Klei Aê Diê Blŭ: II Y-Timôthê 2:22-26
Êlan kliăng: “Leh anăn dĭng buăl Khua Yang amâo dưi bi msao ôh, ƀiădah jing êmhač hŏng jih jang, sa čô thâo mtô jăk, leh anăn thâo gĭr, mkra phung bi kdơ̆ng hŏng pô hŏng klei êdu. Năng ai Aê Diê srăng brei diñu kmhal kơ klei soh leh anăn truh kơ klei thâo săng klei sĭt nik” (II Y-Timôthê 2:24-25).
Klei êmuh ksiêm mĭn: Ya klei khua ƀĭng kna Y-Pôl mtă mtăn kơ khua pô mtô hlăk ai Y-Timôthê? Tui si ñu, si hdră êlan brei sa čô dĭng buăl Aê Diê yua kăp mtô lač? Ya ngă brei êdu êun hŏng phung bi kdơ̆ng? Si ngă čiăng dưi dôk dơ̆ng êdu êun leh anăn bi mpŭ hdơ̆ng găp?
Hlăm hră čih kơ anak hlăm mngăt, jing khua pô mtô hlăk ai Y-Timôthê, khua ƀĭng kna Y-Pôl mtô mtă lu mta klei tŭ dưn kơ bruă kiă kriê phung biăp ñu. Hlăm trăn Klei Aê Diê Blŭ anei, drei kñăm kơ hdră êlan khua ƀĭng kna Y-Pôl ktrâo atăt Y-Timôthê hlăm klei dôk hdĭp thâo mpŭ leh anăn kơ knhuah mtô lač klei sĭt nik.
Jing sa čô hlăk ai, Y-Timôthê brei hngah hĕ kơ klei kđeh tluh phung hlăk ai, leh anăn brei tui duah, tui tiŏ “klei kpă ênô, klei đăo, klei khăp, leh anăn klei êđăp ênang, mbĭt hŏng phung iêu wah lač kơ anăn Khua Yang hŏng ai tiê doh” (êlan 22). Êjai hlăk dôk mtô, brei hngah kơ klei bi tăng mluk amâo mâo klei yuôm ôh kyuadah klei anăn knŏng bi truh klei bi msao đuč (êlan 23). Klei yuôm hĭn jing, brei dôk dơ̆ng êmhač hŏng jih jang, thâo gĭr, leh anăn thâo mtô mkra phung bi kdơ̆ng hŏng pô hŏng klei êdu (êlan 24-25).
Jing mnuih mtô hưn klei sĭt nik Aê Diê, grăp čô drei brei hriăm kah mbha hŏng klei êdu êun, luă gŭ, thâo gĭr leh anăn jăk ênuah. Čiăng arăng dưi mđing dôk hmư̆ leh anăn tŭ jum klei drei kah mbha, snăn ênhă êlan drei kah mbha jing yuôm snăk leh anăn jing gơ̆ng atŭt phŭn. Khut khat amâo dưi bi tăng mgăl kyuadah ngă msĕ snăn jing drei bư̆ mnư̆ bi kgăn hĕ arăng mđing hmư̆ klei sĭt nik. Brei drei thâo yua klei blŭ êdu êun, jăk ênuah kah mbha leh anăn kăp mblang klei sĭt nik Khua Yang hŏng klei êdu êun, luă gŭ. Čiăng dưi ngă klei anei, pô mă bruă kơ Khua Yang brei dôk hdĭp tui si klei Khua Yang mtô mtă, “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô” (Philip 2:3). Sĭt hŏng klei êdu êun yơh srăng bi mlih phung dôk hmư̆ “kmhal kơ klei soh leh anăn truh kơ klei thâo săng klei sĭt nik” hlăm klei myang mơ̆ng Yang Mngăt Jăk. Mơ̆ng anăn yơh, drei dưi đru diñu “lŏ hdơr leh anăn đuĕ mơ̆ng kđông yang jhat, pô mă čăp leh diñu brei ngă klei ñu čiăng” (êlan 25-26). Brei drei thâo dôk dơ̆ng “êmhač” hŏng jih jang mnuih, khă wăt tơdah diñu ngă soh dưn, ăt brei drei thâo mtô jăk amâodah đru mñă hŏng knhuah êdu êun, luă gŭ, amâo mâo bi hêñ amâodah bi êka ai tiê arăng ôh.
Jing klei ênguôt êdi tơdah phung anak Aê Diê hlăm Phung Sang Aê Diê hruê anei djăl ruăt ăl ngêñ, bi tăng mgăl, ngă bi êka ai tiê hdơ̆ng găp hŏng klei blŭ wăt klei ngă. Anei yơh jing mnêč yang jhat yua kăp bi kah asei mlei Yang Krist. Grăp čô drei brei hdơr knang kơ Yang Mngăt Jăk Aê Diê čiăng hriăm dôk hdĭp êmhač, êdu êun leh anăn thâo bi mpŭ hdơ̆ng găp, čiăng kơ găn hŏng klei anei, Anăn Khua Yang dưi hưn mdah kơ jih jang mnuih.
Si ngă, hŏng si knhuah ih kreh mtô mtă amâodah kah mbha kơ pô mkăn?
Ơ Khua Yang, akâo Ih đru kâo čiăng kơ klei hdĭp kâo dưi mâo boh êdu êun mơ̆ng Yang Mngăt Jăk, čiăng kơ kâo thâo dôk dơ̆ng êdu êun, luă gŭ leh anăn thâo mpŭ kơ arăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Rut 3
Kênh Youtube BHKTHN:
