Čhiăm Ao Mkăn Kơ Phung Khua Ngă Yang – 28/1/2022

865

Klei Aê Diê Blŭ: Klei Kbiă 28:36-43

Êlan kliăng: “Kyuadah kâo jing Yêhôwa pô atăt ba leh diih kbiă mơ̆ng čar Êjip, čiăng jing Aê Diê diih; snăn brei diih jing doh jăk, kyuadah Kâo pô jing doh jăk” (Bruă Lêwi 11:45).

Klei êmuh ksiêm mĭn: Ya klei yuôm bhăn mơ̆ng čhiăm ao yuôm bhăn mkăn brei kơ phung khua ngă yang? Ya knuih Aê Diê dưi mñă tinei? Ya klei djŏ tuôm kơ drei mơ̆ng klei hriăm anei kơ čhiăm ao leh anăn knuih drei hdĭp kkuh mpŭ kơ Aê Diê?

Aê Diê ăt bi hriăm Y‑Môis ngă čhiăm ao yuôm bhăn mkăn. Êlâo hĭn jing sa pŏk mdhă điêt mah doh, ktur sa mnơ̆ng kđăm: “Doh Jăk Kơ Yêhôwa”, mdhă anei kă hŏng sa aruăt klei kuĭ piơk ti anăp mu, dôk ti adhei Khua Ngă Yang Prŏng Y‑Arôn. Brei Y‑Arôn dưm nanao mdhă doh jăk anăn sĭt nao hlăm Sang čhiăm klei bi kƀĭn. Mdhă doh jăk mñă kơ jih jang phung ƀuôn sang Aê Diê kơ klei doh jăk Aê Diê, Y‑Arôn bi ala klam brei klei soh phung ƀuôn sang Israel leh anăn ngă mnơ̆ng hrô brei klei soh kơ phung ƀuôn sang Aê Diê hlăm Sang yang (êlan 38). Klei doh jăk Aê Diê brei dưi kđăm hlăm ai tiê klei mĭn mơ̆ng jih jang phung ƀuôn sang Ñu. Brei diñu dưi bi doh, mprăp bi jăk sĭt nao ti anăp Aê Diê leh anăn brei thâo săng hlăm klei blŭ tlao nao hriê grăp hruê msĕ si sa djuê ana dưi pioh hjăn ti anăp Aê Diê.

Leh anăn ao kpal đêč hŏng kbuă điêt aruăt leh anăn sa klei hdrăng kơiêng đêč dưi ngă bi msiam kơ phung khua ngă yang, pioh kơ klei guh kơang, mdê hŏng phung Israel mkăn (êlan 39-40). Knhal tuč jing čhum đŭt hŏng kbuă điêt aruăt čiăng guôm klei lưng mlŭn diñu; čhum anăn mơ̆ng kơiêng truh kơ pha (êlan 42, dlăng thiăm hlăm Klei Kbiă 20:26).

Wăt tơdah čhiăm ao phung khua ngă yang dưi ngă hŏng mnơ̆ng yuôm, mñam siam snăk leh anăn hlue si klei Aê Diê ktrâo lač leh, ƀiădah knŏng hjăn čhiăm ao kăn dưi ngă kơ phung khua ngă yang doh jăk rei. Phung khua ngă yang brei hơô djŏ čhiăm ao, Y‑Môis trôč êa bâo mngưi kơ digơ̆, ruah leh anăn pioh hjăn bi doh, čiăng kơ diñu ngă bruă ngă yang hlăm Sang čhiăm (êlan 41).

Čhiăm ao djŏ jing klei kčah mgô̆ kơ phung khua ngă yang sĭt nao hlăm anôk kkuh mpŭ ti Sang yang, snăn diñu srăng amâo ngă soh ôh hŏng Aê Diê leh anăn amâo djiê ôh (êlan 43). Klei Aê Diê Blŭ mtô: “Kkuh mpŭ bĕ kơ Yêhôwa hŏng kdrăp doh jăk; ktư̆ yơ̆ng bĕ ti anăp ñu, Ơ jih jang phung dôk ti lăn ala” (Klei Mmuñ Hđăp 96:9). Hruê anei, drei jing phung đăo kơ Krist ba Anăn Pô Bi Mtlaih, dưi jing doh jăk amâo djŏ kyua čhiăm ao siam amâodah dŭm bruă pô ngă jăk ôh, ƀiădah kyua Khua Yang Yêsu tuh leh êrah bi tui, bi doh leh anăn pioh hjăn drei jing phung ƀuôn sang doh jăk kơ Aê Diê. Knuih Aê Diê jing doh jăk, Ñu čiăng kơ drei ăt brei jing doh jăk msĕ si Ama pô.

Si drei bi êdah knuih “doh jăk” hlăm klei čŭt hơô, blŭ tlao, bruă ngă, hlăp mbul leh anăn klei mĭn? Ya klei Aê Diê mñă kơ diih brei bi mlih?

Wah lač: Ơ Khua Yang, kâo bi mni lač jăk kơ Ih brei leh kơ kâo dưi jing ƀuôn sang doh jăk hlăm Ih. Akâo kơ Ih đru kâo răng kriê klei mĭn, klei blŭ leh anăn bruă kâo ngă ƀrư̆ jing doh jăk, msĕ Ih hĭn, čiăng kâo dưi jing jăk siam leh anăn bi guh kơang hlăm ală Ih leh anăn hdĭp bi guh kơang Anăn Ih.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Dlăng Klei Aê Diê Blŭ hlăm tlâo thŭn: II Klei Yăl Dliê 2:11 – 3:17

Kênh Youtube BHKTHN:

https://www.youtube.com/c/bhkthn

Bài trướcLwm Yam Tsoos Tsho Rau Cov Povthawj – 28/1/2022
Bài tiếp theoCác Trang Phục Khác Của Thầy Tế Lễ – 28/1/2022