Klei Aê Diê Blŭ: Rôm 8:22-27
Êlan kliăng: “Kâo yap klei knap mñai ênuk anei amâo năng ôh bi mđơr hŏng klei guh kơang srăng bi êdah kơ drei ênuk êdei” (Rôm 8:18).
Klei êmuh ksiêm mĭn: Khua ƀĭng kna Y-Pôl bi êdah brei thâo si ngă klei jing phung đăo kơ Krist jing ară anei? Si ngă Yang Mngăt Jăk đru phung đăo kơ Krist? Si ngă klei hƀuê ênuk klei đăo kơ Krist leh anăn bruă Yang Mngăt Jăk bi hmăi kơ klei hdĭp drei?
Khua ƀĭng kna Y-Pôl lač, “Truh kơ hruê anei, drei thâo jih jang mnơ̆ng hrih leh ur krao mđrăm mbĭt hlăm klei knap mñai msĕ si mniê đih pui. Leh anăn amâo djŏ ôh knŏng hjăn mnơ̆ng hrih leh, ƀiădah wăt drei pô mơh, phung mâo leh boh êlâo hĭn mơ̆ng Yang Mngăt Jăk, ur krao hlăm ai tiê êjai dôk guôn klei Aê Diê brei jing phung anak Ñu, čiăng lač klei bi tui kơ asei mlei drei” (êlan 22-23). Klei phung đăo ur krao amâo djŏ knŏng klei ur krao êmăn leh sa hruê mă bruă suăi, amâodah ruă kyua klei ruă duam ôh ƀiădah ur krao wăt hlăm klei arăng ngă jhat kyua Anăn Khua Yang mơh. Klei ênguôt anei prŏng snăk tơl amâo dưi pia blŭ, amâo thâo ôh si srăng wah lač kơ Khua Yang čiăng bi djŏ (êlan 26). Khua Yang Yêsu pô tuôm găn leh mơh klei ênguôt anăn hlăm war mnga Gêtsêmanê tơdah Ñu wah lač kơ Aê Diê Ama hŏng jih ai tiê snei, “Ơ Ama kâo, tơdah Ih amâo dưi mă atŏ anei ôh mơ̆ng kâo tơl kâo mnăm leh, brei truh tui si Ih čiăng” (Y-Mathiơ 26:42). Leh anăn Khua Yang Yêsu ăt lač leh mơh kơ phung ƀĭng kna čiăng kơ digơ̆ dôk kjăp snei: “Hdơr bĕ klei Kâo lač leh kơ diih, ‘Sa čô dĭng buăl amâo jing prŏng hĭn kơ khua ñu ôh.’ Tơdah diñu ngă jhat leh kơ Kâo, diñu srăng ngă jhat kơ diih msĕ mơh. Tơdah diñu djă pioh klei Kâo blŭ, diñu srăng djă pioh klei diih blŭ msĕ mơh” (Y-Yôhan 15:20).
Leh Khua Yang Yêsu đĭ wĭt kơ adiê, phung ƀĭng kna tŭ klei arăng ngă jhat ktang snăk. Khua sang yang Y-Êtiên jing sa čô bŏ hŏng Yang Mngăt Jăk, mă bruă kơ Khua Yang mâo boh tŭ snăk leh anăn tŭ klei djiê kyua klei đăo. Phung đăo kơ Krist hlăm ênuk tal sa tŭ klei arăng mă leh anăn brei êmông gu kĕ hơiêk bi mdjiê kyua klei digơ̆ hưn kơ digơ̆ jing phung ƀĭng kna Khua Yang Yêsu. Mơ̆ng ênuk mphŭn dô hlŏng kơ ară anei hin, phung đăo kơ Krist tŭ klei arăng ngă jhat hŏng lu êlan mdê mdê, bra đuĕ tar ƀar lăn ala, tơl đa đa tŭ klei djiê kyua klei đăo. Phung anak čô Aê Diê tŭ klei knap mñai ti lăn ala anei kyuadah drei amâo jing dŏ lăn ala anei ôh. Klei bi mđĭ ai drei mâo êjai tŭ klei arăng ngă jhat jing, Yang Mngăt Jăk ăt dôk mbĭt hŏng drei nanao, đru drei hlăm klei drei awăt. Ñu thâo săng, pap brei, bi juh, bi hriăm, thiăm ai ktang leh anăn bi mtlaih drei. Yang Mngăt Jăk mă mơh klei ur krao amâo dưi blŭ ôh čiăng đru wah lač brei kơ drei. Kyuadah Yang Mngăt Jăk jing Aê Diê Yang Tal Tlâo, Ñu thâo ya klei jing jăk hĭn čiăng wah lač brei kơ drei (êlan 26-27).
Hruê anei, măng ai ya klei knap mñai drei tŭ, hdơr bĕ kơ klei Khua ƀĭng kna Y-Pôl bi klă leh snei, “Kâo yap klei knap mñai ênuk anei amâo năng ôh bi mđơr hŏng klei guh kơang srăng bi êdah kơ drei ênuk êdei” (Rôm 8:18). Mbĭt mđrăm drei gĭr dôk guôn, hung nao kơ klei hdĭp hlŏng lar bŏ hŏng klei jăk mơak mbĭt hŏng Khua Yang Pô drei khăp.
Kơ ya klei drei dôk čang hmăng êjai dôk hdĭp ti lăn ala anei?
Wah lač: Ơ Khua Yang, kâo đăo sĭt Khua Yang Yêsu mkra leh kơ kâo sa anôk dôk hlăm adiê, Ih srăng lŏ hriê leh mă ba kâo nao mbĭt hŏng Ih. Akâo kơ Yang Mngăt Jăk bi hriăm leh anăn atăt ba kâo grăp knhuang êbat ktuê êlan êbat myang, akâo kơ Khua Yang thiăm ai ktang, đru wah lač leh anăn pŭ kmiêk kâo găn jih klei knap mñai hlăm klei hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
