Klei Aê Diê Blŭ: Klei Bi Hriêng 22:5-6
Êlan kliăng: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn” (Klei Bi Hriêng 22:6)
Klei êmuh ksiêm mĭn: Si ngă anôk mdê plah wah êlan mnuih ƀai hŏng êlan djŏ? Boh blŭ “kđông” hlăm êlan 5 leh anăn pruê̆ blŭ “bi hriăm hđeh” hlăm êlan 6 čiăng kñăm kơ ya klei? Ya drei srăng ngă čiăng bi hriăm phung anak čô êlan Khua Yang?
Klei Mtao Y‑Salômôn mtô hlăm dua êlan Klei Bi Hriêng anei bi êdah klă anôk mdê plah wah dua êlan, brei đuĕ kbưi mơ̆ng êlan phung ƀai čiăng mgang mngăt, leh anăn brei bi hriăm kơ hđeh êlan djŏ jing êlan kpă.
Boh blŭ brei mđing hlăm êlan 5 jing “kđông”. Mnuih êbat hlăm êlan mnuih ƀai sĭt nik srăng djŏ kđông. Kđông amâodah ƀưi jing mnơ̆ng huĭ hyưt snăk. Arăng khăng bi hgăm tơdah ƀêč kđông čiăng kơ pô mkăn amâo dưi ƀuh ôh, ênưih djŏ kđông. Mnuih ƀai ƀêč kđông čiăng mplư hlei pô kƀah klei răng čiăng ngă jhat kơ digơ̆, ngă jhat amâo djŏ knŏng hjăn kơ asei mlei digơ̆ ôh ƀiădah ngă jhat wăt kơ mngăt digơ̆ mơh. Brei phung amĭ ama knang kơ klei thâo mĭn Aê Diê čiăng dưi đuĕ kbưi mơ̆ng krŏng êruê leh anăn kđông mnuih ƀai, snăn kơh amĭ ama dưi bi hriăm phung anak čô pô.
Pruê̆ blŭ “bi hriăm hđeh” čiăng kñăm kơ klei tă êlan leh anăn bi hriăm phung hđeh nanao đrông. Klei bi hriăm anei đru phung hđeh thâo săng klă hnơ̆ng čuăn klei kpă ênô leh anăn klei doh jăk Aê Diê čiăng digơ̆ tui hlue. Tơdah phung hđeh thâo klă êlan djŏ srăng êbat, digơ̆ srăng weh đuĕ kơ êlan mâo krŏng leh anăn kđông ƀêč, hŏng klei anăn klei hdĭp phung anak čô drei dưi mâo klei jăk jĭn leh anăn klei čăt đĭ tơdah êbat hlăm êlan Khua Yang. Leh anăn boh nik nak ñu “tơdah ñu mduôn” ñu amâo srăng weh ôh mơ̆ng êlan amĭ ama bi hriăm leh anăn ruah leh. Klei anei brei ƀuh bruă bi hriăm mjuăt kơ Krist jing yuôm bhăn snăk leh anăn bi hmăi kơ jih klei hdĭp sa čô mnuih.
Hruê anei, mâo lu klei mnuih mĭn hmư̆ msĕ si jăk snăk ƀiădah jing hĕ kđông ƀêč kơ phung hlăk ai. Lăn ala khăng hưn leh anăn mtrŭt kơ klei dưi čuăn ruah mă pô, mtrŭt phung hlăk ai ngă tui si klei pô čiăng hŏng klei êngiê amâo mâo knhal ôh, wăt tơdah soh hŏng klei bhiăn amâodah kƀah klei ênuah ênô dưn. Boh sĭt gơ̆ hlăm klei hdĭp, drei khăng ƀuh mâo lu phung hlăk ai kyua kƀah klei thâo săng, digơ̆ lĕ leh kơ klei mplư hlăm klei bi dôk êkei mniê atăt truh kơ klei bi proh anak ĭ, leh anăn tŭ klei hêñ mlâo, tŭ klei arăng mưč dlăng msĕ si mnơ̆ng arăng čhĭ mnia. Mâo lu mnuih lĕ hlăm klei mplư prăk kăk, klei mplư klei hing ang, leh anăn dơ̆ng mơ̆ng anăn diñu lĕ hlăm klei ngă soh, soh hŏng klei bhiăn, soh hŏng klei kpă ênô. Khua Yang čiăng grăp čô phung đăo hriăm kơ êlan kpă Khua Yang čiăng grăp čô thâo uêñ mĭn kơ klei bi hriăm phung anak čô êlan doh jăk, êlan klei khăp Khua Yang jih hruê dôk hdĭp. Tơdah phung anak čô êbat hlăm êlan Khua Yang, amâo djŏ digơ̆ knŏng mâo mă klei jăk jĭn, klei čăt đĭ kơ klei hdĭp digơ̆ pô ôh, ƀiădah ba wăt klei mpŭ kơ amĭ ama, kơ gŏ sang, leh anăn êgao hĭn kơ klei anăn jing bi guh kơang kơ Anăn Khua Yang.
Si ngă hŏng jih ai tiê drei bi hriăm leh phung anak čô drei êbat hlăm êlan Khua Yang?
Wah lač: Ơ Khua Yang, kâo lač jăk kơ Ih kyuadah Klei Ih Blŭ mtă kơ kâo bi hriăm anak čô êbat hlăm êlan Ih. Akâo Ama đru kâo leh anăn phung anak čô kâo đuĕ kbưi mơ̆ng kđông klei soh, djă pioh knhuah hdĭp doh jăk, thâo khăp jih hruê dôk hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
