Klei Aê Diê Blŭ: Y‑Tit 2:11-14
Êlan kliăng: “Klei pap anăn bi hriăm drei brei hngah klei amâo thâo mpŭ kơ Aê Diê leh anăn klei tluh tui si lăn ala, leh anăn dôk hdĭp hŏng klei êngeh, kpă ênô, leh anăn thâo mpŭ kơ Aê Diê hlăm ênuk anei” (Y‑Tit 2:12).
Klei êmuh ksiêm mĭn: Ya klei khua ƀĭng kna Y‑Pôl kñăm kơ klei pap Aê Diê? Si knhuah dôk dơ̆ng ƀơ̆ng huă brei pô mă tŭ klei pap bi mâo hĕ? Si klei yuôm dôk hdĭp hŏng klei êngeh kơ klei hdĭp phung đăo? Si drei hriăm mjuăt drei pô dôk dơ̆ng ƀơ̆ng huă hŏng klei êngeh êjai dôk hdĭp ti lăn ala dôk guôn hruê Khua Yang lŏ hriê?
Hlăm hră mơĭt kơ Phung Sang Aê Diê Êphêsô, khua ƀĭng kna Y‑Pôl brei thâo klei drei mâo klei bi mtlaih jing “Kyuadah hŏng klei pap yơh diih tlaih leh hŏng klei đăo” snăn “amâo djŏ kyua bruă diih ngă ôh” čiăng đăm drei bi mni kơ drei pô (Êphêsô 2:8‑9). Hlăm hră čih mơĭt anei, khua ƀĭng kna Y‑Pôl mñă kơ Y‑Tit snei: “Kyuadah klei Aê Diê pap ba brei klei bi mtlaih bi êdah leh kơ jih jang mnuih” (êlan 11). Klei pap bi êdah hŏng klei Khua Yang Yêsu Pô Bi Mtlaih săn asei ti kyâo bi kal tla brei nư klei soh drei (Rôm 5:8). Tơdah amâo djŏ ôh kyua klei pap Khua Yang, sĭt yơh drei ăt dôk kram kngăm hlăm klei soh, jhat ƀai leh anăn amâo dưi kah pioh jing phung ƀuôn sang jing dŏ pioh hjăn kơ Aê Diê ôh (êlan 14).
Hlăm trăn Klei Aê Diê Blŭ anei, khua ƀĭng kna Y‑Pôl mñă bi hdơr Y‑Tit brei mtô lač kơ phung anak Aê Diê thâo săng, tơdah diñu mă tŭ leh klei pap Aê Diê, snăn brei diñu mâo klei hdĭp dôk dơ̆ng ƀơ̆ng huă bi năng hŏng klei pap anăn. Pô mă tŭ klei pap bi tui mơ̆ng Aê Diê, brei “hngah klei amâo thâo mpŭ kơ Aê Diê leh anăn klei tluh tui si lăn ala, leh anăn dôk hdĭp hŏng klei êngeh, kpă ênô, leh anăn thâo mpŭ kơ Aê Diê hlăm ênuk anei” (êlan 12). Tơdah đăo kơ Khua Yang Yêsu, mă tŭ klei pap bi tui leh drei, mblang jing drei mâo klei bi mlih jing mnuih mrâo hlăm Khua Yang, snăn brei thâo “hngah” klei hdĭp hđăp, brei hung nao kơ Khua Yang leh anăn weh đuĕ hĕ bi kbưi mơ̆ng klei tluh tui si lăn ala. Čiăng kơ mơ̆ng anăn yơh kčưm dơ̆ng klei hdĭp mrâo hŏng klei êngeh, kpă ênô leh anăn thâo mpŭ kơ Aê Diê. Phung anak Aê Diê brei dôk hdĭp msĕ snăn êjai dôk guôn klei jăk jĭn leh anăn klei Khua Yang Yêsu Pô Bi Mltlaih lŏ hriê (êlan 13). “Êngeh” amâodah “Djŏ hnơ̆ng” jing sa hlăm dŭm knuih yuôm hlăm duapăn knuih Yang Mngăt Jăk. Sa čô mâo leh klei bi mtlaih kyua klei pap, hngah lui klei hdĭp hđăp, hdĭp klei hdĭp mrâo tui si klei atăt gai mơ̆ng Yang Mngăt Jăk Aê Diê, snăn brei mâo boh Yang Mngăt Jăk. Leh anăn klei djŏ hnơ̆ng jing sa knuih amâo dưi kƀah ôh hlăm klei hdĭp phung anak Aê Diê. Pô dôk hdĭp hŏng klei êngeh thâo kiă kriê klei hdĭp ñu pô ti anăp klei tluh klei hưp čiăng, thâo mkhư̆ klei bluh ai, klei mĭn leh anăn ai tiê ñu pô ti anăp djăp mta klei truh. Pô dôk hdĭp djŏ hnơ̆ng dưi gai gĭt ñu pô čiăng đăm hlue ngă klei kđeh tluh amâodah tui si lăn ala, ƀiădah thâo krơ̆ng bi knar leh anăn djŏ hnơ̆ng hlăm klei hdĭp grăp hruê. Yang Mngăt Jăk Aê Diê Pô yơh srăng mñă bi hdơr, hlăk drei gao hĕ kdriêl hlăm klei mĭn wăt klei bluh ai, hlăk anăn brei knang kơ Khua Yang đru mtlaih drei dưi găn.
Drei mă tŭ leh klei pap Aê Diê snăn brei thâo săng klă klei Khua Yang čiăng leh anăn klei Ñu kñăm kơ klei hdĭp drei čiăng kơ grăp knhuang, dưi dôk hdĭp tui si klei Khua Yang čiăng, hŏng klei êngeh, kpă ênô leh anăn thâo huĭ mpŭ kơ Aê Diê hlăm klei hdĭp anei.
Si ngă drei thâo kơ drei dôk hdĭp hŏng klei êngeh mơ̆?
Wah lač: Ơ Khua Yang, bi mni kơ Ih djiê leh ti kyâo bi kal čiăng bi mtlaih kâo. Akâo Ih đru kâo dôk hdĭp năng hŏng klei pap Ih brei, leh anăn hriăm mjuăt dôk hdĭp hŏng klei êngeh, thâo kiă kriê asei pô hlăm djăp mta klei truh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 20:35-22:5
Kênh Youtube BHKTHN:
