Klei Aê Diê Blŭ: Y-Êsai 1:13-18
Êlan kliăng: “Brei diih ngă jăk hdơ̆ng diih pô, bŏ hŏng klei thâo pap, bi pap brei hdơ̆ng diih, msĕ si Aê Diê pap brei leh kơ diih hlăm Krist.” (Êphêsô 4:32)
Klei êmuh ksiêm mĭn: Khua pô hưn êlâo Y-Êsai hưn si klei Aê Diê pap brei kơ phung ƀuôn sang Ñu? Si klei Khua Yang Yêsu wah lač brei kơ phung pơ̆ng msei kđĭn Ñu? Si drei ngă čiăng pap brei kơ phung ngă jhat ktang tĭt kơ drei?
Khua pô hưn êlâo Y-Êsai brei ƀuh klei soh prŏng phung ƀuôn sang Yuđa ngă, leh anăn klei pap brei êbeh dlai mơ̆ng Aê Diê. Khua Yang jing Pô Doh Jăk, bi êmut kheh kơ klei soh. Tơdah phung ƀuôn sang Yuđa khăng ai tiê leh anăn dôk ngă soh nanao, snăn wăt tơdah diñu nao kơ Sang Yang myơr lu mnơ̆ng ngă yang dưn, wăt tơdah bi kƀĭn hlăm hruê knăm prŏng dưn, wăt tơdah mmuñ mpŭ mni kơ Khua Yang dưn, wăt tơdah wah lač lu dưn, Khua Yang ăt bi êmut kheh, amâo čiăng hmư̆ ôh (Y-Êsai 1:1-17). Ƀiădah bi tơdah phung ƀuôn sang Ñu kmhal sĭt kơ klei soh, Khua Yang mâo Klei Blŭ yuôm bhăn êdimima kơ diñu: “Wăt tơdah klei soh diih jing hrah huč, diñu srăng jing kô̆ msĕ si pliêr; wăt tơdah diñu jing hrah jŭ, diñu srăng jing kô̆ msĕ si mlâo biăp” (êlan 18). Khua pô hưn êlâo Y-Êsai brei ƀuh, Aê Diê jing Pô Jăk, bŏ hŏng klei khăp klei pap ƀiădah čiăng dưi mâo klei Aê Diê pap brei, brei mnuih soh mâo klei kmhal sĭt kơ klei soh. Mnuih kmhal sĭt kơ klei soh srăng mă tŭ klei pap brei kluôm dhuôm mơ̆ng Khua Yang. Klei Khua Yang pap brei jing yuôm bhăn êdimima!
Ti dlông kyâo bi kal, Khua Yang Yêsu wah lač brei kơ phung pơ̆ng msei kđĭn Ñu: “Ơ Ama, pap brei kơ diñu; kyuadah diñu amâo thâo ôh ya klei diñu ngă.” (Y-Luk 23:34). Tui hlue klei Khua Yang Yêsu bi hmô, Y-Êtiên tŭ klei phung bi kdơ̆ng bhĭr boh tâo, êlâo kơ ñu djiê ăt wah lač mơh: “Ơ Khua Yang, đăm yap klei soh anei kơ diñu ôh!” (Bruă Phung Khua Ƀĭng Kna 7:60). Tơdah hdĭp tui sĭt Klei Aê Diê Blŭ mtô, drei amâo rŭ ênua ôh, bi mklăk wĭt, wah lač leh anăn ngă jăk kơ pô roh. Mă klei jăk čiăng dưi hĭn hŏng klei ƀai jing klei bi guh kơang kơ Anăn Aê Diê leh anăn drei dưi tlaih mơ̆ng klei đuôm ai bi êmut (Rôm 12:17-21).
Khua ƀĭng kna Y-Pôl mtô: “Brei diih ngă jăk hdơ̆ng diih pô, bŏ hŏng klei thâo pap, bi pap brei hdơ̆ng diih, msĕ si Aê Diê pap brei leh kơ diih hlăm Krist.” (Êphêsô 4:32). Aê Diê čiăng drei dôk hdĭp thâo pap brei msĕ si Aê Diê pap brei leh kơ drei hlăm Khua Yang Yêsu Krist. Tơdah sa čô ngă soh hŏng drei leh anăn ñu kmhal sĭt, pap brei bĕ. Tơdah diñu ăt khăng ai tiê amâo čiăng kmhal ôh, wah lač akâo kơ Khua Yang pap brei kơ diñu, ƀuah, mkra mjuăt diñu, čiăng kơ diñu thâo kral klei soh čhuai leh anăn kmhal kơ klei soh. Khua Yang lač leh: “Ƀiădah tơdah diih amâo pap brei ôh kơ arăng, Ama diih kăn srăng pap brei klei soh diih rei” (Y-Mathiơ 6:15). Mâo mơh đa đa klei arăng ngă jhat kjham ktang kơ drei, drei dleh dưi wơr. Wăt tơdah snăn dưn, pap brei msĕ si Khua Yang pap brei leh kơ drei jing sa klei mtă, brei drei kwưh akâo kơ Aê Diê knang kơ klei myang Yang Mngăt Jăk brei klei khăp leh anăn klei pap brei mơ̆ng Khua Yang tuh ti dlông drei leh anăn wăt kơ phung ngă jhat kơ drei msĕ mơh.
Si drei wah lač leh anăn pap brei kơ phung ngă jhat kơ drei?
Wah lač: Ơ Ama kâo khăp, Klei Aê Diê Blŭ mtô pap brei kơ mnuih ngă soh hŏng kâo, jing sa klei mtă leh anăn klei lông dlăng, akâo klei ktang myang Ama đru kâo dưi gưt ngă. Akâo klei pap Khua Yang brei kâo hdĭp hŏng ai tiê klei mĭn pap brei msĕ si Khua Yang pap brei leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 52-53
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
