II Kevcai 22:5
5 Tej pojniam tsis txhob hnav txivneej tej tsoos tsho thiab tej txivneej los tsis txhob hnav pojniam tej tsoos tsho; tus TSWV uas yog nej tus Vajtswv ntxub cov neeg uas hnav li ntawd.
Lus nug rau sawvdaws xav:
– Vim licas Vajtswv txwv tus pojniam hnav tus txivneej tej tsoos tsho thiab cov txivneej los ib yam?
– Txojcai nyob tomqab tej lus qhia no yog dabtsi?
– Txojcai no muaj nqis licas nyob rau tiam no?
Vim cov Yixalayees yog Vajtswv haivneeg, tau xaiv tawm hauv txhua haivneeg los, yog li ntawd muaj tej yam lwm haivneeg pub ua, tiamsis tus Tswv tsis pub Nws haivneeg ua, thiab Nws ntxub cov neeg uas ua li ntawd. Tej kevcai hais txog tsoos hnav uas tus Tswv hais nyob hauv nqe Vajluskub no yog ib yam tshwjxeeb nyob hauv.
Muaj ob lub vimchiv uas tus Tswv tsim txojcai no. Thib ib, Kana-as yog lub tebchaws uas muaj kev phem kev qias, kev plees kev yi thiab tej tsoos hnav tsis feeb meej. Txojcai no yog qhuab ntuas tus Tswv haivneeg txhob kawm ua raws li cov neeg Kana-as tej kev sib deev, txivneej deev txivneej, pojniam deev pojniam. Qhov no kuj qhia meej hais tias kev sib txawv ntawm tus pojniam thiab tus txivneej yog ib txojcai nyob hauv Vajtswv kev tsim txhua yam, thiab tus Tswv haivneeg tsis tau cai ua txhaum txojcai no. Thib ob, qee yam kev ntseeg nyob ze sab hnub tuaj qhia kom tus txivneej thiab tus pojniam sib pauv tsoos tsho hauv tej kevcai thov muaj tubki. Tiamsis nyob rau lub meejmom uas yog tus Tswv haivneeg dawbhuv, thaum ib nkawm niamtxiv twg xav muaj menyuam, tsimnyog nkawd yuav tsum thov tus Tswv tas siab ntsws zoo li Hanas (I Xamuyees 1:10-11), tsuas vamkhom Vajtswv lub hwjchim xwb tsis yog kawm raws lwm haivneeg tej kev ntseeg. Txojcai nyob tomqab tej lus qhia no yog kev cais cov Yixalayees tawm hauv neeg ntiajteb, thiab kev paub tseeb txog qhov sib txawv ntawm tus txivneej thiab tus pojniam uas Vajtswv tsim (Chivkeeb 5:2).
Neeg ntiajteb tabtom tshwmsim tej tsoos hnav menswear, yog tej tsoos tsho txivneej tiamsis xaws rau pojniam hnav, lossis muaj tej tsoos hnav unisex, yog tej tsoos tsho uas txivneej thiab pojniam puavleej hnav tau. Lossis thaum tsom duab rau rooj tshoob, tus nraug vauv hnav nkauj nyab cev, thiab nkauj nyab hnav nraug vauv cev. Lossis muaj ntau leej niam leej txiv tsis paub vim dabtsi cia lawv cov menyuam hnav tej tsoos tsho uas tsis phim rau txivneej lossis pojniam. Tsis yog vim tej tsoos tsho ua saib tsis taus tus Tswv, tiamsis qhov uas xyaum raws neeg ntiajteb, rhuav tus Tswv txojcai sib cais ntawm tus pojniam thiab tus txivneej dhau ntawm tej tsoos hnav, tsis yog tsuas ua rau menyuam feeb tsis meej pojniamtxiv neej xwb, tseem ua rau muaj kev taw qhia yuamkev txog pojniamtxivneej rau tej xeebleej xeebntxwv. Vim li ntawd, txhua tus ntseeg Yexus tswj tus kheej mus raws li txojcai txivneej thiab pojniam uas tus Tswv tau tsim raws li Nws lub homphiaj.
Thov Vajtswv,
Tus Tswv, Koj yog tus tsim pojniam thiab txivneej raws li Koj tus yamntxwv. Nyuam yaus ntseeg hais tias ntawd yog yam zoo kawg nkaus uas Koj muab pub. Thov pab nyuamyaus tswj raws txojcai pojniam thiab txivneej uas Koj tau teeb tseg. Amees.
Nej puas tabtom hnav tej tsoos tsho ua rau xav yuamkev txog txojcai txivneej thiab pojniam?
Nyeem Vajluskub hauv peb lub xyoos: Mathais 18:21-19:15
Kênh Youtube BHKTHN:
