Klei Aê Diê Blŭ: Hêbrơ 6:9‑12
Êlan kliăng: “Leh anăn hmei čiăng kơ grăp čô diih srăng bi êdah klei hur har msĕ snăn, čiăng pioh klei čang hmăng diih ênŭm klă tơl knhal tuč. Snăn đăm diih jing êgah ôh, ƀiădah jing phung tui phung dưn klei ƀuăn hŏng klei đăo leh anăn hŏng klei gĭr” (Hêbrơ 6:11‑12)
Klei êmuh ksiêm mĭn: Ya klei pô čih hră Hêbrơ lač kơ klei jing klei hdĭp mngăt phung dlăng hră ñu čih? Si ngă ñu ksiêm ƀuh msĕ snăn? Ya klei ñu čang guôn mơ̆ng diñu? Si drei ngă čiăng dưi djă pioh kjăp klei đăo tơl knhal tuč?
Leh hưn êlâo brei răng kơ boh srăng tŭ kyua lui klei đăo wăt mtô lač kơ phung đăo sĭt brei đĭ hriê kơ prŏng hlăm klei đăo, pô čih hră Hêbrơ bi êdah klei bi mĭn kơ phung dlăng hră ñu čih. Wăt tơdah hưn êlâo brei răng ƀiădah ăt ñu čang guôn nanao kơ phung dlăng hră ñu čih amâo srăng nao hlăm êlan lui klei đăo ôh, kyuadah diñu jing phung đăo sĭt, “wăt tơdah hmei blŭ msĕ snăn, hlăm klei djŏ kơ diih, hmei guôn klei jăk hĭn djŏ kơ klei bi mtlaih” (êlan 9).
Ñu čang guôn msĕ snăn kyua dua klei. Tal sa, kyuadah Aê Diê jing kpă ênô, leh anăn tal dua, kyuadah Ñu amâo wơr bĭt ôh “bruă diih leh anăn klei khăp diih bi êdah leh kyua Anăn Ñu, hlăm klei diih đru leh phung doh jăk, msĕ si diih ăt ngă” (êlan 10). Aê Diê ƀuh klă mngač jih jang bruă drei ngă, leh anăn Ñu thâo klă hlei pô mâo klei đăo sĭt, amâo djŏ knŏng si ai tiê jing ƀiădah bi êdah klă sĭt hŏng bruă ngă kbiă mơ̆ng klei khăp. Klei khăp phung đăo pioh kơ phung ayŏng adei diñu pô yơh jing klei bi knăl diñu khăp sĭt kơ Khua Yang (I Y‑Yôhan 4:19‑21).
Wăt tơdah đăo sĭt kơ klei bi mtlaih diñu, pô čih hră Hêbrơ ăt bi mđĭ ai diñu brei hur har leh anăn djă pioh kjăp klei đăo tơl knhal tuč. Klei hdĭp phung đăo amâo jing klei bi lông đŭt bhiâo ôh ƀiădah jing sa knhuang kluôm jih klei hdĭp leh anăn klei mưn Khua Yang pioh brei kơ phung dôk sĭt suôr tơl knhal tuč. Êlan đru drei čiăng dưi djă pioh kjăp klei đăo, boh nik nak hlăk tlă anăp hŏng klei dleh dlan hlăm klei hdĭp tui hlue Khua Yang jing brei tui msĕ si “phung dưn klei ƀuăn hŏng klei đăo leh anăn hŏng klei gĭr” (êlan 12).
Brei drei pioh mmông hriăm leh anăn ksiêm dlăng klei yăl dliê kơ klei hdĭp phung đăo jhŏng ktang hlăm Klei Aê Diê Blŭ. Dlăng wăt klei jăk leh anăn klei jhat diñu, čiăng thâo kral ya mta klei tui hriăm, ya mta klei weh đuĕ hĕ. Êngao tinăn, tui duah răk dlăng klei yăl dliê kơ klei hdĭp phung nao êlâo mă bruă kơ Khua Yang hlăm hƀuê ênuk Phung Sang Aê Diê čiăng mâo klei bi mđĭ ai, leh anăn wăt klei bi hmô huĭ mpŭ kơ Aê Diê, sĭt suôr tui hlue Khua Yang hlăm Phung Sang Aê Diê drei. Tui msĕ si klei diñu bi hmô čiăng dưi djă pioh kjăp klei đăo tơl knhal tuč, leh anăn brei drei pô yơh ăt ngă klei bi hmô kơ pô mkăn ai tiê sĭt suôr leh anăn hur har mă bruă kơ Khua Yang.
Si ngă klei hdĭp drei bi êdah klei đăo nanao grăp hruê mơ̆? Si klei hưn bi sĭt kơ klei anăn?
Wah lač: Ơ Khua Yang, bi mni kơ Khua Yang kyua klei bi mtlaih Ih pioh brei kơ hlei pô mâo klei đăo sĭt. Akâo Yang Mngăt Jăk đru kâo bi êdah boh mnga sa phung đăo sĭt, hdĭp hur har nanao hlăm klei đăo, hŏng jih ai tiê mă bruă kơ Khua Yang leh anăn khăp kơ ayŏng adei kâo.
Dlăng Klei Aê Diê Blŭ hlăm tlâo thŭn: Y‑Đaniel 11:36‑12:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
