Klei Aê Diê Blŭ: Y- Mathiơ 6:19-21.
Êlan kliăng:
“Kyuadah ti anôk mâo ngăn drăp yuôm ih, tinăn mơh ai tiê ih srăng dôk.” (Y Mathiơ 6:21).
Klei êmuh ksiêm mĭn: Ya dua mta klei hrŏng ruah phung đaŏ kơ Khua Yang mâo hlăm klei hdĭp? Ya klei Khua Yang Yêsu mtă kơ phung ƀĭng kna ruah? Ya ngă? Si mblang mkăm pioh ngăn drăp yuôm hlăm adiê? Ya klei đru drei ruah tui hluê si Klei Khua Yang mtă?
Klei Khua Yang Yêsu mtă brei ƀuh phung tui hluê Ñu tlă anăp hŏng dua klei hrŏng ruah mdê mdê hlăm klei hdĭp, mkăm pioh ngăn drăp hlăm lăn ala amâo dah mkăm pioh ngăn drăp hlăm adiê. Klei năng mđing jing khă gơ̆ sa bruă ngă “mkăp pioh ngăn drăp” ƀiădah ti anôk pioh mdê mdê srăng mâo klei tŭ mdê mdê. Hlei pô ruah klei mkăm pioh ngăn drăp ti lăn ala anei srăng tlă anăp hŏng klei muôr, bring bi rai, boh nik phung knĕ srăng tlĕ mă. Ƀiădah hlei pô ruah mkăp pioh ngăn drăp hlăm adiê snăn srăng dôk lă lar.
Hluê si klei Khua Yang mtă hlăm akŏ kdrêč 6 leh anăn bi mklă hŏng Y-Luk 12: 33-34, drei dưi thâo săng klei mtô mkăp pioh ngăn drăp hlăm adiê jing amâo djŏ pioh kơ hjăn pô ôh, ƀiădah hdĭp hlăm ai tiê srăng mbha ya mnơ̆ng pô mâo hŏng phung dleh dlan. Phung knŏng mkăm pioh ngăn drăp hlăm lăn ala anei srăng dleh thâo mđing kơ klei čiăng phung ka đaŏ kơ Khua Yang, dleh hĭn mơh čiăng mđing kơ klei Khua Yang čiăng kơ pô ngă, kyua ngăn drăp jing mnơ̆ng gun kpăk leh anăn bi mmăt ală mta digơ̆. Mklăk hŏng anăn, phung bi mklă ruah mkăm pioh ngăn drăp hlăm adiê srăng mđing kơ bruă mbŏ hlăm mngăt čiăng kơ klei Khua Yang čiăng gĭt gai ai tiê, klei mĭn leh anăn bruă pô ngă. Anăn jing klei yuôm bhăn Klei Aê Diê Blŭ mtô, “ti anôk mâo ngăn drăp yuôm ih, tinăn mơh ai tiê ih srăng dôk” (êlan 21).
Sa hlăm dŭm klei êdah kdlưn mơ̆ng mnuih khăp mkăp pioh ngăn drăp kơ hjăn pô jing amâo thâo hrăp, kyua lu mnuih mĭndah ngăn drăp srăng rơ̆ng klei hdĭp jăk siam, hơĭt kjăp hlăm ară anei leh anăn êdei anăp. Ƀiădah anak mnuih wơr bĭt hĕ klei hdĭp anei jing êjai, djăp mta mnơ̆ng dưi bi mluh knŏng hlăm sa kđhĭt ală, amâo mâo ôh mnơ̆ng dôk lă lar. Drei ăt khăng ƀuh lu mnuih luč jih jang mnơ̆ng knŏng leh sa klei pui ƀơ̆ng, sa gưl angĭn êbŭ, amâodah djiê leh ruă kjham amâodah mâo klei truh jhat. Klei năng ênguôt jing khă gơ̆ Klei Aê Diê Blŭ mñă kơ klei dôk êjai ti lăn ala anei, ƀiădah đa đa phung đaŏ ăt ruah hdĭp msĕ si lăn ala jing sang lă lar kơ pô, amâo mdei duh bi liê ngăn drăp hlăm lăn ala hlăk êjai klei hdĭp hlăm mngăt êdu awăt, ƀun ƀin. Brei drei hdơr pô knŏng jing phung dôk jưh ti lăn ala anei, kyua anăn amâo mâo ôh ya mta čiăng kơ drei mkăp pioh ngăn drăp hlăm lăn ala jhat ƀai anei. Hrô kơ anăn, bi mklă hrŏng ruah klei thâo mĭn hĭn, anăn jing mkăp pioh ngăn drăp hlăm adiê jing anôk srăng dôk lă lar.
Ti anôk drei ruah mkăp pioh ngăn drăp?
Ơ Khua Yang, akâo kơ Ih pap brei kơ kâo kyua kâo ênưih lĕ hlăm klei mplư kơ ngăn drăp jing êjai hlăm lăn ala. Akâo kơ Ih brei kơ kâo ai tiê thâo mđing kơ ƀuôn ala mtao čiăng djăp klei hrŏng ruah hlăm klei hdĭp kâo bi mơak kơ Khua Yang leh anăn dôk lă lar.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
