Pajlug 22:5-6
Nqe cim:
“Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej.”(Pajlug 22:6)
Lus nug rau sawvdaws xav:
– Qhov sib txawv ntawm cov neeg phem txojkev thiab cov neeg zoo txojkev zoo li cas?
– Lo lus “vojhlua” hauv nqe 5 thiab nqe lus “qhia menyuam” hauv nqe 6 xav hais txog yam dabtsi?
– Peb cheemtsum ua dabtsi kom qhia tau menyuam mus raws li tus Tswv txojkev?
Vajntxwv Xalumoos cov lus qhia hauv ob nqe Pajlug no muaj qhov kev sib txawv ntawm ob txojkev, cov neeg phem txojkev yuav tsum tau qaij kom tuav tau sab ntsujplig, thiab txojkev tseeb yog txojkev uas yuav tau muab qhia rau cov menyuam.
Lo lus cheemtsum paub hauv nqe 5 yog “vojhlua”. Tus neeg uas taug cov neeg phem txojkev yeej yuav mag vojhlua khi. Vojhlua lossis rooj ntxiab yeej muaj qhov kev txaus ntshai nyob hauv. Caws lub vojhlua feem ntau muab txhua yam npog zoo kom tsis pom, yoojyim mag. Cov neeg phem cuab vojhlua tos, lawv lub homphiaj yog dag kom tej neeg tsis ceevfaj puastsuaj, tsis yog puastsuaj sab nqaij tawv xwb tseem puas sab ntsujplig thiab. Cov niamtxiv yuav tau vamkhom tus Tswv txojkev txawj ntse qaij deb cov neeg phem tej vojhlua, ua tau li ntawd thiaj qhia tau cov menyuam.
Nqe lus “qhia menyuam” hais txog txojkev thiab kev cob qhia menyuam tsis tseg tsis tu. Qhov kev qhia no ua rau cov menyuam zeem paub thiab taug txojkev ua zoo, dawbhuv. Thaum menyuam paub meej txojkev zoo lawm, lawv yuav qaij dhau txoj kev muaj pos thiab vojhlua, ua li ntawd lawv txojkev ua neej thiaj tau koob hmoov thiab vammeej thaum nrog tus Tswv mus. Thiab tshwjxeeb yog “mus tas simneej” kuj yeej tsis tso txojkev ntawd tseg. Qhov no qhia paub kev cob qhia tus ntseeg tseemceeb heev vim yuav cuam tshuam rau lub neej tag nrho ib sim.
Nimno, muaj ntau txojkev mloog cuag li zoo tiamsis yog vojhlua cuab cov menyuam. Lub ntiajteb qhia thiab ntxias kom nyias xaiv raws li nyias xav, txhawb kom menyuam ua ywjsiab yam uas yus nyiam, txawm yog txhaum cai los ua nrho. Qhov uas muaj tseeb nyob hauv lub ntiajteb, peb pom muaj ntau tus menyuam vim tsis paub, lawv poob rau lub vojhlua kev ua nkauj ua nraug khi, thaum kawg kaus menyuam hauv plab, txajmuag, raug lwm tus saib tsis muaj nqis. Muaj ntau tus poob rau lub vojhlua nyiaj ntxiag, koob npe, thaum kawg dhau mus ua neeg txhaum cai, ua tsis tau neeg zoo. Vajtswv xav kom Nws cov menyuam txhua tus yuav tsum kawm paub Nws txojkev, rau siab qhia txojkev ntawd rau tej menyuam taug txojkev dawbhuv, sib hlub mus li. Thaum cov menyuam taug tus Tswv txojkev, tsis yog tau kev kaj siab, vammeej rau tus kheej xwb, tseem ua rau niamtxiv, tsevneeg tau koob npe zoo, thiab tshwjxeeb yog Vajtswv tau ntsejmuag.
Thov Vajtswv,
Vajtswv, nyuam yaus ua Koj tsaug vim Koj Txojlus qhia kom taug Koj txojkev. Thov Koj pub rau nyuam yaus thiab nyuam yaus tej menyuam, xeebntxwv qaij deb tej vojhlua kev txhaum, ua neeg dawbhuv, sib hlub mus tas simneej. Nyuam yaus tuav Tswv Yexus lub npe thov, Amees.
Peb twb tas siab qhia menyuam taug tus Tswv txojkev zoo li cas lawm?
Nyeem Vajluskub hauv peb lub xyoo: Yauhas 16.
Kênh Youtube BHKTHN:
