Klei Aê Diê Blŭ: I Kôrantô 1:4-9
Êlan kliăng: “Kâo bi mni kơ Aê Diê nanao kyua diih, kyua klei pap, Ñu brei leh kơ diih hlăm Krist Yêsu,” (I Kôrantô 1:4)
Klei êmuh ksiêm mĭn: Ya klei Khua ƀĭng kna Y-Pôl bi mni kơ Aê Diê kơ Phung Sang Aê Diê Kôrantô? Ya klei atăt ñu truh kơ klei bi mni Khua Yang msĕ snăn? Si ngă čiăng kơ drei khăng bi kah mbha hŏng pô mkăn klei drei bi mni kơ Aê Diê kơ digơ̆?
Ƀuôn prŏng Kôrantô ênuk Khua ƀĭng kna Y-Pôl jing sa ƀuôn prŏng hlue si dhar kreh Grĕk, jing ƀuôn prŏng phŭn čar Akai ênuk Rôm kiă kriê. Ƀuôn prŏng anei hing ang kyua klei mdrŏng sah kơ bruă mnia blei, klei tưn hưn kơ dhar kreh, leh anăn mâo lu klei đăo. Hlăm hdră hiu hưn klei đăo, hŏng klei đru mơ̆ng ung mô̆ H’Prisil leh anăn Y-Akilas, Khua ƀĭng kna Y-Pôl pral mkŏ mjing Phung Sang Aê Diê tinei leh anăn lŏ dôk pluh sa păn mlan čiăng lŏ dơ̆ng mtô, mkŏ mjing Phung Sang Aê Diê (Bruă Phung Khua Ƀĭng Kna 18:1-28).
Hlăm trăn Klei Aê Diê Blŭ hruê anei, Khua ƀĭng kna Y-Pôl lač ñu bi mni “nanao” kơ Aê Diê kơ Phung Sang Aê Diê ti Kôrantô. Boh sĭt, hlăm lu kdrêč mphŭn čih dŭm hră, Khua ƀĭng kna Y-Pôl mâo sơăi klei bi mni kơ Aê Diê kyua phung ayŏng amai adei hlăm klei đăo pô (Rôm 1:8; Êphêsô 1:15-16; Kôlôs 1:3-4…). Ai tiê bi mni kơ Aê Diê kyua pô mkăn jing klei Khua ƀĭng kna Y-Pôl ngă nanao leh anăn bi êdah. Drei khăng bi mni kơ ya klei Aê Diê brei kơ pô, ƀiădah tui hlue Khua ƀĭng kna Y-Pôl, ăt brei drei krơ̆ng “nanao” ai tiê bi mni kơ Aê Diê kyua hdơ̆ng pô, kơ klei pap leh anăn klei jăk Aê Diê brei leh kơ ayŏng amai adei pô.
Dua klei tal êlâo Khua ƀĭng kna Y-Pôl bi mni kơ Phung Sang Aê Diê Kôrantô jing “klei thâo blŭ leh anăn klei thâo săng” (êlan 5).Yuôm bhăn snăk tơdah sa čô mnuih mâo klei pap brei hlăm klei blŭ wăt klei thâo săng, kyua lu mnuih blŭ lu ƀiădah amâo thâo săng lu ôh, amâodah thâo lu ƀiădah amâo thâo ôh si srăng blang kơ pô mkăn thâo săng. Ti Phung Sang Aê Diê amâodah hlei pô mâo jih dua klei brei anei srăng dưi ba lu klei jăk mơak kơ pô mkăn.
Klei tal tlâo Khua ƀĭng kna Y-Pôl bi mni kơ Phung Sang Aê Diê Kôrantô jing kơ “klei pap” leh anăn “klei brei” Aê Diê brei. Dŭm boh hră anei dưi mñă lu blư̆ hlăm tlâo êlan Klei Aê Diê Blŭ (êlan 4, 5, 7). Khua ƀĭng kna Y-Pôl ƀuh klă leh anăn hdơr knga kơ Aê Diê kyua Kôrantô jing sa Sang Aê Diê mâo Aê Diê brei lu klei hơêč hmưi yuôm bhăn, tơl ñu lač diñu “amâo kƀah ôh sa mta klei Yang Mngăt Jăk brei” (êlan 7). Klei Aê Diê brei prŏng prĭn ñu bi mni kơ Aê Diê kyua Phung Sang Aê Diê Kôrantô jing diñu dưi mŭt hlăm klei bi mguôp “hŏng Anak Ñu, Yêsu Krist, Khua Yang drei” (êlan 9). Leh anăn jing Phung Sang Aê Diê tinei mâo lu klei Yang Mngăt Jăk brei.
Akŏ hră, Khua ƀĭng kna Y-Pôl iêô Phung Sang Aê Diê Kôrantô jing “Phung Sang Aê Diê”, phung đăo tinei jing “phung doh jăk” (I Kôrantô 1:2). Klei ƀuh djŏ klă anăn atăt ñu kơ klei bi mni nanao kơ Aê Diê kyua ya klei digơ̆ mâo leh. Tơdah drei dlăng djŏ kơ sa čô mnuih srăng atăt kơ knuih djŏ kơ pô anăn.
Hlăk êjai wah lač kơ gŏ sang, anak čô, găp djuê leh anăn ƀĭng găp, ya klei drei khăng bi mni kơ Aê Diê amâodah akâo kơ Aê Diê kơ digơ̆?
Wah lač: Ơ Aê Diê, akâo kơ Ih đru kâo rông ai tiê thâo hdơr knga leh anăn bi mni kơ Ih kơ pô mkăn, čiăng mơ̆ng anăn kâo srăng lui knuih knŏng ƀuh klei amâo jăk hnơ̆ng pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
