mơ̆? Kâo lač kơ ih klei sĭt nik, mnŭ knô amâo srăng kdjô̆ ôh tơl ih hngah leh kơ kâo tlâo bliư̆.” (Y-Yôhan 13:38)
Klei êmuh ksiêm mĭn: Khua Yang lač “Ti anôk kâo nao” jing ti anôk? Ya klei Y-Pêtrôs lač leh hmư̆ Khua Yang lač ară anei phung ƀĭng kna leh anăn ñu pô kăn dưi nao mbĭt hŏng Khua Yang? Klei blŭ anăn brei ƀuh si Y-Pêtrôs dlăng kơ ñu pô? Si Khua Yang ƀuh Y-Pêtrôs? Si bĕ ngă čiăng kơ phung drei luă gŭ leh anăn thâo ƀuh klă klei hdĭp pô ară anei?
Mmông Khua Yang Yêsu mprăp tlă anăp hŏng klei djiê ruă knap ăt jing mmông Khua Yang dơ̆ng mâo klei guh kơang leh anăn Aê Diê Ama dưi guh kơang mơ̆ng Ñu (êlan 31-32). Ƀiădah, êlan truh kơ klei guh kơang anăn jing êlan tŭ klei ruă knap, kơ klei lhiăr, klei djiê. Êlan “amâo dưi tui hlue kâo ôh ară anei, ƀiădah ih srăng tui hlue êdei” (êlan 36b). Khua ƀĭng kna Y-Pêtrôs, sa čô mnuih pral kdal, djăl blŭ, lŏ wĭt blŭ mtam: Ya ngă kâo amâo dưi nao! Wăttơdah djiê kâo ăt srăng săn asei kyua Khua Yang mơh (êlan 37). Klă sĭt ñu jih ai tiê. Anăn jing klei ñu bi mĭn kơ pô, kơ klei ƀuăn rơ̆ng plah wah pô hŏng Khua Yang. Ñu bi mĭn ñu thâo Khua Yang, khăp kơ Khua Yang, jih klei hdĭp kơ Khua Yang čiăng djăp anôk Khua Yang nao ñu dưi nao mbĭt sơaĭ. Năng ai ñu bi mĭn pô amâo jăk kluôm ênŭm ôh, ƀiădah klei ƀuăn rơ̆ng ñu hŏng Khua Yang snăn kluôm ênŭm. Ñu bi mĭn pô mkăn năng ai ngă soh, bi ñu pô amâo mâo ôh. Kyua anăn, Klei Aê Diê Blŭ lač “mnŭ knô amâo srăng kdjô̆ ôh tơl ih hngah leh kơ kâo tlâo bliư̆” (êlan 38) msĕ si arăng tuh êa êăt hlăm klei ñu ktưn hưn. Khua ƀĭng kna Y-Yôhan mdei čih kơ klei anei mtam hŏng klei hưn răng mơ̆ng Khua Yang, msĕ si mjưh mdei klei hur har hlăm klei Y-Pêtrôs kat asei ƀuăn rơ̆ng.
Msĕ si Khua ƀĭng kna Y-Pêtrôs, drei ăt khăng bi mđĭ kơ pô, ktưn hưn kơ klei đaŏ pô, kyua anăn drei kƀah klei răng leh anăn ênưih lĕ buh. Khua ƀĭng kna Y-Pôl mñă kơ phung drei: “Snăn hlei pô mĭn ñu dôk dơ̆ng, brei ñu răng huĭdah ñu srăng lĕ buh” (I-Kôrantô 10:12). Mni Khua Yang, Ñu amâo huĭ ngă kơ Y-Pêtrôs ênguôt, luč klei hur har ôh, Ñu ktrâo kpă klei ñu kƀah klei răng, Khua Yang brei ñu ƀuh êlâo klei ñu srăng ngă soh tơdah ktưn hưn đei kơ klei hdĭp mngăt pô.
Mni Khua Yang kyua êlan tui hluê Khua Yang amâo djŏ êlan drei amâo dưi nao ôh: “Ti anôk kâo nao ih amâo dưi tui hlue kâo ôh ară anei, ƀiădah ih srăng tui hlue êdei.” (êlan 36). Khua ƀĭng kna Y-Pêtrôs pô êdei anei ăt lač leh “Kyua kơ klei anăn Aê Diê iêu leh diih, kyuadah Krist msĕ mơh tŭ leh klei knap mñai kyua diih, čiăng brei kơ diih klei bi hmô, čiăng kơ diih tui hlue kru Ñu” (I Y-Pêtrôs 2:21). Anăn jing klei ñu bi knal leh anăn lŏ mñă kơ phung drei brei thâo klă, luă gŭ tui hluê gru mngač mơ̆ng Khua Yang, đaŏ knang kơ Khua Yang brei klei ktang.
Ya mta bruă drei hlăk dôk luč klei răng? Hlei pô khăng lač kpă klei klă mngač hŏng klei khăp čiăng drei mdih thâo săng?
Ơ Khua Yang, kâo bi mni lač jăk kơ Ih Kyua Ih thâo kơ kâo lu hĭn kơ kâo thâo kơ kâo pô. Akâo kơ Ih đru kâo luă gŭ čiăng thâo klă kâo čiăng mâo Khua leh anăn phung mkăn kăp đru sĭt tui hluê gru jơ̆ng Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
