Mathais 10:17-20
Nqe cim:
“Tiamsis nej yuav tsum zoo siab, rau qhov uas nej raug kev tsimtxom ib yam li Yexus Khetos twb raug los lawm. Thaum sawvdaws pom Nws lub tshwjchim uas ci ntsa iab, nej yuav zoo siab kawg nkaus li” (I.Petus 4:13).
Lus nug rau sawvdaws xav:
– Tswv Yexus qhia ua ntej licas txog tej kev tsimtxom uas cov thwjtim yuav ntsib?
– Tus Tswv txhawb lawv lub zog licas thaum mus sawv tabmeeg cov neeg tsimtxom yus?
– Koj twb ntsib lossis tabtom ntsib cov kev tsimtxom sab kev ntseeg zoo licas?
– Ntu Vajluskub no txhawb tau koj lub zog dabtsi?
Tswv Yexus xav kom cov thwjtim ua tus Tswv haujlwm tiamsis yuav tsum npaj siab khov kho yuav muaj tej kev tsimtxom, tawmtsam vim lawv “mus ib yam li pab yaj uas yuav mus rau hauv pab hma”. Tus Tswv ceebtoom ua ntej hais tias lawv yuav raug ntes coj mus rau hauv tej tsev tu plaub thiab yuav raug cov neeg coj cov Yudais tej kevcai nplawm. Qee zaus kuj yuav tau mus sawv tabmeeg tej nomtswv thiab cov vajntxwv nug lawv txojkev ntseeg Yexus thiab. Tus Tswv hais tias qhov ntawd yog lub zoo sijhawm “qhia” txog Nws zaj rau ntau leej paub. Los rau tom qab no Tswv Yexus cov thwjtim yeej ntsib tej kev tsimtxom, raug nplawm, raug muab ntsia thiab tua tuag vim tus Tswv lub npe, los lawv yeej txaus siab hlo tiv kev txomnyem mus qhia Tswv Yexus Txojmoo Zoo. Timthawj Paulus kuj ua timkhawv qhia txog nws lub neej ua Vajtswv haujlwm mas nyuaj siab kawg rau cov ntseeg Kauleethaus paub hauv tsab ntawv II.Kauleethaus 11:23-29.
Tswv Yexus kuj xav kom cov thwjtim paub hais tias thaum raug kev tsimtxom lawv yuav raug hu mus nug tej zaj uas nyuaj teb hauv txojkev ntseeg, qhov no yuav ua rau lawv txhawj tsis paub yuav teb licas. Nws thiaj txhawb lawv lub zog thiab qhia hais tias Leej Txiv tus Ntsujplig yuav muab Vajtswv Txojlus los rau lawv teb. Tus Tswv twb ua qhov no rau cov cev Vajtswv lus thaum ub lawm, “Tus Tswv txawm cev tes kov kuv lub qhovncauj thiab hais rau kuv hais tias, koj mloog kuv hais, kuv muab kuv tej lus tso rau hauv koj qhovncauj” (Yelemis 1:9).
Nimno, tus Tswv haivneeg kuj yuav tsum tau ceevfaj thiab cheemtsum npaj siab khov kho ntsib tej kev txomnyem, tsimtxom thaum peb ua Vajtswv haujlwm. Peb cia li ua tus Tswv tsaug thaum peb raug tej kev txomnyem nyuaj siab ntawd, rau qhov tej uas peb raug ntawd yog peb tabtom raug txomnyem zoo ib yam li tus Tswv raug. Timthawj Petus ntuas peb hais tias “yuav tsum zoo siab” rau qhov cov uas raug txomnyem vim Yexus Khetos yuav muaj kev zoo siab kawg nkaus rau hnub uas tus Tswv rov qab los (I.Petus 4:13). Thaum peb muaj kev txhawj tsis paub yuav teb licas rau cov neeg uas tsimtxom peb txojkev ntseeg, cia li thov Vajtswv pab, Vaj Ntsujplig yuav qhia rau peb teb licas thiaj zoo (Lukas 12:12), thiab dhau qhov ntawd peb muaj sijhawm qhia tus Tswv zaj rau cov neeg tsimtxom lossis nug peb txojkev ntseeg.
Koj puas npaj siab raug txomnyem zoo ib yam li tus Tswv, txaus siab hlo tiv tej kev txomnyem, tsimtxom thaum ua Nws tes haujlwm lawm tau?
Thov Vajtswv,
Tus Tswv, thov Koj pub kom nyuam yaus niaj hnub muaj kev zoo siab txawm yog ntsib tej kev tsimtxom txojkev ntseeg, thov Vaj Ntsujplig qhia nyuam yaus teb tau tej lus nug kom ua rau Vajtswv tau ntsejmuag txhua lub tsamthawj. Amees.
Nyeem Vajluskub hauv peb lub xyoo: Phau Ntawv Nkauj 79:1-80:19
Kênh Youtube BHKTHN:
