Klei Aê Diê Blŭ: Klei Mtô Mñă Klei Bhiăn 22:5
Klei êmuh ksiêm mĭn: Ya ngă Aê Diê kăm ghă amâo brei mniê čŭt hơô čhiăm ao êkei leh anăn êkei kăn dưi čŭt hơô čhiăm ao mniê lĕ? Ya jing êlan hdră ti tluôn klei bhiăn anei? Si ngă boh yuôm klei bhiăn anei hlăm lăn ala ênuk anei?
Kyuadah phung Israel jing phung găp djuê Aê Diê ruah, pioh brei mdê mơ̆ng phung găp djuê mkăn, kyuanăn mâo lu klei bhiăn tŭ ư hlăm klei dhar kreh klei đăo phung tue ƀiădah Aê Diê kăm phung Israel, leh anăn Ñu bi êmut kheh kơ hlei pô ngă msĕ snăn. Klei bhiăn djŏ kơ kdrăp čŭt hơô Aê Diê mtă leh kơ phung ƀuôn sang Ñu hlăm êlan Klei Aê Diê Blŭ anei jing sa klei bi êdah klă kơ klei anăn.
Aê Diê brei klei bhiăn anei kyua dua phŭn knhal phŭn msĕ snei: Tal sa, Kanaan jing boh čar bŏ hŏng klei bhiăn tă tăn kơ klei tluh ƀô, leh anăn kdrăp čŭt hơô êkei hŏng mniê mtŭk mtŭl. Klei bhiăn kăm anei jing sa klei mtă kơ phung ƀuôn sang Aê Diê răng amâo dưi tui ôh klei bi khăp mniê hdơ̆ng mniê, êkei hdơ̆ng êkei leh anăn klei bi tluh ƀô čhŏ mrŏ phung Kanaan. Klei anei ăt čiăng kñăm kơ anôk mdê mniê hŏng êkei jing sa kdrêč yuôm hlăm pruê̆ êlan klei Aê Diê hrih mjing mơh, leh anăn phung ƀuôn sang Aê Diê amâo dưi bi msoh ôh klei mdê mniê êkei anei. Tal dua, mâo đa đa klei đăo phung tue ti krĭng Giăm Ngŏ kruak čua êkei hŏng mniê bi mlih čhiăm ao jing msĕ si sa kdrêč hlăm klei bhiăn kwưh akâo kơ klei ƀă kkiêng lar êngŭm. Ƀiădah jing phung ƀuôn sang doh jăk pioh kơ Aê Diê, tơdah dua čô ung mô̆ čiăng mâo anak, brei diñu hur har kwưh akâo msĕ si H’Ana mphŭn dô (I Y-Samuel 1:10-11), knang kơ klei myang Aê Diê amâo djŏ tui klei bhiăn jhat klei đăo phung tue ôh. Êlan hdră ti tluôn klei bhiăn anei jing klei pioh brei mdê phung Israel mơ̆ng lăn ala, leh anăn klei thâo săng klă kơ klei mdê mniê hŏng êkei Aê Diê hrih mjing leh (Klei Mphŭn Dơ̆ng 5:2).
Lăn ala hruê anei mâo kdrăp čŭt hơô mrâo menswear, jing kdrăp êkei mkra kčoh pioh kơ mniê čŭt hơô, amâodah mâo lu kdrăp čŭt hơô mrâo unisex, jing kdrăp čhum ao êkei mniê cŭt hơô dưi sơăi. Amâodah klei bi tui ngă hlăm klei mă rup bi kuôl bi mlih kdrăp čŭt hơô, êkei mă kdrăp mniê dôk ung, mniê mă kdrăp êkei dôk mô̆. Amâodah mâo mơh phung amĭ ama amâo thâo ôh ya bĕ ngă diñu brei hĕ anak diñu čŭt hơô bi mklăk hŏng klei digơ̆ jing. Amâo djŏ kdrăp čhiăm ao ôh bi msoh hŏng Aê Diê, ƀiădah klei tui ngă msĕ si lăn ala yơh, bi lŭk leh anăn bi rŭng klei bi kah êkei mniê hŏng kdrăp čŭt hơô, amâo djŏ knŏng bi hmăi jhat kơ klei bi kjăp rup klei jing êkei mniê kơ phung hđeh mrâo prŏng ôh, ƀiădah wăt mâo klei soh hlăm klei bi klă klei jing êkei mniê kơ phung anak čô mơh. Kyuanăn brei grăp čô phung đăo mđing mĭn djă pioh djŏ pruê̆ hlăm klei bhiăn êkei mniê Aê Diê mjing leh tui si klei Ñu kñăm čiăng.
Si ngă diih dôk tui kdrăp čŭt hơô bi msoh pruê̆ êlan klei bhiăn êkei mniê Aê Diê mjing leh mơ̆?
Wah lač: Ơ Aê Diê, Pô hrih mjing leh êkei leh anăn mniê tui si rup Ih pô. Kâo đăo anei jing klei jăk hĭn Ih brei. Đru kâo djă pioh djŏ pruê̆ klei bhiăn êkei mniê Ih mjing leh.
Dlăng Klei Aê Diê Blŭ hlăm tlâo thŭn: Y-Mathiơ 18:21-19:15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
