Klei Aê Diê Blŭ: Y-Yêrêmi 27:6-15
Êlan kliăng: “Đăm dôk hmư̆ ôh klei phung khua pô hưn êlâo lač kơ ih snei, ‘Ih amâo srăng mă bruă ôh kơ mtao Ƀaƀilôn! …‘Kâo amâo tuôm tiŏ nao diñu ôh,’ Yêhôwa lač” (Y-Yêrêmi 27:14a, 15a).
Klei êmuh ksiêm mĭn: Si klei hưn êlâo mơ̆ng phung khua pô hưn êlâo, phung mdian, phung mblang klei êpei, phung ksiêm mtŭ, phung mjâo? Ya klei knhal tuč kơ phung blŭ klei hưn êlâo tui si pô čiăng leh anăn phung hluê hmư̆? Si ngă knuih brei drei mâo hŏng phung dưi lač leh hlăm êlan 9?
Phung dưi lač hlăm êlan 9 mbĭt hŏng bruă diñu ngă jing mta klei bhiăn Yêhôwa kăm phung ƀuôn sang Aê Diê ruah amâo dưi ngă ôh (Bruă Lêwi 19:26, Klei Mtô Mñă Klei Bhiăn 18:10-11). Kyua klei phung khua hưn êlâo diñu lač jing klei luar (êlan 14) leh anăn diñu pô jing phung amâo djŏ Yêhôwa tiŏ nao ôh ƀiădah lŏ yua Anăn Aê Diê čiăng blŭ klei luar mplư phung ƀuôn sang Aê Diê (êlan 15). Klei Yêhôwa mtă mâo phung khua hưn êlâo Ñu hưn brei gưt kơ mtao Ƀaƀilôn jing dĭng ƀuăl Aê Diê (êlan 6-7), ƀiădah anei jing klei phung ƀuôn sang Israel amâo čiăng hmư̆, kyua ană diñu duah phung khua hưn êlâo soh, phung mdian, phung mblang klei êpei, phung ksiêm mtŭ, phung mjâo čiăng hmư̆ klei blŭ luar snei “Diih amâo srăng mă bruă kơ mtao Ƀaƀilôn ôh” (êlan 9). Ƀiădah kyua phung amâo djŏ jing Aê Diê tiŏ nao ôh, diñu yua Anăn Aê Diê blŭ klei hưn êlâo, mbĭt hŏng phung ƀuôn sang Aê Diê jing phung khăp kơ klei blŭ luar anăn, anăn jih dua srăng tŭ klei bi kmhal mơ̆ng Yêhôwa, jih jang tŭ klei rai tuč (êlan 15).
Klei blŭ sĭt khăng amâo bi mơak ai tiê pô mkăn ôh, khădah snăn klei blŭ sĭt wăt tơdah ngă kơ phung ƀuôn sang ruă ai tiê sĭt hmư̆ ƀiădah srăng ba klei bi hlao anôk êka kyua klei soh diñu ngă leh. Phung ƀuôn sang Israel tŭ klei bi kmhal mơ̆ng Yêhôwa jing boh jhat mơ̆ng hruê mlan diñu mâo ai tiê khăng hŏng Klei Aê Diê Blŭ mtă, ngă soh hŏng Aê Diê. Khădah snăn, diñu lŏ čiăng mplư pô, čiăng ñĕ kơ klei Aê Diê bi kmhal anăn dua phung khua pô hưn êlâo soh mơ̆ng phung amâo djŏ jing Yêhôwa tiŏ nao ôh. Klei phung khua pô hưn êlâo soh knŏng đru bi mgưt hơĭt ai tiê phung ƀuôn sang Aê Diê ƀiădah amâo dưi đru kơ diñu tlaih mơ̆ng klei bi kmhal ôh.
Hruê anei ăt adôk lu phung mblang klei êpei, phung ksiêm mtŭ luar, phung mdian, phung mjâo… ngă bruă ktang phĭt hŏng klei tlă anăp amâodah hlăm internet hŏng klei luar iêu jak phung ênưih lĕ hlăm klei mplư. Huĭ hyưt hĭn phung mdăp ti tluôn klei kreh knhâo čiăng hưn kơ klei luar mplư leh lu mnuih hmư̆, hlăm anăn mâo đa đa phung ƀuôn sang Aê Diê. Klei hdĭp êdei anăp phung drei dôk hlăm kngan Aê Diê kiă kriê jing pô thâo hruê mgi si srăng jing leh anăn kiă kriê hƀuê ênuk anak mnuih. Aê Diê bi hriăm “đăm hmư̆ ôh” ƀiădah tơdah drei ăt hmư̆ tui si klei blŭ luar snăn amâo srăng hluê ngă kluôm ênŭm ôh klei bhiăn Aê Diê leh anăn klă sĭt srăng tŭ klei bi rai tuč mơ̆ng Aê Diê.
Drei đaŏ kjăp mơ̆ klei hdĭp drei dôk kluôm dhuôm hlăm kngan Aê Diê kiă kriê?
Ơ Khua Yang Aê Diê Pô Myang hĭn, Pô Doh Jăk! Akâo kơ Ih đru kâo thiăm klei khăp kơ Ih, djă pioh klei Ih mtă, đaŏ kjăp kơ klei Aê Diê kiă kriê hlăm klei hdĭp anei čiăng kâo kluôm ênŭm tui hluê Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 6:1-24
Kênh Youtube BHKTHN:
