Loos 8:22-27
Nqe cim:
“Kuv pom hais tias txojkev txomnyem uas tamsim no peb raug yeej piv tsis tau lub tshwjchim ci ntsa iab uas Vajtswv yuav pub rau peb yav tom ntej no” (Loos 8:18)
Lus nug rau sawvdaws xav:
– Timthawj Paulus qhia txog tus ntseeg Yexus lubneej nimno zoo licas?
– Vaj Ntsujplig pab tus ntseeg Yexus licas?
– Cov ntseeg Yexus li keebkwm thiab Vaj Ntsujplig tes haujlwm muaj qabhau licas rau peb lubneej?
Timthawj Paulus qhia meej hais tias: “txij thaum ub los txog niaj hnub no ib puas tsav yam uas Vajtswv tsim ntsaj ntsoog qees ib yam li tus pojniam uas mob plab yuav yug menyuam”, tiamsis “peb cov uas tau txais Vaj Ntsujplig uas yog thawj txoj koob hmoov uas Vajtswv pub rau peb lawm, peb los ntsaj ntsoog qees tos ntsoov hnub uas Vajtswv hu peb hais tias peb yog nws cov menyuam, thiab txhiv kom peb dim” (nqe 22-23). Tus ntseeg Yexus kev ntsaj ntsoog qees tsis yog tej kev ntsaj sab sab nkees nkees thaum ua haujlwm hauv ib hnub, lossis ntsaj vim tej kev mob xwb, tiamsis tseem yog kev ntsaj thaum raug tsimtxom vim kev ntseeg. Tej kev mob no loj txog qib uas hais tsis tau lus tawm, tsis paub yuav thov licas thiaj tsimnyog (nqe 26). Tswv Yexus tus kheej los kuj ntsib tej kev mob ntsaj li ntawd hauv lub vaj Khexemanes thaum Nws thov Vajtswv tas siab tas ntsws hais tias: “Kuv Txiv, yog koj tsis pom zoo muab lub khob no tshem ntawm kuv mus, yuav cia kuv haus xwb, ces cia ua raws li koj lub siab nyiam” (Mathais 26:42). Thiab Tswv Yexus kuj qhia rau cov thwjtim kom lawv ruaj siab hais tias: “Tus tub qhe yeej tsis muaj hwjchim loj dua nws tus tswv. Yog lawv tsimtxom kuv, lawv yuav tsimtxom nej thiab; yog lawv ua raws li kuv tej lus qhia, lawv yuav ua raws li nej tej lus qhia thiab” (Yauhas 15:20).
Tomqab uas Tswv Yexus mus saum ntuj lawm, Nws cov thwjtim tiv dhau tej kev tsimtxom txaus ntshai kawg li. Tus tuav haujlwm Xatefanaus yog ib tug puv npo Vaj Ntsujplig, ua haujlwm tawg paj txi txiv heev rau tus Tswv tau raug tuag vim kev ntseeg. Cov ntseeg Yexus nyob tiam xubthawj tau raug ntes kaw, raug coj mus rau tej tsiaj nyaum tom noj vim lawv lees hais tias lawv yog Tswv Yexus cov thwjtim. Thoob plaws hauv keebkwm, cov ntseeg Yexus raug ntau yam kev tsimtxom, ua rau lawv raug ri mus thoob qabntuj, coobleej raug tuag vim kev ntseeg. Tus Tswv cov menyuam raug txomnyem hauv lub ntiajteb vim peb tsis yog ntiajteb tug. Yam uas txhawb peb lub zog, yog thaum raug tsimtxom, Vaj Ntsujplig yeej niaj hnub nrog nraim peb, pab peb thaum peb qaug zog. Nws totaub, nkag siab, nplig siab, taw qhia, ntxiv zog thiab cawm peb dim. Vaj Ntsujplig thov Vajtswv pab peb thaum peb tsis paub yuav hais li cas. Vim Nws yog ib tug ntawm Vajtswv Vaj Peb Leeg, Nws paub yam twg yog yam zoo tshajplaws kom xwv thov pab tau rau peb (nqe 26-27).
Niaj hnub nimno, txawm yog peb tabtom raug yam kev mob ntsaj twg, los yuav tsum ntseeg khov kho li Timthawj Paulus hais tias: “txojkev txomnyem uas tamsim no peb raug yeej piv tsis tau lub tshwjchim ci ntsa iab uas Vajtswv yuav pub rau peb yav tom ntej no” (Loos 8:18). Peb cia li koom ua siab ntev tos, tig siab mus rau lubneej koob hmoov ibtxhis nrog tus Tswv uas muaj kev hlub.
Thov Vajtswv,
Tus Tswv! Nyuam yaus ntseeg tias Tswv Yexus twb npaj ib qhov chaw rau nyuam yaus saum Ntuj Ceebtsheej lawm, Nws yuav los tos nyuam yaus mus nrog Nws nyob. Thov Vaj Ntsujplig taw qhia thiab coj nyuam yaus txhua kauj ruam hauv lubneej. Thov Koj ntxiv zog, pab thiab puag nyuam yaus hla dhau tej kev sim siab hauv lubneej. Nyuam yaus tuav Yexus Khetos lub npe thov, Amees.
Peb tabtom cia siab rau yam dabtsi thaum ua neej nyob hauv ntiajteb no?
Nyeem Vajluskub hauv peb lub xyoos: II Kevcai 16
Kênh Youtube BHKTHN:
