Mathiơ 24:45-51
“Bơngai đĭch, sư athei jang tơnăp kiơ̆ thoi yŏng sư pơkă, na yŏng sư lăp đon pơjao ăn kơ sư pơm kai wei-lăng lu buăl sư dơ̆ng na mưh trŏ kơ jơ sŏng sa sư chă asong kơ lu bôl sư tơmam sa. Lăp yŏng lu sư wih ‘bôh bơngai kai mă đêl sư pơjao athei wei-lăng lu đĭch đam sư noh jang kiơ̆ kơ nơ̆r pơkă na sư bơnê, thoi noh na bơngai kai jơhngơ̆m sư hiôk tơpă.” (Mathiơ 24:45-46)
Nơ̆r jet tơchĕng pơwao:
– “Bơngai đĭch” lăm tơdrong hơ’mon ‘nâu wă pơma kơ bu?
– Lăm jơhngơ̆m ‘bar ‘nu păng ‘bar tơdrong đei yua phara băl lăm ‘bar ‘nu bơngai đĭch noh tơdrong kiơ?
– Đei tơ’blŏk kơ lu bơ̆n tơdrong kiơ đơ̆ng tơdrong Kră Yang hơ’mon noh?
Kră Yang Yêsu pơtrơp roi hơ’mon pơtih gia nai dơ̆ng gah lăm jơhngơ̆m ‘bar ‘nu đĭch đam hăm yŏng tơ’ngla sư kư̆m đei yua phara băl, lu bơ̆n ngăl tơchĕng khan “bơngai đĭch” noh nơ̆r krao gah lu bơngai bơ̆jang, mă-lei Nơ̆r Kră Yang bơtho rim ‘nu kơ lu bơ̆n jing đĭch đam Kră Yang ngăl bơih yua kơ Kră Yang răt bơih păng tơmam gĭt kăl dêh noh hăm pham lơ̆ng rơgoh Sư kơdih, lăm tơdrong Kră Yang roi hơ’mon “bơngai đĭch ” wă pơma kơ bơngai bu mă Kră Yang pơjao tơdrong jang lăm Khul Bơngai Lui, khul tơdrong jang, hnam dơnŏ.
“Bơngai đĭch tơnăp păng gơh hơgei ” ưh kơ chă wă lơi yua kơdih mă-lei đĭ jơhngơ̆m jang tơnăp kiơ̆ thoi yŏng tơ’ngla pơkă, “chă asong tơmam sa trŏ kơ jơ”. pŭn hiôk tơpă kơ bơngai đĭch noh kơplah yŏng tơ’ngla sư wih brŏk ‘bôh oei tơnăp lăm tơdrong jang, na yŏng tơ’ngla sư lăp đon pơjao tơdrong jang rai tih păng jang lơ tơdrong dơ̆ng “yŏng sư gô ăn kơ sư wei-lăng đĭ-đăng mŭk tơmam yŏng sư hloi.” (trong 47).
“Bơngai đich ưh kơ chu” lăng pơ hơi tơdrong yŏng tơ’ngla sư wă, tơchĕng rĕng kiơ̆ kơdih khan “yŏng inh wă wih mơ̆n oei đunh” thoi noh sư arih kư̆ kă, ngôi hơdai sa et păng lu bơngai suai sik, yua iŏk tơdrong jang wă chă yua kơdih akâu, ưh kơ ‘mêm mơnat, tôn teh lu buăl sư tăm. Mă tơpă lu bơngai thoi noh jơ̆ bơngai ưh tam mă lui. Tơ’bôh lăm tơdrong arih phar ra kiơ kơ bơngai tam mă băt kơ Kră Yang, nhen thoi bơngai “khan lê̆ adrol ưh kơ tơpă” “bơtho hơlĕnh” lăm lu kon pơlei Kră Yang. Yua kơ jơhngơ̆m ‘mêm mơnat, Kră Yang pơjao tơdrong jang wă kơ lu sư jê̆ Kră Yang păng đei jơ ‘năr tơplih tơdrong arih, mă-lei dah oei nŏng kơ arih sa ưh kơ trŏ. Năr Kră Yang truh ưh kơ tam kơ băt “Yŏng sư gô phak pơlôch sư, ăn kơ sư oei hơdai hăm dôm lu bơngai pơm ưh kơ tơpăt, lê̆ sư nhơ̆m hmoi tơkăp sơnĕnh tơ noh.” (trong 51).
Tơdrong hơ’mon âu tơ’blŏk kơ lu bơ̆n mă đêl Kră Yang dŏng pơklaih, răt bơih, păng rơih iŏk lu bơ̆n arih tơnăp, bơ̆jang kơ Sư kơplah oei chang gô năr Kră Yang wă jur dơ̆ng, mă-lei, chang gô ưh kơ sĭ khan ngôi đĕch, apơi chang, mă-lei athei arih adrin tơnăp, jang keh tơdrong, ‘mêm mơnat păng awih awăn kơ ‘nhŏng oh lu bơ̆n trŏ thoi Kră Yang pơjao. Kơplah lu bơ̆n tơnăp awih awăn păng jang keh đơ̆ng Kră Yang pơjao. Kră Yang wă jur dơ̆ng hăm lu bơ̆n nhen thoi Minh ‘nu Pơtao wă apah. Tơplơ̆ dơ̆ng, dah bu lăng pơhơi năr Kră Yang wă jur dơ̆ng, mă oei hiơ̆k kơdih akâu đĕch, ưh kơ băt ‘mêm mơnat păng oei arih lăm tơdrong yoch, Kră Yang jur ưh kơ tam kơ băt nhen thoi Yŏng Tơ’ngla hăm tơdrong wă phak ling lang tơ anih “nhơ̆m hmoi tơkăp sơnĕnh”. Apĭnh Kră Yang tơgŭm lu bơ̆n băt lăng ming kơdih akâu lăm jơhngơ̆m bơ̆jang kơ Kră Yang bơ̆n. Arih lăm tơdrong lui păng bơ̆jang kơ Kră Yang dang ei gô đei pơkă tơ anăp ning mônh lu bơ̆n gơh đei Kră Yang apah dah mă phak kơplah Kră Yang Yêsu jur dơ̆ng.
Kơkuh kơ Ih ơ Kră Yang tơngla mă băt tôm tơdrong, Kră Yang băt tôm đơ̆ng lăm gah bơhngol inh dang ei, inh apĭnh tơbral tơdrong yoch inh kơdih wă kơ jing bơngai đĭch đam tơnăp, pơnam păng chu jang keh tôm tơdring đơ̆ng Kră Yang pơjao. krao khan yua anăn Kră Yang Yêsu Krist, Amen.
Lu bơ̆n bơngai đĭch tơnăp păng gơh hơgei dah mă bơngai đĭch ưh kơ chu yom păng oei pơm yoch?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Nêhêmi 12
Kênh Youtube BHKTHN:
