Klei Aê Diê Blŭ: Y‑Mathiơ10:17-20.
Êlan kliăng: “Ƀiădah hơ̆k mơak bĕ kyuadah diih tŭ mbĭt klei knap mñai Krist, čiăng kơ diih dưi dôk hơ̆k mơak msĕ mơh ti hruê klei guh kơang Ñu srăng bi êdah.” (I Y‑Pêtrôs 4:13).
Klei êmuh ksiêm mĭn: Si Khua Yang Yêsu hưn êlâo kơ phung ƀĭng kna srăng tuôm hŏng klei arăng ngă jhat? Si Khua Yang mđĭ ai diñu sĭt dôk ti anăp phung ngă jhat kơ pô? Si drei tuôm leh leh anăn dôk tuôm hŏng klei arăng ngă jhat kyua klei đaŏ? Ya klei mđĭ ai kơ drei mơ̆ng trăn Klei Aê Diê Blŭ anei?
Khua Yang Yêsu čiăng kơ phung ƀĭng kna čiăng mă bruă kơ Khua Yang ƀiădah brei mprăp hŏng klei arăng ngă jhat, bi kdơ̆ng kyua diñu “msĕ si phung biăp ti krah phung asâo tan”. Khua Yang hưn êlâo diñu srăng tlă anăp hŏng phung khua phat kđi leh anăn srăng čăm diih hlăm sang bi kƀĭn. Kjham hĭn diñu srăng tuôm hŏng phung khua čar leh anăn ti anăp phung mtao srăng êmuh kơ klei đaŏ kơ Khua Yang Yêsu. Ñu brei thâo anăn jing mông găl čiăng diñu “hưn bi sĭt” kơ Khua Yang kơ lu mnuih thâo. Phung khua ƀĭng kna Khua Yang Yêsu êdei anăn thâo sơaĭ klei ngă jhat, arăng čăm leh anăn arăng mdjiê kyua đaŏ kơ Aê Diê, diñu srăng đru tŭ klei knap mñai hŏng Khua Yang Yêsu Pô bi mtlaih hlăk êjai hiu hưn Klei Mrâo Mrang Jăk. Khua ƀĭng kna Y‑Pôl ăt hưn kơ bruă ñu ngă bŏ hŏng ruă knap kơ phung đaŏ hlăm Sang Aê Diê Kôrantô hlăm hră II Kôrantô 11:23-29.
Khua Yang Yêsu ăt čiăng kơ phung ƀĭng kna thâo hlăk êjai arăng ngă jhat kơ diñu arăng ăt srăng êmuh hŏng lu klei dleh dlan kơ klei đăo, klei anei ngă kơ diñu rŭng răng amâo thâo si srăng wĭt lač. Khua Yang mđĭ ai diñu leh anăn brei thâo Yang Mngăt Jăk Aê Diê Ama srăng dưm Klei Aê Diê Blŭ hlăm ai tiê diñu leh anăn diñu srăng yua Klei Aê Diê Blŭ čiăng mâo klei wĭt lač djŏ guôp. Aê Diê ăt tuôm ngă anei hŏng phung khua pô hưn êlâo Ñu đưm dih, “Snăn Yêhôwa yơr kngan Ñu ruêh ƀăng kƀông kâo, leh anăn lač kơ kâo,“Nĕ anei, kâo dưm leh klei kâo blŭ hlăm ƀăng kƀông ih” (Y‑Yêrêmi 1:9).
Hruê anei, phung ƀuôn sang Aê Diê ăt brei thâo răng leh anăn mprăp ai tiê tuôm hŏng klei dleh dlan, arăng ngă jhat sĭt drei mă bruă kơ Aê Diê. Brei drei hdơr knga kơ Khua Yang sĭt dôk ti krah klei dleh dlan leh anăn ruă knap kyua thâo pô dôk đru klam klei knap mñai hŏng Khua Yang. Khua ƀĭng kna Y‑Pêtrôs mtă kơ drei brei “hơ̆k mơak” kyua hlei pô tŭ klei dleh dlan kyua Yang Krist srăng hơ̆k mơak hŏng Ñu hlăm hruê Khua Yang Pô Bi Mtlaih lŏ hriê (I Y‑Pêtrôs 4:13). Sĭt drei rŭng răng amâo thâo sĭt srăng ngă hŏng phung ngă jhat kơ klei đaŏ pô, brei drei wah lač hŏng Khua Yang, Yang Mngăt Jăk srăng bi hriăm drei ya klei srăng blŭ (Y‑Luk 12:12), mơ̆ng anăn ăt dưi hưn bi sĭt kơ Khua Yang kơ phung dôk ngă jhat amâodah êmuh kơ klei đăo drei.
Drei dôk mprăp nanao ai tiê đru tŭ klei knap mñai hŏng Khua Yang, srăng tuôm hŏng klei dleh dlan, arăng ngă jhat sĭt mă bruă kơ Khua Yang leh mơ̆ amâodah ka?
Wah lač: Ơ Khua Yang, akâo kơ Ih đru kâo mơak hlăm ya klei dleh dlan arăng ngă jhat kyua klei đăo, akâo kơ Yang Mngăt Jăk brei kơ kâo klei wĭt lač thâo mĭn čiăng bi guh kơang Anăn Aê Diê hlăm djăp klei mâo.
Dlăng Klei Aê Diê Blŭ hlăm tlâo thŭn: Klei Mmuñ Hđăp 79:1-13; 80:1-19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
