II Kauleethaus 6:14-16
Nqe cim:
“Tus ntseeg tsis txhob mus nrog tus tsis ntseeg koom kwv ib tug quab…rau qhov peb lub cev yog Vajtswv tus uas muaj sia nyob lub tuamtsev. Raws li Vajtswv txojlus hais tias, Kuv yuav muab lawv ua Kuv qhov chaw nyob thiab Kuv yuav niaj hnub nrog lawv nyob” (II Kauleethaus 6:14a, 16b).
Lus nug rau sawvdaws xav:
- Tus quab yog dabtsi?
- Vim li cas Timthawj Paulus tsis pub koom kwv quab nrog cov tsis ntseeg?
- Suav hais tias “peb lub cev yog Vajtswv lub tuamtsev” pab tau peb li cas txog kev ua raws li Vajtswv tej lus qhia?
- Peb ua raws li tej lus qhia no li cas lawm?
Tus quab yog ib tug ntoo nkhaus muab los txua dhos rau saum nyuj lossis twm xubpwg cia laij teb lossis cab tsheb. Hnub thaud luag kheev muab ntoo los dhos ua ib txig quab tso rau ib nkawm nyuj lossis twm cab tsheb ces yuav muaj zog dua ib tug cab. Lo lus “quab” hais ntawm no tsis yog hais txog quab tiag, tiamsis yog hais lus paj txog qhov uas muab ob tug neeg muaj kev ntseeg sib txawv los yuam nyob ua ke. Timthawj Paulus qhia tsis pub cov ntseeg hauv nroog Kauleethaus mus nrog cov tsis tau ntseeg koom kwv ib tug quab (nqe 14a). Paulus hais txog kev sib tawmtsam ntawm qhov phem thiab qhov zoo, qhov kaj thiab qhov tsaus, Yexus Khetos thiab Ntxwgnyoog, tus ntseeg thiab tus tsis ntseeg, Vajtswv lub tuamtsev thiab chaw teev mlom ua lus nug rau cov ntseeg sawvdaws paub hais tias tej ntawd yeej koom tsis taus ua ke.
Vajtswv tej kevcai kuj qhia Vajtswv haiv neeg txog muab nyuj thiab neesluav los koom ua ke ib tug quab laij liaj, vim ua li ntawd tsis muaj qab hau. Vajluskub qhia“Nej tsis txhob muab nyuj thiab neesluav los ua ib nkawg cab tib rab khais laij teb” (2 Kevcai 22:10). Hauv txoj kev ua txij nkawm los kuj ib yam li ntawd, yog ob leeg tsis koom kev ntseeg los nyob ua txij nkawm ces tus tsis muaj kev ntseeg yuav tab kaum tus ntseeg, ua lub nra hnyav rau tus ntseeg, kom tsis muaj kev sib raug zoo nrog cov ntseeg thiab nrog Vajtswv.
Hauv nqe 16, Timthawj Paulus ntuas cov ntseeg ib yam tseemceeb ntxiv hais tias:“…peb lub cev yog Vajtswv lub tuamtsev” (nqe 16b). Qhov no xav qhia hais tias peb tsis muaj ib yam dabtsi yuav hais daws yus zaj txog qhov uas tus ntseeg mus koom nrog cov tsis ntseeg teev mlom lossis mus yuav cov tsis tau ntseeg los ua txij nkawm. Tus uas nrog cov ntseeg nyob yog tus Dawbhuv, Nws tsis zam rau tej kev tsis dawbhuv ib zaug li.
Tswv Yexus tau thov Vajtswv pab Nws cov thwjtim hais tias: “Kuv tsis tau thov koj coj lawv tawm hauv ntiajteb no mus, tiamsis kuv thov koj tsom kwm lawv kom lawv txhob raug Dab Ntxwgnyoog dag ntxias” (Yauhas 17:15). Peb yuav tsum ua neej nyob nrog neeg ntiajteb, tiamsis tsis txhob nrog neeg ntiajteb koom kwv ib tug quab, uas yog mus koom nrog lawv ua kev txhaum, yuav cov tsis ntseeg los ua txij nkawm lossis coj lub neej zoo li neeg ntiajteb ua. Cov neeg muaj tus Tswv nyob nrog, peb yuav tau ua lub neej kom Vajtswv tau ntsejmuag thiab ua rau Vajtswv lub npe nrov ncha rau cov tsis tau ntseeg.
Thov Vajtswv,
Vajtswv ntuj, nyuam yaus ua Koj tsaug vim Koj txaus siab los nrog nyuam yaus nyob thiab cia nyuam yaus los ua Koj ib tug me nyuam. Thov pab kom nyuam yaus tsis txhob ua ib yam dabtsi raws li tibneeg ntiajteb ua, tiamsis paub ua lub neej ncaj ncees rau Koj mus. Amees.
Hauv peb lub neej ntseeg thiab kev sib yuav ua txij nkawm, puas hais tau tias peb yog tus“tsis nrog cov tsis ntseeg koom kwv ib tug quab” lawm?
Nyeem Vajluskub hauv peb lub xyoo: Yelemis 5:20-6:12
Kênh Youtube BHKTHN:
