Klei Aê Diê Blŭ: II Kôrantô 6:14-16
Êlan kliăng: “Đăm bi mđua knông hŏng phung amâo đăo ôh… Kyuadah drei jing sang kkuh mpŭ kơ Aê Diê hdĭp, tui si Aê Diê lač leh, “Kâo srăng dôk hlăm diñu leh anăn êbat ti krah diñu,leh anăn Kâo srăng jing Aê Diê diñu leh anăn diñu srăng jing phung ƀuôn sang Kâo” (II Kôrantô 6:14a, 16b)
Klei êmuh ksiêm mĭn: Ya jing knông? Ya ngă Khua ƀĭng kna Y‑Pôl mtă đăm bi mđua knông mbĭt ôh hŏng phung amâo đăo? Klei mĭn “drei jing sang kkuh mpŭ kơ Aê Diê hdĭp” đru kơ ya bruă hlue ngă klei Aê Diê mtô? Si drei dôk hdĭp hŏng klei Aê Diê mtô anei?
Knông jing ana kyâo dưi ƀư̆ dưm ti mra êmô kbao, kñăm kă kkuê dua drei mbĭt čiăng jih dua hrăm mbĭt kai lŏ, mđoh êdeh. Boh blŭ “kđông” tinei dưi yua hlue si klei mblang čiăng lač kơ klei bi mguôp plah wah pô anei hŏng pô mkăn. Khua ƀĭng kna Y‑Pôl bi hriăm phung đăo ti Sang Aê Diê Kôrantô đăm bi mđua knông hŏng phung amâo đăo ôh (êlan 14a). Ñu lač kơ klei bi mklă, “klei kpă ênô hŏng klei ƀai”, “klei mngač hŏng klei mmăt”, “Yang Krist hŏng Bêlial”, “phung đăo hŏng phung amâo đăo”, “Sang kkuh mpŭ kơ Aê Diê hŏng rup yang jhat” mơ̆ng lu mta klei êmuh čiăng kơ phung đăo brei truh kơ sa klei wĭt lač sa anăn jing amâo dưi bi mguôp ôh, amâo dưi hgŭm, amâo dưi bi hlai mbĭt leh anăn amâo mâo ôh sa klei msĕ plah wah phung đăo hŏng phung amâo đăo.
Klei bhiăn Aê Diê ăt mtô phung ƀuôn sang Aê Diê đăm bi mđua knông mbĭt ôh kơ sa drei êmô hŏng sa drei aseh dliê čiăng kai lŏ kyua amâo srăng tŭ dưn ôh. “Đăm kai ôh hŏng sa drei êmô leh anăn sa drei aseh dliê đua knông mbĭt” (Klei Mtô Mñă Klei Bhiăn 22:10). Hlăm klei bi dôk ung mô̆ ăt msĕ mơh, tơdah dua čô amâo sa klei đăo bi mguôp hlăm klei bi dôk ung mô̆ snăn klă sĭt pô amâo đăo kơ Aê Diê srăng jing klei gun kpăk, jing klei ktrŏ kơ phung đăo leh kơ Aê Diê leh anăn bi luč hĕ klei bi mguôp dôk mâo plah wah phung đăo kơ Krist hŏng Aê Diê.
Hlăm êlan 16, Khua ƀĭng kna Y‑Pôl mñă thiăm kơ phung đăo sa klei yuôm bhăn snăk jing brei hdơr “…drei jing sang kkuh mpŭ kơ Aê Diê hdĭp” (êlan 16b). Klei anei mđrĭng hŏng bruă srăng amâo mâo mta phŭn amâodah klei mgang kơ bruă ngă phung dưi lač jing phung ƀuôn sang Aê Diê mguôp hlăm bruă kkuh kơ rup yang amâodah bi dôk ung mô̆ hŏng phung amâo sa klei đăo. Pô Doh Jăk dôk hlăm drei amâo dưi pap brei ôh kơ klei amâo doh jăk.
Khua Yang Yêsu wah lač brei kơ phung ƀuôn sang Ñu: “Kâo amâo akâo kơ Ih mă ba diñu kbiă mơ̆ng lăn ala ôh, ƀiădah čiăng kơ Ih kiă kriê diñu mơ̆ng pô jhat” (Y‑Yôhan 17:15). Drei hdĭp ti krah lăn ala ƀiădah amâo dưi bi mđua knông mbĭt hŏng lăn ala ôh, jing amâo dưi ngă klei soh, amâo dưi bi dôk ung mô̆ hŏng phung ka đăo, amâo dưi hdĭp hlue si hnơ̆ng čuăn mơ̆ng lăn ala. Phung đăo kơ Krist mâo Aê Diê dôk mbĭt anăn brei hdĭp bi guh kơang Anăn Aê Diê ti krah phung ka thâo kral Aê Diê.
Hlăm klei hdĭp leh anăn hlăm klei bi dôk ung mô̆, drei mâo klei mĭn “Đăm bi mđua knông hŏng phung amâo đăo ôh” mơ̆?
Wah lač: Ơ Aê Diê! Kâo bi mni lač jăk kơ Khua Yang kyua Ih mơak dôk hlăm klei hdĭp kâo leh anăn iêô kâo jing ƀuôn sang Ih. Akâo kơ Ih đru kâo amâo brei ya klei bi mguôp hŏng phung ka đăo ngă kơ kâo amâo hdĭp sĭt suôr, myơr jih kơ Khua Yang.
Dlăng Klei Aê Diê Blŭ hlăm tlâo thŭn: Y‑Yêrêmi 5:20–6:12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
