I Kôrintô 1:4-9
“Inh ling lang bơnê kơ ‘Bok Kei-Dei ‘mêm kơ iĕm, Sư tơgŭm iĕm, yua kơ Sư mơnat đơ̆ng iĕm lui kơ Yêsu Krist.” (I Kôrintô 1:4)
Nơ̆r jet tơchĕng pơwao:
– ‘Bok Pôl ling lang bơnê kơ Kră Yang gah Khul Bơngai Lui yua kơ tơdrong kiơ?
– Tơdrong kiơ pơm kơ sư ling lang bơnê kơ Kră Yang thoi noh?
– Pơm thoi yơ wă kơ bơ̆n klah asong hăm bơngai nai hơnơ̆ng tơdrong mă bơ̆n bơnê kơ Kră Yang gah lu sư?
Pơlei Kôrintô chăl ‘bok Pôl sơ̆ jơ̆ minh pơlei tih kiơ̆ kơ pơm tơdrong juăt grĕk, jơ̆ oei tơ lăm tơring Achai gah dêh char Rôm. Dêh ‘nâu rơnŭk rơnua gah tôm tơmam, pơrŏ kơdih pơm gah tơdrong juăt, păng lơ tơdrong lui. Lăm tơdrong jang chă bơtho, hăm tơdrong tơgŭm đơ̆ng klo kăn bre A-qui-la păng Bê-rit-sin, ‘bok Pôl pơjing hloi khul bơngai lui tơ âu păng oei tơ noh mơjĭt tơhngam khei wă bơtho, pơjing tơiung Khul Bơngai Lui (Tơdrong jang 18:1-28).
Lăm chăl trong Nơ̆r ‘Bok Kei-Dei năr ‘nâu, ‘bok Pôl khan “ling lang” bơnê kơ Kră Yang gah Khul Bơngai Lui Kôrintô. Mă tơpă, pơih nơ̆r pơma blŭng a lăm kơthơ, ‘bok Pôl đei ngăl nơ̆r bơnê kơ Kră Yang gah lu ‘nhŏng oh lăm đon lui lu sư kơdih (Rôm 1:8; Êphêsô 1:15-16; Kôlôsse 1:3-4, …). jơhngơ̆m bơnê kơ Kră Yang gah đe nai noh bơih tơdrong kiơ mă Kră Yang ăn kơ bơ̆n, mălei rok kiơ̆ kơmĭl ‘bok Pôl, bơ̆n kư̆m kăl kơ “ling lang” dah “hơnơ̆ng” wei jơhngơ̆m bơnê kơ Kră Yang bơnê dih băl, gah dôm tơdrong Kră Yang mơnat ăn đĕch, păng tơdrong pŭn hiôk đơ̆ng ‘Bok Kei-Dei ‘măn kơ ‘nhŏng mai oh bơ̆n.
‘Bar tơdrong blŭng a ‘bok Pôl bơnê kơ Kră Yang gah Khul Bơngai Lui Kôrintô noh “Iĕm kư̆m hlôh tơdrong Sư mơ̆n” (trong 5). ‘Mêm gĭt dêh tơpă dah minh ‘nu bơngai đei tơdrong bơnê lăm nơ̆r pơma păng tơdrong tơchĕng, yua kơ lơ bơngai dah mă pơma lơ mălei ưh kơ đei hlôh lơ, dah mă băt lơ mălei ưh kơ băt trong wă roi tơblang kơ đe nai hlôh. Hnam akŭm ayơ dah bơngai bu đei ‘bar tơdrong ‘nâu rŏ lăng gơh ba ăn kơ đe nai lơ tơdrong pŭn hiôk.
Tơdrong mă pêng ‘bok Pôl bơnê kơ Kră Yang gah Khul Bơngai Lui ‘noh gah “bơnê” păng tơdrong “mơnat ăn” đơ̆ng Kră Yang. Dôm lu nơ̆r ‘nâu đei pơlơ̆k pơle lăm pêng trong lăm Nơ̆r ‘Bok Kei-Dei (trong 4, 5, 7) ‘bok Pôl ‘bôh hơđăl păng băt bơnê kơ Kră Yang yua kơ Kôrintô ‘noh bơih Khul Bơngai Lui đei Kră Yang tuh ăn lơ tơdrong hiôk ‘lơ̆ng, ding mah sư khan lu sư “’Bok Kei-Dei ăn kơ iĕm tôm tơdrong mah ngăl” (trong 7). Tơdrong bơnê tih hloh mă sư bơnê kơ Kră Yang gah Khul Bơngai Lui Kôrintô ‘noh lu sư gơh pơgơ̆p tơ’bưh hơdai “iĕm pơgơ̆p hăm kon Sư Yêsu Krist Kră Yang bơ̆n.” (trong 9). Pơtrơp dơ̆ng noh Khul Bơngai Lui lăm âu đei lơ tơdrong gơh hơgei gah bơhngol.
Pơih nơ̆r pơma lăm kơthơ, ‘bok Pôl jô̆ kơ Khul Bơngai Lui ‘noh “Khul Bơngai Lui kơ ‘Bok Kei-Dei”, lu bơngai lui lăm âu jơ̆ lu “bơngai lui” (I Kôrintô 1:2). Đơ̆ng sư lăng trŏ noh pơm kơ sư ling lang bơnê kơ Kră Yang gah dôm tơdrong kiơ lu sư đei. Dah bơ̆n lăng đe nai trŏ gô ba ăn tơdrong trŏ gah bơngai noh.
Ơ Kră Yang, bơnê kơ Ih, apinh Ih tơgŭm inh bơwei jơhngơ̆m băt bơnê păng bơnê kơ Kră Yang gah bơngai nai, wă kơ đơ̆ng ‘noh bơih inh huay kơ đei jơhngơ̆m ưh kơ ‘lơ̆ng lăp lăng ‘bôh lu tơdrong ưh tam ‘lơ̆ng dih băl, krao khan yua anăn Kră Yang Yêsu Krist, Amen.
‘Bơ̆t jơ bơ̆n krao khan kơ hnam dơnŏ, kon hơ’lơ̆p, ‘nhŏng oh păng buăl juăt, bơ̆n hăm bơnê kơ Kră Yang dah mă jô̆ jŏk tơtok hăm Kră Yang gah lu sư?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 19
Kênh Youtube BHKTHN:
