II Kauleethaus 6:11-13
Nqe cim:
“Kuv suav hais tias nej yog kuv cov menyuam, kuv thiaj hais li no rau nej, nej cia li qhia hlo nej lub siab rau peb ib yam li peb twb qhia peb lub siab rau nej lawm!” (II Kauleethaus 6:13).
Lus nug rau sawvdaws xav:
- Timthawj Paulus muaj nplooj siab licas rau cov ntseeg hauv nroog Kauleethaus?
- Cov ntseeg hauv nroog Kauleethaus ua pauj nws nplooj siab licas?
- Timthawj Paulus ntshaw yam dabtsi ntawm cov ntseeg hauv Kauleethaus?
- Yog peb kaw siab tsis txais yuav tej lus qhia ntawm kev hlub yuav ntsib dabtsi?
Timthawj Paulus tuaj cuag cov ntseeg hauv Kauleethaus los ntawm nplooj siab dawb siab zoo, ua siab ntev thiab siab hlub, yog li ntawd nws thiaj ua tib zoo hais rau lawv hais tias: “Cov kwvtij uas nyob hauv lub nroog Kauleethaus, peb twb nthuav peb lub siab lub ntsws qhia tseeb rau nej lawm, peb tsis tau zais ib los hlo li” (nqe 11). Lo lus “nthuav lub siab lub ntsws” qhia pom txog Timthawj Paulus nplooj siab hlub thaum nws qhuab qhia, qhuab ntuas lossis sau ntawv rau cov ntseeg hauv Kauleethaus. Ntawd yog sijhawm nws nthuav lub siab lub ntsws rau lawv, qhia txhua yam los ntawm kev hlub thiab tsis zais siab. Nws tsis saib cov ntseeg hauv Pawg Ntseeg Kauleethaus yog qhua, tiamsis saib lawv zoo li nws cov menyuam (nqe 13) nws thiaj xav ua txhua yam kom muaj nqis rau lawv.
Tiamsis, tu siab ntau, cov ntseeg hauv nroog Kauleethaus nplooj siab muab pub rau Timthawj Paulus tsis zoo li nws nplooj siab muab pub rau lawv. Timthawj Paulus thiab nws cov phoojywg qhib siab rau lawv, tsis zais dabtsi hlo li, tiamsis lawv ua pauj Timthawj Paulus los ntawm nplooj siab nqaim, kev hlub tsis txaus, tsis qhib siab txais yuav tej lus qhuab ntuas. Nws saib lawv zoo li nws tej menyuam sab ntsujplig, tiamsis lawv saib nws zoo li ib tug qhua xwb. Nws txojkev hlub pub rau lawv dav kawg nkaus, tiamsis sis lawv txojkev hlub pauj nws nqaim kawg li. Yam uas Timthawj Paulus ntshaw ntawm cov ntseeg hauv Kauleethaus, yog lawv cia li qhib siab los txais yuav nws thiab Vajtswv cov tubtxib txojkev hlub tseeb. Tej lus tseeb pheej ua rau mob siab, lawv tsuas xav mloog tej lus qab zib, lus haub ntxias ntawm cov xibhawb cuav xwb, hais txog Timthawj Paulus tej lus qhuab ntuas ces lawv kaw siab nti. Yog li ntawd, nws thiaj nqua hu lawv hais tias: “Kuv suav hais tias nej yog kuv cov menyuam, kuv thiaj hais li no rau nej, nej cia li qhia hlo nej lub siab rau peb ib yam li peb twb qhia peb lub siab rau nej lawm!” (nqe 13).
Tsis yog tsuas muaj cov ntseeg hauv Kauleethaus thiaj zoo li ntawd xwb, peb kuj pheej ua li ntawd rau Vajtswv cov tubtxib uas ncaj ncees thaum lawv hais tej lus tseeb uas peb tsis xav txais yuav. Tsimnyog qhib siab los mloog tej lus qhuab ntuas tawm hauv kev hlub tseeb tuaj, tiamsis peb ho kaw siab, txav mus kom deb. Peb xav tias ua li ntawd ces yuav nyob kaj siab, tiamsis kev kaj siab cuav ntawd yuav ua rau peb txav deb Vajtswv thiab txav ze kev txhaum. Cia li qhib siab rau tus Tswv thiab rau lwm tus, peb thiaj yuav txawj sib txhim kho los ntawm txojkev hlub tseeb.
Thov Vajtswv
Tus Tswv uas nyuam yaus hlub tshua! Thov zam txim rau nyuam yaus pheej ua neeg kaw siab. Thov pab nyuam yaus txawj qhib siab thiaj yuav pub tau thiab txais tau txojkev hlub tseeb. Amees.
Peb puas tabtom qhib siab txais yuav tej lus qhuab ntuas kev hlub rau peb lubneej lawm tau?
Nyeem Vajluskub hauv peb lub xyoos: Yaxayas 49:1-21
Kênh Youtube BHKTHN:
