Đăm Lĕ Hlăm Klei Phung Mah Jiăng Jhat Mplư Ôh – 22/11/2021

1305

Klei Aê Diê Blŭ: I Kôrantô 15:29-34

Êlan kliăng: “Đăm lĕ hlăm klei mplư: ‘Phung mah jiăng jhat bi rai knuih jăk.’ Lŏ mĭn bĕ bi djŏ, leh anăn đăm lŏ ngă soh ôh.” (I Kôrantô 15:33-34a).

Klei êmuh ksiêm mĭn: Ya klei Khua ƀĭng kna Y‑Pôl lŏ dơ̆ng mblang čiăng bi mklă mâo klei lŏ hdĭp hlăm asei mlei? “Mah jiăng jhat” hlăm êlan 33 lač kơ hlei pô? Phung đaŏ kơ Krist đaŏ hlăm klei asei mlei lŏ hdĭp snăn brei hdĭp si ngă?

Khua ƀĭng kna Y‑Pôl lŏ dơ̆ng mâo klei hưn bi sĭt čiăng lăm lui klei mtô soh amâo mâo ôh klei asei mlei kbiă lŏ hdĭp, hlăm anăn mâo bruă ngă ƀaptem kơ phung djiê. Ñu amâo lač klă hĭn ôh kơ klei bhiăn anei, ƀiădah klei klă ñu čiăng lač jing djăp mta klei srăng jing hơaĭ mang tơdah amâo mâo klei lŏ hdĭp. Leh anăn ăt lông bi mĭn, ya ngă ñu amâo huĭ tlă anăp hŏng klei huĭ hyưt sĭt hiuhưn Klei Mrâo Mrang Jăk, tŭ klei arăng ngă jhat, boh nik klei arưp aram kơ klei hdĭp grăp mông snăn tơdah amâo mâo ôh klei hdĭp leh djiê? Leh lu klei êmuh, Khua ƀĭng kna Y‑Pôl atăt phung đaŏ Kôrantô sa klei bi mklă čiăng đru kơ grăp čô mnuih đaŏ knang kjăp kơ klei kbiă lŏ hdĭp hlăm asei mlei leh Krist lŏ hriê jing klei klă sĭt, tơdah amâo mâo ôh snăn diñu amâo hdĭp hluê si klei sĭt nik hlăm Klei Aê Diê Blŭ čiăng kăm ngă klei kđeh asăr pô khăp, ngă phưi tha msĕ si phung hlăm lăn ala anei msĕ si huă mnăm leh anăn bi hrăp klei čiăng “kyuadah mgi dih srăng djiê yơh” (êlan 32). Knhal tuč, Khua ƀĭng kna Y‑Pôl mtă kơ phung đaŏ Kôrantô brei diñu mdih leh anăn hdĭp kpă ênô, kyua phung mtô soh kơ klei lŏ hdĭp mơ̆ng asei mlei jing phung mah jiăng jhat bi rai knuih jăk diñu hriăm leh hlăm dŭm hruê mlan tui hluê Khua Yang (êlan 12,33).

Drei amâo lŏ mâo thiăm ôh klei hâo hưn kơ bruă ngă ƀaptem kơ phung djiê mơ̆ng Khua ƀĭng kna Y‑Pôl lač leh hlăm êlan 29. Ƀiădah drei thâo klă hdră kñăm mơ̆ng bruă ba klei hâo hưn anei amâo djŏ knŏng bi hriăm drei hluê ngă amâodah bi tăng mgăl klei soh djŏ ôh. Klei ñu čiăng mñă tinei jing klei phung đaŏ Kôrantô ngă leh čiăng kơ diñu ăt thâo klei djiê amâo djŏ jih ôh. Mơ̆ng anăn ƀrư̆ mkăp thiăm klei bi mklă čiăng kơ Khua ƀĭng kna Y‑Pôl klah čŭn kơ klei hdĭp mơ̆ng asei mlei phung đaŏ kơ Krist leh anăn dŭm klei brei diñu lŏ dơ̆ng hluê ngă čiăng amâo bi luč ôh klei mưng jăk kyua phung “amâo thâo kral Aê Diê ôh” (êlan 34).

Jing phung thâo kral Aê Diê leh anăn klei kpă ênô Ñu, brei drei “thâo, hluê si klei kpă ênô, leh anăn đăm ngă soh ôh…” čiăng mâo klei pah mưn hlăm adiê mâo ênoh yuôm lă lar leh dưi lŏ hdĭp hŏng Yang Krist. Đăm lĕ ôh hlăm klei phung mah jiăng jhat mplư kơ klei soh čhuai hŏng Klei Aê Diê Blŭ.

       Drei đaŏ kjăp kơ klei asei mlei kbiă lŏ hdĭp hlăm hruê knhal tuč mơ̆?

Wah lač: Ơ Khua Yang Yêsu khăp hơiêng! Kâo čang hmăng hruê Khua Yang lŏ hriê čiăng kâo dưi lŏ hdĭp hlăm asei mlei mrâo jăk mơak, akâo kơ Ih đru kâo đaŏ kjăp hlăm Klei Aê Diê Blŭ čiăng kâo hriăm mbŏ knuih hdĭp huĭ mpŭ, jăk leh anăn amâo lĕ ôh hlăm klei mplư soh čhuai.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: I Bruă Mtao 15:1-32

Kênh Youtube BHKTHN:

https://www.youtube.com/c/bhkthn

Bài trướcĐức Chúa Giê-xu, Người Thầy Siêu Việt
Bài tiếp theoChớ Mắc Lừa Bạn Bè Xấu – 22/11/2021