Klei Aê Diê Blŭ: Y-Yôhan 8:1-11
Êlan kliăng: “Snăn kyuadah diih jing phung Aê Diê ruah leh, jing phung doh jăk leh anăn phung Aê Diê khăp, hơô bĕ klei thâo pap, ai tiê jăk, klei luă gŭ, klei êdu êun, leh anăn klei gĭr.” (Kôlôs 3:12).
Klei êmuh ksiêm mĭn: Ya klei phung khua čih hră leh anăn phung Pharisi lông dlăng Khua Yang Yêsu? Si Khua Yang lŏ kdơ̆ng wĭt? Ya klei drei hriăm mơ̆ng klei Khua Yang Yêsu dôk dơ̆ng hŏng sa čô mniê ngă klei soh tlĕ piu? Ya ngă brei drei dôk dơ̆ng êdu êun hŏng mnuih mkăn?
Êdu êun jing sa hlăm duapăn knuih Yang Mngăt Jăk (Galati 5:22). Lu mnuih mĭndah, phung êdu êun jing mnuih mâo klei mĭn awăt, êmit êmut amâodah amâo čiăng kpư̆ mgei ngă bruă ôh. Ƀiădah, hlăm boh blŭ phŭn klei Grĕk, êdu êun brei bi mâo hĕ ai ktang leh anăn mâo klei kjăp krơ̆ng ngă khua kơ asei ñu pô. Sa čô mâo knuih êdu êun jing mnuih kjăp ai tiê ti anăp ya mta klei truh dưn, kăp duah hdră êlan dôk dơ̆ng hŏng klei thâo mĭn, lŏ kdơ̆ng wĭt hŏng klei luă gŭ leh anăn klei khăp. Mnuih êdu êun dlăng kơ pô mkăn jing mpŭ hĭn kơ ñu pô, ñu mâo klei čiăng đru arăng nanao, khă arăng ngă soh dưn mơh.
Hlăm klei yăl dliê hruê anei, drei srăng hriăm kơ klei luă gŭ leh anăn klei êdu êun mơ̆ng Khua Yang Yêsu. Hlăk êjai Khua Yang dôk mtô lač ti Sang Yang, mâo phung khua čih hră leh anăn phung Pharisi atăt ba kơ Ñu sa čô mniê arăng mâo mă êjai gơ̆ tlĕ piu, čiăng kăp dlăng si bĕ Khua Yang srăng mkra (êlan 3-5). Diñu ngă klei anei čiăng “lông dlăng” Khua Yang leh anăn duah mnêč čiăng “kčŭt” kơ Ñu (êlan 6). Diñu lač, tui si klei bhiăn Y-Môis mtă brei bhĭr boh tâo bi mdjiê mniê ngă klei msĕ snăn. Ƀiădah Khua Yang Yêsu lŏ wĭt lač kơ diñu: “Hlei hlăm phung diih amâo mâo klei soh ôh, brei ñu bhĭr boh tâo êlâo hĭn kơ mniê anei” (êlan 7). Hmư̆ snăn jih jang diñu sa čơ čô kdŭn đuê̆ ƀrư̆ ƀrư̆, dơ̆ng mơ̆ng pô mduôn hĭn truh kơ hđeh. Knhal tuč adôk knŏng hjăn Khua Yang Yêsu hŏng mniê ngă soh anăn (êlan 9).
Mmông anei, Khua Yang Yêsu mâo kluôm dhuôm klei dưi “bi kmhal” čiăng lač phat kđi mniê anăn, ƀiădah Khua Yang amâo dôk dơ̆ng hŏng ñu tui si klei bhiăn ôh. Klăk wĭt, Khua Yang lač kơ ñu hŏng klei êdu êun: “Kâo kăn bi kmhal ih rei. Nao bĕ, leh anăn đăm lŏ ngă soh ôh” (êlan 11). Kyua klei Khua Yang dôk dơ̆ng êdu êun leh anăn bŏ hŏng klei pap yơh, bi mlih leh klei hdĭp mniê anei. Arăng đăo sĭt nik êdei kơ năn, mniê anei jing sa čô ƀĭng kna sĭt suôr tui hlue Khua Yang.
Găn hŏng klei Khua Yang Yêsu dôk dơ̆ng êdu êun hŏng mniê ngă soh hlăm klei yăl dliê anei, mñă bi hdơr kơ drei, Aê Diê ăt êdu êun, ênang leh anăn gĭr ktĭr hŏng drei nanao khădah lu bliư̆ drei ngă bi ênguôt Ñu dưn mơh. Ñu khăp čiăng kơ drei hlăk êjai drei adôk jing mnuih soh (Rôm 5:8). Kyuanăn yơh, Khua Yang čiăng kơ drei ăt dôk dơ̆ng ênang, êdu êun hŏng mnuih mkăn. Drei “jing phung Aê Diê ruah leh, jing phung doh jăk leh anăn phung Aê Diê khăp” snăn brei drei hriăm mơ̆ng Ñu čiăng dôk dơ̆ng hdơ̆ng găp hŏng “klei thâo pap, ai tiê jăk, klei luă gŭ, klei êdu êun, leh anăn klei gĭr” (Kôlôs 3:12). Akâo kơ Aê Diê brei kơ drei ai tiê jăk leh anăn luă gŭ hŏng jih jang mnuih, čiăng kơ găn hŏng klei dôk dơ̆ng hŏng arăng, drei dưi bi êdah knuih êdu êun mơ̆ng Yang Mngăt Jăk hlăm klei hdĭp drei.
Si ngă drei khăng dôk dơ̆ng êdu êun hŏng pô mkăn mơ̆?
Ơ Khua Yang, bi mni lač jăk kơ Ih khăp leh kơ kâo leh anăn êdu êun hŏng kâo nanao. Akâo Ih đru kâo hriăm mơ̆ng klei Khua Yang bi hmô, čiăng thâo dôk dơ̆ng ênang êdu êun hŏng pô mkăn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Rut 2
Kênh Youtube BHKTHN:
