Klei Aê Diê Blŭ: II Kôrantô 6:11‑13
Êlan kliăng: “Bi wĭt bĕ kơ hmei klei msĕ — kâo blŭ kơ diih msĕ si kơ phung hđeh — pŏk bi prŏng bĕ ai tiê diih msĕ mơh.” (II Kôrantô 6:13)
Klei êmuh ksiêm mĭn: Si ai tiê Khua ƀĭng kna Y‑Pôl hŏng phung đăo ti Kôrantô? Si phung đăo Kôrantô lŏ wĭt lač kơ klei ñu khăp? Ya klei ñu čiăng mơ̆ng phung đăo Kôrantô? Ya klei jhat mâo sĭt drei kđăl ai tiê pô ti anăp klei khăp sĭt?
Khua ƀĭng kna Y‑Pôl hŏng phung đăo ti Kôrantô hŏng ai tiê thâo gĭr, doh jăk hŏng klei khăp klă sĭt, kyua anăn ñu hur har lač hŏng digơ̆: “Ơ phung Kôrantô, hmei ha blŭ leh jih klei sĭt kơ diih; ai tiê hmei pŏk prŏng leh kơ diih.” (êlan 11). Boh blŭ “ha blŭ”, “ai tiê pŏk prŏng” brei ƀuh ai tiê phung Khua ƀĭng kna Y‑Pôl sĭt ñu bi hriăm, mtô lač amâodah čih hră kơ phung đăo Kôrantô. Anăn jing hlăk ñu bi êdah ai tiê hŏng digơ̆, hưn boh klei hlăm klei khăp leh anăn pŏk ai tiê. Ñu amâo dlăng phung đăo ti Sang Aê Diê Kôrantô jing phung amâo thâo kral, ƀiădah dlăng digơ̆ jing anak čô pô (êlan 13) anăn jih ai tiê čang hmăng ngă djăp mta bruă kyua klei tŭ dưn digơ̆.
Khădah, klei năng ênguôt jing ai tiê phung đăo Kôrantô hŏng Khua ƀĭng kna Y‑Pôl amâo msĕ si ai tiê ñu hŏng diñu ôh. Ñu leh anăn phung mă bruă mbĭt pŏk prŏng ai tiê klei khăp hŏng digơ̆, amâo mâo ya klei kčah ôh, bi diñu kđăl ai tiê hŏng phung khua ƀĭng kna, mkhư̆ klei khăp, amâo pŏk ai tiê mă klei bi hriăm ôh. Ñu dlăng digơ̆ jing anak čô mngăt, mklăk wĭt diñu knŏng čiăng dlăng kơ gơ̆ jing amâo thâo kral. Klei khăp ñu brei kơ digơ̆ prŏng snăk, bi klei khăp diñu brei kơ gơ̆ điêt dhiêt. Klei Khua ƀĭng kna Y‑Pôl čang hmăng jing phung đăo Kôrantô pŏk prŏng ai tiê diñu čiăng thâo kral klei khăp klă sĭt mơ̆ng ñu leh anăn phung dĭng buăl Aê Diê sĭt suôr ba kơ diñu. Klei blŭ sĭt khăng bi ênguôt ai tiê anăn diñu knŏng čiăng hmư̆ klei jăk, mă ai mơ̆ng phung ksiêm hriăm mgưt, bi hŏng klei ñu mtô bi hriăm snăn diñu kđăl jih. Kyua anăn, ñu jih ai tiê iêô mthưr: “Bi wĭt bĕ kơ hmei klei msĕ — kâo blŭ kơ diih msĕ si kơ phung hđeh — pŏk bi prŏng bĕ ai tiê diih msĕ mơh” (êlan 13).
Amâo djŏ knŏng hjăn phung đăo ti Kôrantô ôh ƀiădah grăp čô drei ăt khăng bi blŭ hrăm snăn hŏng phung dĭng buăl sĭt suôr Aê Diê sĭt digơ̆ lač klei blŭ sĭt ƀiădah drei amâo čiăng mă tŭ. Hrô kơ pŏk prŏng ai tiê čiăng thâo klei mtô lač hriê mơ̆ng klei khăp sĭt, drei lŏ kđăl ai tiê, dôk kbưi čiăng ñĕ. Mĭndah snăn jing êđăp ênang, ƀiădah klei êđăp ênang mgưt anăn srăng klư̆ drei kbưi hŏng Aê Diê leh anăn nao giăm hŏng klei soh hĭn. Brei drei pŏk ai tiê hŏng Aê Diê leh anăn hdơ̆ng drei čiăng hrăm mbĭt bi mđĭ ai hlăm klei khăp klă sĭt.
Drei dôk pŏk ai tiê čiăng mă klei khăp sĭt nik brei kơ pô mơ̆?
Wah lač: Ơ Aê Diê pô khăp! Akâo kơ Ih pap brei kơ kâo kyua kâo khăng kđăl ai tiê pô. Akâo kơ Ih brei kâo pŏk nanao ai tiê čiăng dưi brei leh anăn mă klei khăp klă sĭt hdơ̆ng pô.
Dlăng klei Aê Diê Blŭ hlăm tlâo thŭn: Y‑Êsai 49:1‑21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
