Pajlug 25:25-26
Nqe cim:
“Tiamsis tus uas haus cov dej uas kuv muab rau nws yuav tsis nqhis ib zaug li lawm. Cov dej uas kuv muab rau nws yuav txhawv hauv nws lub siab thiab cawm nws txojsia mus ibtxhis.” (Yauhas 4:14)
Lus nug xav:
– “Xov zoo tuaj lub tebchaws deb tuaj”, thiab “lub qhovdej txhawv uas nro” muaj lub ntsiab li cas?
– Tswv Yexus yog cov Dej Cawm Siav muaj lub ntsiab li cas?
– Peb tau coj Txojmoo Zoo thiab dej cawm siav mus rau lwm tus li cas lawm?
Ob nqe Pajlug saum toj no txuas ua ke muab los sib piv yam dej huv uas txias zias rau yam dej nro paug dhau ntawm tej kev paub txog yam zoo thiab phem nyob hauv tibneeg lub neej. Tej xov xwm uas tuaj deb tuaj feem ntau yog tej xov xwm ntsigtxog tsev neeg lossis xov xwm ntawm tshav rog. “Xov zoo tuaj lub tebchaws deb tuaj” tau muab piv rau “cov dej txias” qhia txog ib daim duab uas muaj kev kaj siab, tshiab huv, thiab ua rau tus uas nqhis dej txaus siab. Zoo ib yam li tej xov zoo tuaj deb tuaj, Txojmoo Zoo kuj coj kev zoo siab, txaus siab los rau tibneeg.
Txawm li ntawd los, tsis yog txhua yam dej puavleej pab tau kom tsis nqhis dej ntxiv, vim muaj ntau zaus ntsib tej dej uas nro, paug tsis huv, lossis twb qhuav tas lawm. Hais txog tus neeg taug kev deb uas tabtom nqhis dej, xav nrhiav tau dej huv si los haus, tiamsis thaum nws pom ib lub qhov dej uas tsis huv lossis qhuav lawm, yuav ua rau nws poob siab heev. Ob nqe Pajlug saum toj no yog ib zaj pivtxwv qhia txog kev tu siab tob kawg uas tibneeg muaj thaum pom tus neeg ncaj ncees poob rau tej kev phem. Tibneeg xav kom tus neeg ncaj ncees nyob ruaj khov raws li nws tus yam ntxwv zoo, ib yam li tus neeg tos nrhw tej dej huv si thiab txias zias. Tiamsis thaum tus neeg ncaj ncees cia tus neeg ua phem coj nws mus ua kev phem kev qias, tso kev ncaj ncees tseg, ces tseem tshuav leejtwg kam sawv los tiv thaiv tus neeg uas siab dawb siab zoo ntxiv lawm!
Timthawj Yauhas tau piav zaj xwm hais txog thaum Tswv Yexus tseem ua Nws tes haujlwm nyob hauv lub ntiajteb, muaj ib hnub Tswv Yexus tau ntsib ib tug pojniam neeg Xamalis ntawm ib lub qhovtshij. Thaum nkawd tabtom sibtham, Tswv Yexus thov tus pojniam ntawd dej haus, thiab nws siv qhov ntawd los qhia rau tus pojniam ntawd paub txog ib hom dej hu ua “cov dej uas cawm txojsia”. “Cov dej uas cawm txojsia” ntawd yog Tswv Yexus ntag. Tus uas txais yuav Tswv Yexus yuav tau txojsia nyob mus ibtxhis. Tus uas haus cov dej ntawd yuav tsis nqhis ib zaug ntxiv lawm, rau qhov cov dej ntawd yuav txhawv hauv nws lub siab thiab cawm nws txojsia mus ibtxhis (Yauhas 4:14).
Tibneeg ntiajteb tabtom qaug zog sab nqaij tawv thiab nqhis dej sab ntsujplig. Vim kev nyuaj siab thiab kev txhawj xeeb ntawm lub neej, coob tus mus nrhiav tej kev ntseeg lossis kev teev dab, tiamsis thaum kawg lawv rov ntsib kev nkees, qhuav dej sab ntsujplig, poob siab, thiab qaug zog hauv lub neej. Tswv Yexus qhia hais tias: “Nej cia li mus thoob plaws lub ntiajteb no thiab qhia Txojmoo Zoo kom sawv daws hnov” (Malakaus 16:15). Thov tus Tswv pab kom peb txhua tus ua tau raws li Nws tej lus qhia thiab kawg siab ntsws tshajtawm Txojmoo Zoo uas yog cov “dej txias zias”, coj kev kaj siab rau cov neeg tabtom sab sab vim ris tej nra hnyav tus ntsujplig. Tswv Yexus tej dej cawm siav uas nyob hauv peb yuav tsum tsis txhob muaj nyob hauv peb thiab peb tsev neeg xwb, tiamsis yuav tsum dhau los ua ib lub qhov dej cawm siav coj txojsia ibtxhis los rau coob tus tibneeg.
Thov Vajtswv,
Tus Tswv, thov ua Koj tsaug uas Koj tau hlub tshua thiab pub Dej Cawm Siav rau nyuam yaus. Thov Vaj Ntsujplig txhawb nyuam yaus lub zog tas siab tshajtawm Txojmoo Zoo, coj dej cawm siav mus pub rau coob leej. Nyuam yaus tuav Yexus Khetos lub npe thov. Amees.
Peb puas tau npaj txhij tshajtawm Txojmoo Zoo thiab coj cov dej cawm siav mus rau lwm tus lawm tau?
Vajluskub hauv peb lub xyoos: Tes Haujlwm 16
Kênh Youtube BHKTHN:
